فرانسيا پرەزيدەنتى حالىقتىڭ ءال-اۋقاتىنىڭ تومەندەپ كەتۋىن ۇكىمەتتەن نەمەسە حالىقتىڭ وزىنەن كورگەن جوق. بار جاۋاپكەرشىلىكتى ءوز موينىنا الدى.  

پرەزيدەنتى ەممانۋەل ماكرون جاپپاي نارازىلىق اكسيالارىنا بايلانىستى تەلەديدار ارقىلى مالىمدەمە جاسادى. حالىق الدىندا سويلەگەن ماكرون ۇكىمەتكە بىرنەشە تاپسىرما بەردى. العاشقىسى، قاڭتاردان باستاپ ەڭ تومەنگى جالاقىنى 100 ەۋروعا كوبەيتۋ، ءارى قىزمەت ۋاقىتىنان تىس جۇمىس ىستەگەندەرگە سالىق سالماۋ.

سونىمەن قاتار، پرەزيدەنت تومەن جالاقى الاتىندار مەن زەينەتكەرلەرگە سالىق سالماعىن سالماۋعا ۋادە ەتتى.

ماكرون «سارى جيلەتتەگى» شەرۋشىلەردىڭ نارازىلىعىن ەسكەرىپ، فرانسۋزداردىڭ ءال-اۋقاتىنىڭ تومەندەپ كەتۋىنىڭ جاۋاپكەرشىلىگىن ءوز موينىنا الدى. الايدا پوليسەيلەرگە شابۋىل جاساعانداردى قاتاڭ سىنادى.

7 قاراشادان بەرى فرانسۋزدار كۇندىز كۇلكىدەن، تۇندە ءتاتتى تىنىش ۇيقىلارىنان ايىرىلعان. بۇكىل رەسپۋبليكانى كوتەرىلىس ءورتى شارپىدى. ءبىر انىعى – فرانسۋزداردىڭ شىدامى شەگىنە جەتكەن. بۇل سوڭعى ون جىلداعى ەڭ اۋقىمدى حالىق نارازىلىعى بولعالى تۇر. شەتەلدىك باسىلىمداردىڭ دەرەكتەرىنە سەنسەك، بۇگىنگى كۇنى 110 ادام جاراقات العان. ونىڭ  20-ى پوليسيا قىزمەتكەرلەرى. 260 ادام تەمىر تورعا قامالىپتى. اقپاراتتى جەتكىزۋدى وزىنە مىندەت ەتكەن 12 جۋرناليست زارداپ شەككەن.

ال شەرۋدىڭ بولۋ سەبەبى حالىق «سابىر ءتۇبى – سارى التىن» دەۋدەن جالىقتى. وسى ۋاقىتقا دەيىن كوپ نارسەگە كوز جۇمىپ كەلگەن فرانسۋزدار مەملەكەتتىك ساياساتقا تۇسىنىستىكپەن قاراۋدان شارشادى. جانارماي باعاسىنىڭ كوتەرىلۋى جىعىلعانعا جۇدىرىق بولدى. اشۋ مەن ىزاعا بۋلىققان فرانسۋزدار تۇرعىندارعا قولايلى جاعداي جاسامايتىن مەملەكەتتىك ساياساتقا وسىلايشا نارازىلىق ءبىلدىردى.