قوقىس تاستاعاندا ساق بولىڭىز! ىستەن شىققان ۇيالى تەلەفون، توڭازىتقىش پەن نوۋتبۋكتاردىڭ قايتا وڭدەۋدەن وتكىزىلمەگەن قالدىقتارى قورشاعان ورتاعا عانا ەمەس، ءسىزدىڭ دەنساۋلىعىڭىزعا دا ۇلكەن ءقاۋىپ توندىرەدى. سوندىقتان ەلەكتروندى قالدىقتاردى تاستاۋ ءۇشىن الماتىعا 32 كونتەينەر ورناتىلدى.

6-سىنىپ وقۋشىسى جانەل اسحات بۇگىن مەكتەپ اۋلاسىندا تۇرعان كونتەينەرگە جارامسىز بولىپ قالعان ەلەكتروندى قالدىقتارىن اكەپ تاستادى. ايتۋىنشا، ەكوبوكسقا بۇعان دەيىن دە ۇيىندەگى ىستەن شىققان تالاي تۇرمىستىق تەحنيكانى تاستاعان.      

«مەن بۇگىن ۇيالى تەلەفون جانە باسقا دا ەلەكتروندى قوقىستاردى اكەپ تاستادىم. ولاردىڭ وتە زياندى ەكەنىن ءبىز حيميا پانىنەن وتكەنبىز. ءبىز وتباسىمىزبەن ءبىر اپتا ىشىندە جالپى سالماعى 20 كەلىنى قۇرايتىن جارامسىز ەلەكتروندى زاتتاردى الىپ كەلدىك»، – دەيدى جانەل اسحات.

مەگاپوليستە ەلەكتروندى قالدىقتارعا ارنالعان كونتەينەرلەردى ورناتۋ جوباسى قىركۇيەك ايىندا باستالعان. ەكوبوكستارعا ۇيالى تەلەفون، زاريادتاۋ قۇرىلعىلارىنان بولەك، ەسكى تەلەديدار، ماگنيتوفون، ەلەكترلىك ويىنشىقتار مەن ىستەن شىققان ۇتىك، كومپيۋتەر، پلانشەتتەردى تاستاۋعا بولادى.

كونتەينەر تولعان سوڭ ونىڭ ىشىندەگى قوقىستىڭ سالماعىن ولشەپ، ارى قاراي وڭدەۋ بازاسىنا اكەتەدى. الدىمەن ەلەكتروندى قالدىقتىڭ پلاستماسساسى مەن مەتالى قولمەن اجىراتىلادى. سودان سوڭ مەتالدى بولەك جيناپ، پلاستيكتى مايدالايدى. ءارى قاراي قالدىقتار قايتا وڭدەۋگە كەتەدى.

ەكولوگتاردىڭ ايتۋىنشا، بارماقتاي عانا باتارەيانىڭ ءبىر داناسىن «قاتە» پايدالانعان جاعدايدا، 20 تەكشە مەتر توپىراق نەمەسە 400 ليتردەن استام اۋىز سۋ ۋلانادى ەكەن. ال ادام اعزاسىنا زيانى ودان كوپ دەيدى ماماندار.

«تەمپەراتۋرا ىلعال دەيمىز عوي جانە كۇن ساۋلەسى، سونىڭ ءبارى تەك تىرشىلىك يەلەرىنە  عانا ەمەس، تەحنيكاعا دا اسەر ەتەدى. ول تەحنيكا جۇمىس ىستەمەيتىن بولسا ءوزىنىڭ زياندى قوسپالارىن شىعارا باستايدى. كەيبىرەۋلەر ونداي قالدىقتار ءبارىبىر قوقىس پوليگونىنا كەتەدى، وڭدەۋدىڭ نە قاجەتى بار دەپ جاتادى. الايدا، سول زياندى زاتتاردىڭ ءبارى جەرگە ءسىڭىپ كەتەتىنىن ەسكەرۋىمىز كەرەك. توپىراق ارقىلى سۋعا دا تارالادى»، – دەدى «پرومتەحنورەسۋرس» ج ش س قىزمەتكەرى پاكيزات سايلاۋبەكوۆا.

ءقازىر الماتىدا ەلەكتروندى قالدىقتارعا ارنالعان 30-دان استام كونتەينەر بار. ونىڭ 29-ى قالا مەكتەپتەرىنە قويىلعان. ەندى قاراشانىڭ سوڭىنا دەيىن تاعى 50 مەكتەپكە وسىنداي كونتەينەرلەر ورناتىلماق.

عالىمداردىڭ بولجامى بويىنشا، زاماناۋي تەحنولوگيالار مەن گادجەتتەرگە تاۋەلدىلىك ارتقان سايىن، ولاردى تۇتىنۋ كوەففيسيەنتى وسە بەرمەك. ال ەلەكتروندى قالدىقتاردى قايتا وڭدەۋ قورشاعان ورتا ءۇشىن دە ەل ەكونوميكاسىنا دا ءتيىمدى بولماق.