الماتى ءماسليحاتىنىڭ كەزەكتى سەسسياسىندا قالا بيۋدجەتى قايتا قارالىپ، ۇنەمدەلگەن قاراجات ماڭىزدى باعىتتارعا قايتا ءبولىندى.

«بيۋدجەتتى ناقتىلاۋ شەڭبەرىندە ءبىرقاتار ماڭىزدى الەۋمەتتىك جوبالارعا باسىمدىق بەرۋ قاراستىرىلعان. رەسپۋبليكالىق بيۋدجەتتەن الماتىعا قوسىمشا 10،8 ملرد تەڭگە ءبولىندى. بۇل قاراجات اباي داڭعىلىن ۇڭعىلاۋعا، رىسقۇلوۆ پەن قۇلجا جولايرىعىنىڭ قۇرىلىسىن اياقتاۋعا، 2021 جىلعا تامان مەترو ستانساسىن پايدالانۋعا بەرۋگە، ەلەكتر پويىزدارىن ساتىپ الۋعا باعىتتالادى»، - دەدى قالالىق ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى ءىلياس وسەروۆ.

ونىڭ ايتۋىنشا، مەملەكەتتىك تاپسىرىستى جۇزەگە اسىرۋدان، شىعىنداردى وڭتايلاندىرۋدان اجەپتاۋىر قارجى ۇنەمدەلگەن. بۇل قارجى قالا ەكونوميكاسىن ينۆەستيسيالاۋعا قايتا سالىنادى. ال الەۋمەتتىك سالاعا 611،7 ملن تەڭگە جۇمسالادى.

«الەۋمەتتىك تۇرعىدان از قامتىلعان وتباسىلاردى قولداۋعا قوسىمشا 42،4 ملن تەڭگە، ۇيدەن وقىتىلىپ جاتقان 676 مۇگەدەك بالاعا ماتەريالدىق كومەك رەتىندە 6 ملن تەڭگە قاراستىرىلادى. وقۋشىلار قاتارىنىڭ كوبەيۋىنە بايلانىستى 260 ملن تەڭگەدەن اسا قارجى مۇعالىمدەر جالاقىسىن كوتەرۋگە بولىنەدى. شاڭىراق شاعىناۋدانىندا 320 ورىندىق بالاباقشا قۇرىلىسىنا قوسىمشا 528 ملن تەڭگە بولىنەدى. سونىمەن قاتار، بالاباقشالاردا مەملەكەتتىك تاپسىرىس 60 بالاعا ارتادى. وعان 5،6 ملن تەڭگە قارالىپ وتىر. 7-9 جەلتوقسان اراسىندا شورت-ترەك بويىنشا الەم كۋبوگىن وتكىزۋگە 19،2 ملن تەڭگە جۇمسالادى»، - دەدى قالالىق ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى ءىلياس وسەروۆ.

سونىمەن قاتار، مادەني شارالاردى وتكىزۋگە 281،3 ملن تەڭگە باعىتتالادى. سەسسياعا قاتىسقان دەپۋتاتتار بيۋدجەت ناقتىلاۋىن ءبىراۋىزدان قولدادى. وسىلايشا الماتى بيۋدجەتى 537،5 ملرد تەڭگە بولماق. ونىڭ ىشىندە ناقتى بيۋدجەت  - 434،6 ملرد تەڭگە.

ەسكە سالا كەتەيىك، الماتىداعى قالالىق سوت عيماراتىنىڭ قۇرىلىسىنا 1 ملرد تەڭگە بولىنەتىنىن جازعان بولاتىنبىز.