الماتى قالاسىنىڭ ءماسليحاتى الەۋمەتتىك سالاعا قوسىمشا 611 ميلليون تەڭگە بولەتىن بولدى. بۇگىن وتكەن كەزەكتى سەسسيادا قالا بيۋدجەتى قايتا قارالىپ، ۇنەمدەلگەن قاراجاتتى الەۋمەتتىك ماڭىزى بار سالالار مەن جوبالارعا ءبولۋ تۋرالى شەشىم قابىلداندى.

«الەۋمەتتىك تۇرعىدان از قامتىلعان وتباسىلاردى قولداۋعا قوسىمشا 42 ملن تەڭگە، ۇيدەن وقىتىلاتىن 676 مۇگەدەك بالاعا ماتەريالدىق كومەك رەتىندە 6 ملن تەڭگە قاراستىرىلادى. وقۋشىلار قاتارىنىڭ كوبەيۋىنە بايلانىستى 260 ملن تەڭگەدەن اسا قارجى مۇعالىمدەر جالاقىسىن كوتەرۋگە بولىنبەك. سونىمەن قاتار، شاڭىراق شاعىناۋدانىندا 320 ورىندىق بالاباقشا قۇرىلىسىنا قوسىمشا 528 ملن تەڭگە قاراستىرىلعان»، – دەدى الماتى قالاسى ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى ءىلياس وسەروۆ.

جول جانە كولىك ينفراقۇرىلىمىن دامىتۋعا 4 ملرد 4 ملن تەڭگە قوسىمشا بولىنەدى. بۇل قارجىنىڭ 2 ملرد تەڭگەدەن استامى ىشكى الەۋمەتتىك ماڭىزى بار اۆتوبۋس تاسىمالىنا جۇمسالماق. «دوستىق» پەن «سارىارقا» مەترو ستانسالارىنىڭ قۇرىلىسىن اياقتاۋعا جەرگىلىكتى بيۋدجەتتەن 1 ملرد تەڭگە قوسىمشا قاراستىرىلادى. سونىمەن قاتار، ۇلكەن الماتى اينالما جولىنىڭ قۇرىلىسى جالعاساتىن بولادى.  

«رەسپۋبليكالىق بيۋدجەتتەن الماتىعا قوسىمشا 10 ملرد 8 ملن تەڭگە ءبولىندى. بۇل قاراجات اباي داڭعىلىن ۇڭعىلاۋعا، رىسقۇلوۆ پەن قۇلجا جولايرىعىنىڭ قۇرىلىسىن اياقتاۋعا، 2021 جىلعا قاراي مەترو ستانساسىن پايدالانۋعا بەرۋگە جانە ەلەكتر پويىزدارىن ساتىپ الۋعا باعىتتالادى»، – دەدى ءىلياس وسەروۆ.

كولىك ينفراقۇرىلىمىن دامىتۋمەن قاتار، اعىمداعى جىلى قالانى اباتتاندىرۋعا 372 ملن تەڭگە ال، ءتۇرعىن-ۇي كوممۋنالدىق شارۋاشىلىعىن جاقسارتۋعا قوسىمشا 694 ملن تەڭگە باعىتتالماق. سونداي-اق، قالالىق سوت عيماراتىنىڭ قۇرىلىسىن جالعاستىرۋ ءۇشىن 1 ملرد تەڭگە جۇمسالادى. سەسسياعا قاتىسقان ءماسليحات دەپۋتاتتارى بيۋدجەت ناقتىلاۋىن ءبىراۋىزدان قولدادى. وسىلايشا، الماتى بيۋدجەتى 537 ملرد تەڭگەنى قۇراپ وتىر. ونىڭ ىشىندە ناقتى قولدا بار قارجى – 434 ملرد تەڭگە.