الماتى قالاسىنىڭ اكىمدىگى قوعامدىق كولىكپەن ءجۇرۋ اقىسىن كوبەيتۋ تۋرالى تاسىمالداۋشىلاردىڭ ۇسىنىسىنا جاۋاپ بەردى.
«الماتى قالاسىنىڭ جولاۋشىلار كولىگى جانە اۆتوموبيل جولدارى باسقارماسى ۋاقىتىلى ءبولىنىپ جاتقان سۋبسيديالار كولەمى كولىكتىك قىزمەتتەردى ساپالى كورسەتۋ ءۇشىن جەتكىلىكتى دەپ سانايدى. سوندىقتان كەيبىر تاسىمالداۋشىلاردىڭ ءتاريفتى كوتەرۋ قاجەتتىگى تۋرالى وتىنىشتەرى نەگىزسىز. ادامدار شاعىم كەلتىرمەيتىندەي اۋەلى ءتارتىپ ورناتىپ، ساپاسىن كوتەرسىن، سوسىن سۇراسىن. ءبىز ءۇشىن باستى كورسەتكىش - قالا تۇرعىندارىنىڭ قاناعاتتانۋ دەڭگەيى. ءبىراق ونىمەن ءالى دە جۇمىس ىستەۋ كەرەك»، - دەدى باسقارما باسشىسىنىڭ ورىنباسارى ەرلان ءادىلوۆ.
بۇل رەتتە، قوعامدىق تاسىمالداۋلاردىڭ الەۋمەتتىك ماڭىزى ەسكەرىلە وتىرىپ، اكىمدىك ساياساتى كولىك قىزمەتتەرىنىڭ حالىققا قولجەتىمدى بولۋىن قامتاماسىز ەتۋگە باعىتتالعانى اتاپ ءوتىلدى. سوندىقتان تاسىمالداۋشىلارعا قوعامدىق كولىكتى جاڭارتۋ جانە دامىتۋ ءۇشىن قوماقتى قاراجات بولىنۋدە. بۇدان باسقا، قوعامدىق كولىكتەردى قاراجاتتاندىرۋ جول ءجۇرۋ اقىسىن تۇرعىندار ءۇشىن قولجەتىمدى دەڭگەيدە ۇستاپ، حالىقتىڭ الەۋمەتتىك تۇرعىدان وسال توپتارىنا جەڭىلدىك تاريفتەرىن ۇسىنۋعا مۇمكىندىك بەرىپ وتىر.
«قازاقستانداعى «وڭاي» ەلەكتروندىق بيلەتتەۋدىڭ ءبىرىنشى جۇيەسى مول تابىستى «كولەڭكەدەن» شىعارىپ، ونى قالا ەكونوميكاسىنا تارتۋعا مۇمكىندىك بەردى. مىسالى، قازان ايىندا ترانزاكسيالاردىڭ رەكوردتىق سانى جاسالىپ، 2،9 ملرد تەڭگە جينالدى. ال 2016 جىلدىڭ قىركۇيەگىندە نارىق اينالىمى نەبارى 700 ملن تەڭگەنى قۇراعان بولاتىن. وسى اقشانىڭ بارلىعى قايدا كەتتى؟ ۇزاق ۋاقىت بويى 80 تەڭگەلىك تاريف ەلدە ەڭ جوعارى بولىپ، كوپ بولىگى قولما-قول اقشامەن تولەنگەن. الماتىداعى جولاۋشىلار لەگىنىڭ باسقا قالالارعا قاراعاندا بىرنەشە ەسە كوپ بولۋىن دا ەسەپكە الۋىمىز كەرەك. بۇگىندە اقشاسىز تولەم جاساۋدىڭ ۇلەسى 98 پايىزدان اسىپ وتىر. ياعني جاڭا سيفرلىق شەشىمدەر سالانى «كولەڭكەدەن» شىعارىپ، اۆتوبۋس پاركىنىڭ جاڭارتىلۋىن جىلدامداتتى. بۇگىندە 1098 اۆتوبۋس ساتىپ الىنعان. جىل سوڭىنا دەيىن جاڭا قوعامدىق كولىك ۇلەسىن 87 پايىزعا دەيىن جەتكىزۋ جوسپارلانىپ وتىر. تاسىمالداۋشىلار ءتاريفتىڭ اشىقتىعى ارقىلى بانكتەن نەسيە الىپ، وزدەرىنىڭ كولىك پاركتەرىن دامىتۋعا قاراجات الاتىن ەدى»، - دەپ ءتۇسىندىردى اكىمدىكتىڭ رەسمي وكىلى تيمۋر بازاربايەۆ.
