الماتىدا تۇرعىنداردى تەگىن تاماقتاندىراتىن «ۋاقىپ» اسحاناسى اشىلدى. تۇرمىسى تومەن تۇرعىندار ءۇشىن تاماقتانۋ ورنى اپتانىڭ 5 كۇنىندە جۇمىس ىستەيدى. ورتالىق مەشىت قىزمەتكەرلەرىنىڭ ايتۋىنشا، بۇل جەردىڭ جۇمىسى جىل ون ەكى اي توقتامايدى.
تەگىن اسحانادان تۇستەنۋگە كەلگەن جاننىڭ ءبىرى – ەرعالىم ءادىلحان ۇلى. كەزىندە جۋرناليستيكا ماماندىعىن ءبىتىرىپ، تالاي باسپا ءسوز بەتىنە ماقالام شىققان دەيدى. الايدا، تاعدىر تالكەگىنە تۇسكەن ازامات ۋاقىتشا قيىن جاعدايدا جۇرگەنىن ايتادى. قاراشانىڭ قارا سۋىعىندا اقىسىز تاماق تاراتاتىن ورىننىڭ اشىلعانىنا قۋانعانىن جاسىرمادى.
«ادامداردىڭ جاعدايلارى ءار ءتۇرلى عوي. باسقا سالعان ءومىردىڭ تاۋقىمەتى... راحمەتىمدى ايتامىن ەندى، جاۋراعان كەزدە ءبىر ىستىق تاماق ءىشىپ الدەنىپ العان جاقسى عوي. مۇندايدى باسقا سالماسىن»، – دەيدى ەرعالىم ءادىلحان ۇلى.
«ۋاقىپ» اسحاناسىنا تاماقتانۋعا كەلگەندەر اراسىندا بالالى ايەلدەر مەن مۇگەدەك جاندار كوپ. بۇل ورىننىڭ ماقساتى دا سول – جەتىم-جەسىر مەن جالعىزباستى انالارعا، جاعدايى تومەن وتباسىلارعا ءسال دە بولسا قولداۋ كورسەتۋ.
مۇندا كۇنىنە 120 ادامعا دەيىن كەلىپ، 3 مەزگىل تاماقتانا الادى. تەك الدىمەن ورتالىق مەشىتتىڭ جانىنداعى «يحلاس» قايىرىمدىلىق قاۋىمداستىعىنان ارنايى تالون الۋ قاجەت.
«جاقىن ارادا الماتى ورتالىق مەشىتىنىڭ ۇيىمداستىرۋىمەن «ۋاقىپ» اسحاناسىن اشۋدى ءجون كوردىك. ءبىر عانا دەمەۋشى كىسى كەلىپ، ءوزىنىڭ ءاتى-جونىن ايتۋدى قۇپ كورمەدى. اپتانىڭ 5 كۇنىندە 3 مەزگىل تەگىن تاماق تاراتىلادى. تالون قارنىم اش، ءبىراق ىستىق تاماق ىشۋگە مۇمكىندىگى جوق كەز كەلگەن جاعدايى تومەن وتباسىعا بەرىلەدى»، – دەدى الماتى قالاسى ورتالىق مەشىتىنىڭ نايب يمامى ەرمەك كوكىرەكبايەۆ.
تەگىن تاماقتاناتىن اسحانا سەيفۋللين داڭعىلى مەن راديششيەۆ كوشەسىنىڭ قيىلىسىندا ورنالاسقان. بۇل جەرگە كۇنىنە ءبىر رەت كەلىپ اۋقاتتانعان ادامنىڭ سول كۇنى قايتا كەلىپ، تاماق جەۋىنە شەكتەۋ جوق. تەك قولىندا ارنايى تالونى بولسا، جەتكىلىكتى.
