«زەكەت» قورىنىڭ «ەل ۇلەسى پاتەرگە» اتتى جوباسى ەندى الماتىداعى كومەككە ءزارۋ وتباسىلارعا جاردەم بەرۋگە دايىن. بۇعان دەيىن قاراعاندى، كوكشەتاۋ قالاسىندا ءوز جۇمىسىن باستاعان قايىرىمدىلىق قورى الەۋمەتتىك تۇرمىسى تومەن جاندارعا جاعداي جاساماق. قايىرىمدىلىق جوبادان قالاي كومەك الۋعا بولادى؟ ونى كىمدەر ۇلەستىرىپ جاتىر؟
تەمىرحانوۆتار وتباسى الماتىعا وسىدان 12 جىل بۇرىن شىمكەنت قالاسىنان كوشىپ كەلگەن. سودان بەرى تار ۇيدە تىرشىلىك ەتىپ جاتىر. ءتىپتى، اياداي بولمەگە سىيىسپاعان سوڭ تۇڭعىشتارىن تانىستارىنىڭ ۇيىنە تۇرعىزۋعا ءماجبۇر بولعان. ونىڭ ۇستىنە، بۇلدىرشىندەردى مەكتەپتەگى سىنىپتاستارى دا كەمسىتەتىن كورىنەدى.
«وسى جەردە رۋحتى بولعىم كەلەدى»، – دەيدى سىمبات تەمىرحانوۆا.
«مەن ۇلكەن ءۇيىم بولعانىن قالايمىن. سىنىپتاعى بالالار مەنى مازاقتايدى. «سەن كۆارتيرادا تۇراسىڭ» دەيدى. مەن ءوز ءۇيىم بولعانىن قالايمىن. مەنى بارلىعى اراسىنا قوسپايدى، سىنىپتاستارىم كەدەيسىڭ دەپ كەمسىتەدى»، – دەيدى كوز جاسىنا ەرىك بەرگەن جەتكىنشەك گۇلناز سەيفۋللايەۆا.
بۇل وتباسى وسىعان دەيىن كومەك سۇراپ تالاي جەردىڭ تابالدىرىعىن توزدىرىپتى. سەگىز بالانىڭ تاربيەسىمەن جۇمىسقا شىعا المايتىن انا جۇبايىنىڭ جالاقىسى تەك پاتەر جالداپ تۇرۋعا عانا جەتەدى دەيدى. ءتىپتى، كوپ بالامەن جالعا ءۇي تابۋدىڭ ءوزى مۇڭ ەكەن. وسىدان ءبىر اپتا بۇرىن «ەل ۇلەسى پاتەرگە» جوباسىنا بارىپ جاعدايىن ءتۇسىندىرىپ، ءوتىنىشىن قالدىرعان.
«قازاقستان مۇسىلماندارى ءدىني باسقارماسىنا، اتالمىش زەكەت قورىنا راحمەت ايتقىم كەلەدى. جاردەم سۇراپ بارعان ەدىم. «قولىمىزدان كەلگەنشە كومەكتەمەسىز، قاراسامىز» دەدى. مىنە، ايتۋلى كۇنى بىردەن كەلىپ وتىر. العىسىم شەكسىز»، – دەپ ريزاشىلىعىن ءبىلدىردى كوپبالالى انا گۇلجامال سەيفۋللايەۆا.
2011 جىلدان باستاۋ العان جوبا بيىل الماتىدا ىسكە اسىرىلۋدا. وسى ۋاقىتقا دەيىن ەلىمىزدىڭ باسقا وڭىرلەرىندە كوپشىلىكتىڭ كومەگىمەن 5 وتباسىنا پاتەر كىلتىن تابىستاسا، قالامىزدا جىل باسىنان باستاپ 2 مىڭ وتباسىن قارجىمەن، ازىق-تۇلىك، كيىممەن قامتاماسىز ەتىپ ۇلگەرگەن.
«ءبىز سونداي وتباسىلارعا بارىپ، راسىمەن مۇقتاج با، جوق، تەكسەرىپ الامىز. كەيىن ازىق- تۇلىكتەي، كيىم كەشەكتەي كومەك كورسەتەمىز، قىستا كومىر جاعاتىن بولسا كومىر، وتىنىن الىپ بەرەمىز. ءۇي كەرەك دەسە، ءۇي دە الىپ بەرەمىز. ءۇيى بىتپەي جاتسا، قۇرىلىس ماتەريالدارىن جەتكىزىپ بەرەمىز. جەر تەلىمىن دە الىپ بەرەمىز. جالپى، قانداي قايىرىمدىلىقتىڭ ءتۇرى بولاتىن بولسا، سونىڭ بارلىعىن كورسەتەمىز»، – دەدى قمدب «زەكەت» كورپوراتيۆتىك قورىنىڭ ۇيلەستىرۋشى باس مامانى نۇركەن ءدىلمۇحان.
جوبانىڭ باستى ماقساتى – مۇقتاج جانداردى تۇرعىن ۇيمەن قامتاماسىز ەتۋ. قوردىڭ قىزمەتى اشىق، ايقىن جانە تۇسكەن قاراجات بويىنشا قايىرىمدىلىق كورسەتۋشىنىڭ سۇراۋىنا وراي كەز كەلگەن ۋاقىتتا جاردەم كورسەتىلەدى.
