الماتىنىڭ اۋەزوۆ اۋدانىندا زاڭسىز تۇرعان قوس دۇڭگىرشەكتىڭ كوزى جويىلدى. نىسانداردى قوجايىندار ءوز ەرىكتەرىمەن ءسۇردى.

جەرگىلىكتى اۋدان اكىمدىگىنىڭ قىزمەتكەرلەرى كاسىپ يەلەرىنە الدىن الا تۇسىندىرمە جۇمىستارىن جۇرگىزگەن. كەيىن ولار وزدەرى ءسۇرىپ تاستاۋعا نيەت ءبىلدىرىپتى. جالپى، زاڭسىز ورناتىلعان نىسانداردى جويۋ جۇمىستارى تۇراقتى تۇردە جۇرگىزىلەدى.

«اۋدان اۋماعىندا مونيتورينگ جۇرگىزىپ، 50-گە جۋىق زاڭسىز ورناتىلعان نىساندار انىقتالدى. سول زاڭسىز ورناتىلعان نىسانداردى بۇزۋ جۇمىستارى جۇرگىزىلىپ جاتىر. مىسالى، «اقساي» ىقشاماۋدانىندا 2 دۇڭگىرشەك يەسىنە ەسكەرتۋ جاسالعاندىقتان، بۇگىن 2 دۇڭگىرشەكتى ءوز ەرىكتەرىمەن يەلەرى الىپ كەتتى. ءيا، كوبىنەسە ءوز يەلەرى كەلىسىم بەرەدى. ءوز ەركىلەرىمەن الىپ كەتەدى»، – دەيدى الماتى قالاسى اۋەزوۆ اۋداندىق كاسىپكەرلىكتى جانە ونەركاسىپتى دامىتۋ ءبولىمىنىڭ باس مامانى قۋانىش قۇرمانعالييەۆ.

ايتا كەتەيىك، جىل باسىنان بەرى اۋەزوۆ اۋدانىندا زاڭسىز قويىلعان 300-دەن استام نىساندى كاسىپ يەلەرى وزدەرى سۇرگەن. بۇزىلعان ساۋدا ورىندارىنىڭ باسىم بولىگى «كار سيتي» جانە «سايران» اۆتوبەكەتى ماڭىندا ورنالاسقان.