الماتىدا دىنمۇحاممەد قونايەۆ اتىنداعى تۇڭعىش مەشىت اشىلدى. اللا ءۇيى الاتاۋ اۋدانىنا قاراستى اقبۇلاق شاعىن اۋدانىندا بوي كوتەرگەن.

قۇرىلىسى 2014 جىلى باستالعان مەشىت قونايەۆ اتىنداعى «ساۋاپ» قوعامدىق-قايىرىمدىلىق قورىنىڭ قولداۋىمەن تۇرعىزىلدى. سونداي-اق، عيباداتحانانى سالۋعا قاراپايىم تۇرعىنداردان باستاپ، قالتالى كاسىپكەرلەرگە دەيىن ۇلەس قوسقان.

ءبىر مەزەتتە 2 مىڭ 200 ادام قۇلشىلىق ەتەتىن قوس قاباتتى بۇل نىساندى سالۋعا 180 ميلليون تەڭگە جۇمسالىپتى. جاڭا مەشىت الماتىنىڭ ورتالىق مەشىتىنەن كەيىنگى ەكىنشى ۇلكەن ءمىناجات ءۇيى. مۇناراسىنىڭ بيىكتىگى 29 مەتردى قۇراسا، جالپى اۋدانى – 1 600 شارشى مەتر.  

«يمامدار بولمەسى، ايەلدەر بولمەسى، وقۋ زالى جانە 500-600 ادام سىياتىن استىڭعى قاباتى بار. استىڭعى قاباتتا ءبىلىم الامىن دەۋشىلەرگە جەكە سىنىپ قاراستىرىلعان. ءقازىردىڭ وزىندە مۇندا ءبىلىم الىپ جاتقان كىشكەنتاي بۇلدىرشىندەرىمىزدىڭ جانە ۇلكەن قاريالارىمىزدىڭ سانى وتە كوپ. ءبىلىم الىپ جاتقان 40-50 شاقتى ادام بار»، – دەدى د.قونايەۆ اتىنداعى مەشىتتىڭ ۇستازى تالعات ءابدىرازاق.

ءتورت مۇناراسى الىستان كوزگە تۇسەتىن مەشىتتىڭ اشىلۋ سالتاناتىنا جينالعان جۇرتتا ەسەپ جوق. اراسىندا دىنمۇحامەد قونايەۆتىڭ كوزىن كورگەندەر دە بار ەكەن. ولار قالاعا ەرەكشە كورىك بەرىپ تۇرعان بۇل اللا ءۇيى جاستارعا رۋحاني تاربيە بەرەتىن، تەڭدەسسىز ورىن ەكەنىن تىلگە تيەك ەتتى.

ايتا كەتەيىك، بۇل – قالادا بوي كوتەرگەن 50ء-شى مەشىت. ءقازىر الماتىدا تاعى 4 مەشىتتىڭ قۇرىلىسى ءجۇرىپ جاتىر.