الماتىدا قالالىق مەملەكەتتىك كىرىستەر دەپارتامەنتى «ءموبيلدى كەڭسە» جوباسىن ىسكە قوستى. وندا كاسىپكەرلەر سالىقشىلاردان تەگىن كەڭەس الىپ، كاسىبىن زاڭداستىرىپ، ونلاين كاسسالىق اپپاراتىن تىركەۋگە مۇمكىندىك بار. ايتا كەتەيىك، قازىرگى تاڭدا قالاداعى 58 بازاردا 15 مىڭنان استام ازامات كاسىپ جاساپ وتىر. ولاردىڭ 10 مىڭىنا جۋىعى كاسسالىق اپپارات قويماعان. 

بۇل قالاداعى ەڭ ءىرى بازارلاردىڭ ءبىرى. مۇندا مىڭداعان كاسىپكەر كاسىبىن دوڭگەلەتىپ وتىر. ولاردىڭ ىڭعايلىلىعى ءۇشىن بۇگىننەن باستاپ مىناداي جىلجىمالى ءموبيلدى كەڭسەلەر ىسكە قوسىلدى. بۇل جەردە ولار ءۇشىن ءتۇرلى مەملەكەتتىك قىزمەتتەر كورسەتىلەدى.

مامەتجان يتاكوۆ وسىدان ەكى اپتا بۇرىن ونلاين كاسسالىق اپپارات ساتىپ العان. الايدا، سالىق ورگانىنا بارىپ تىركەپ ۇلگەرمەپتى. كاسىپكەر قالادا جۇمىسىن باستاعان ارنايى كەڭسەدە ونى زاڭداستىرۋعا مۇمكىندىك الدى.

«جەكە كاسىپكەرلەرگە جەڭىلدىك بولدى. سالىق ورگانىنا بارماي-اق، وسى جۇمىسقا جىلجىمالى «ءموبيلدى كەڭسە» كەلىپ، تۇگەل كاسسالىق اپپاراتتاردى، قۇجاتتاردى اكەلىپ، تىركەپ، سودان كەيىن ءبارىن ءتۇسىندىرىپ بەردى»، – دەدى كاسىپكەر مامەتجان يتاكوۆ.

الىپ شاھارداعى بازارلاردا 15 مىڭنان استام كاسىپكەر قىزمەت ەتىپ جاتىر. سونىڭ 10 مىڭعا جۋىعى ونلاين كاسسالىق اپپاراتىن پايدالانبايدى. سەبەبى، 4 مىڭنان استامى پاتەنت بويىنشا جۇمىس ىستەيدى. كەلەسى جىلدىڭ 1 قاڭتارىنا دەيىن ونى ورناتپاعان جاعدايدا 15 ايلىق ەسەپتىك كورسەتكىش كولەمىندە، ياعني 36 مىڭ تەڭگە ايىپپۇل سالىنادى.

«الماتى قالاسى اكىمدىگىمەن بىرلەسكەن ءىس-قيمىل جوسپارى بەكىتىلدى. سونىڭ ىشىندە، جەرگىلىكتى بيۋدجەتتەن قاراجاتتار ءبولىندى. 3 اۆتوكولىگى شاعىن اۆتوبۋسى بەرىلىپ جاتىر. ولار ءبىرىنشى كەزەكتە الاتاۋ مەن جەتىسۋ اۋداندارىندا ورنالاسادى»، – دەدى الماتى قالاسى مەملەكەتتىك كىرىستەر دەپارتامەنتى ءتۇسىندىرۋ جۇمىسى باسقارماسى ءبولىمىنىڭ باسشىسى ايجان بەكەيەۆا.

ونلاين كاسسالىق اپپاراتتارى چەكتەگى بارلىق اقپاراتتاردى اۆتوماتتى تۇردە سالىق ورگانىنىڭ دەرەكتەر قورىنا جىبەرىپ تۇرادى. ناتيجەسىندە، كاسىپكەردىڭ تولەيتىن مىندەتتى سالىق مولشەرى ەسەپتەلەدى.

«بۇرىن ەسەپتى سالىق ورگانىنا وتكىزەتىن ەدىك. ەندى ءقازىر بارلىعى ونلاين رەجيمدە جۇرەدى. قاعاز قۇجاتتاردى تولتىرۋدىڭ قاجەتى جوق. وسى وڭاي بولدى»، – دەيدى كاسىپكەر مامەتجان يتاكوۆ.

«باقىلاۋ كاسسالىق اپپاراتىندا فيسكالدى جادى بولاتىن. ماشينا ىستەن شىققان جاعدايدا، ۇرلانىپ نەمەسە جوعالىپ كەتسە، ساقتالعان دەرەكتەر قالپىنا كەلتىرىلمەيتىن. ال ونلاين كاسسالىق اپپاراتىنىڭ ارتىقشىلىعى، ونىڭ فيسكالدى جادىمەن قوسا، «قازاقتەلەكوم» كومپانياسى جۇيەسىندە جەكە كابينەتى بولادى. سول ارقىلى بارلىعىن قالپىنا كەلتىرە الاسىز. وعان قوسا، كاسىپكەردى تىركەۋدەن شىعارىپ، سالىق ەسەبىن تاپسىرۋعا مۇمكىندىك بار»، – دەدى كاسسالىق اپپاراتتار بويىنشا قىزمەت كورسەتەتىن كومپانيا باسشىسى مادينا كۋبالدييەۆا.

ءقازىر قالادا 58 بازار جۇمىس ىستەيدى. ونىڭ باسىم بولىگى الاتاۋ جانە جەتىسۋ اۋدانىندا شوعىرلانعان. مۇنداي «ءموبيلدى كەڭسە» قاجەتتىلىك بويىنشا قالعان ساۋدا ورىندارىنا دا شىعاتىن بولادى.