الماتىدا تاعى ءبىر ساياباق اعىمداعى جوندەۋدەن وتەدى. ناتيجەسىندە، دەمالىس ورنىندا بالالارعا جانە سپورتقا ارنالعان قوس الاڭ، يتتەردى قىدىرتاتىن بولەك جەر قاراستىرىلماق. جەرگىلىكتى اكىمدىك ساياباقتى جوندەمەس بۇرىن حالىقتىڭ تالاپ-تىلەگىن ەسكەرگەن.

الماتىدا حح عاسىردىڭ ۇلى ساياساتكەرى ماحاتما گاندي اتىنداعى ساياباق وسىدان 5 جىل بۇرىن جوندەۋدەن وتكەن. حالىقتىڭ سۇيىكتى دەمالىس ورنىن ودان سايىن جاقسارتۋ ماقساتىندا بيىل تاعى دا قالىپقا كەلتىرۋ جۇمىستارى ءجۇرىپ جاتىر. اينالاسى ءبىر ايدىڭ ىشىندە مۇندا 9 مىڭنان اسا شارشى مەتر جول تەگىستەلىپ، 8 مىڭعا جۋىق جەرگە گازون ەگىلەدى. جاسىل جەلەكتى سۋارۋ جۇيەسى جاڭالانادى.

ساياباققا ءجيى كەلەتىن تۇرعىندار دا جوندەۋ جۇمىستارىنىڭ قولعا الىنىپ جاتقانىنا رازى. مىسالى، ءبىز سوزگە تارتقان تۇرعىن: «بۇل جەردە 21 جىلدان بەرى تۇرامىز. ساياباق كۇننەن كۇنگە جاقسارىپ كەلە جاتىر. بۇرىن بۇل جەردە ەشتەڭە بولماعان ەدى، بىرتىندەپ جاقسارا باستادى. بيىل ءتىپتى جاقسارىپ كەلەدى»، دەسە، تاعى ءبىرى: «بۇل جەردە ادام كوپ كەلەدى، سپورتپەن اينالىساتىندار دا جەتەرلىك. دەمالىپ كەلۋشىلەر دە، بالالارىن ويناتۋ ءۇشىن كەلەتىندەر دە كوپ. ءبارى قۋانىپ قالاتىن بولدى»، – دەپ قۋانىشتى كوڭىل كۇيلەرىمەن ءبولىستى.

ساياباقتا تۇنگى ۋاقىتتا قىدىرۋ بارىنشا ءقاۋىپسىز بولۋى ءۇشىن قوسىمشا 180 جارىق شامى ورناتىلادى. بالالار وينايتىن الاڭقاي جانە جاتتىعۋعا ارنالعان الاڭ سالىنادى. سونداي-اق، ارنايى يت قىدىرتاتىن 120 شارشى مەترلىك ورىن دا جاسالادى.

«قازىرگى تاڭدا ماحاتما گاندي اتىنداعى ساياباقتا جوندەۋ جۇمىستارى ءجۇرىپ جاتىر. اۋدان حالقىنىڭ سۇراۋىمەن، يتتەردى قىدىرتاتىن ورىن قاراستىردىق. ەندى ءۇي جانۋارلارى ارنايى بولىنگەن اۋماقتا عانا جۇرەدى. ول جەردە ءتيىستى جاعدايلار جاسالادى»، – دەدى الماتى قالاسى المالى اۋداندىق كورىكتەندىرۋ ءبولىمىنىڭ باسشىسى اكىمحان تولەگەن.

ماماندار ساياباقتى قايتا جوندەۋ كەزىندە 720 اعاشتى سانيتارلىق قىرقۋدان وتكىزگەن. تاعى 20-دان استام قىلقانجاپىراقتى تال ەگۋدى جوسپارلاپ وتىر. ساياباقتى جوندەۋگە 50 شاقتى جۇمىسشى اتسالىسۋدا.

«كىشكەنتاي بالالار وينايتىن الاڭداردىڭ ءبارىن ءبىر جەرگە ىڭعايلى ەتىپ توپتاستىرىپ جاتىرمىز. سپورت الاڭىمىز بار. سپورتتىق باعدارلاما بويىنشا سالىنعان ەسكى الاڭداعى قۇرىلعىلاردىڭ ءبارى ءوز ورنىندا تۇر. تەك سىنعان، مايىسقان تۇستارىن جوندەپ، قايتادان ورنىنا قويىپ جاتىرمىز. 4 ورىندىقتى ساكىلەر قويامىز. ولارعا ەكى جاقتان وتىرۋعا ىڭعايلى بولادى»، – دەدى مەردىگەر مەكەمەنىڭ ديرەكتورى ەركەبۇلان ايىمبەتوۆ.

ۇنەمدىلىك ءۇشىن مۇنداعى ەسكى بورديۋرلەر قوقىسقا تاستالمايدى. قايتا ىسكە جارامدى بولعاندىقتان، ءدال وسى ساياباقتاعى جولدارعا توسەلمەك. سونداي-اق، مۇنداعى 60 شاقتى وتىرعىش جاڭارتىلعان سوڭ، ەسكىلەرى قاجەتتىلىككە قاراي باسقا جەرلەرگە قويىلادى. ال جوندەۋ جۇمىستارى قاراشا ايىنىڭ سوڭىندا اياقتالادى.