الماتىدا داڭقتى مانەرلەپ سىرعاناۋشى دەنيس تەننىڭ قۇرمەتىنە ەسكەرتكىش تاقتا ءىلىندى. سالتاناتتى راسىمگە كەزىندە سپورتشىنى قاجىر-قايراتىمەن باۋلىعان جاتتىقتىرۋشىسى، سسرو-نىڭ ەڭبەك سىڭىرگەن سپورت شەبەرى تاتيانا تاراسوۆا ارنايى كەلدى. الەمگە ايگىلى باپكەر تالانتتى شاكىرتى تۋرالى ەستەلىكتەرىمەن ءبولىسىپ، دەنيستىڭ قازاقستاندى دۇنيەجۇزىنە تانىتقان ۇلى تۇلعا ەكەنىن ايتتى. سونداي-اق، بۇگىن «مۇز كورولى» اتانعان سپورتشى اتىنداعى قوعامدىق قور ءوز جۇمىسىن باستادى.
قاپىدا قازا تاۋىپ، بۇكىل قازاقستاندىقتاردىڭ قابىرعاسىن قايىستىرعان دەنيس تەننىڭ ەسىمىن ماڭگى ەستە قالدىرۋ ءۇشىن بۇگىن سپورتشىنىڭ قۇرمەتىنە ەسكەرتكىش تاقتا قويىلدى. مەموريالدىق تاقتايشا نازاربايەۆ داڭعىلىنداعى مانەرلەپ سىرعاناۋشىنىڭ ءوزى تۋىپ-وسكەن ءۇيىنىڭ تۋرا الدىنا ورناتىلدى. سالتاناتتى شاراعا دەنيستىڭ جاقىندارىنان باستاپ، ونىڭ ونەرىنە باس يەتىن جانكۇيەرلەرى كوپ جيىلدى. ال دەنيس تەننىڭ جاتتىقتىرۋشىسى بولعان، سسرو-نىڭ ەڭبەك سىڭىرگەن سپورت شەبەرى تاتيانا تاراسوۆا مەن تانىمال مانەرلەپ سىرعاناۋشى ەلەنا راديونوۆا رەسەيدەن ارنايى كەلدى. داڭقتى باپكەر گۇل شوقتارىن قويىپ، دەنيستى كوزىنە جاس الىپ ەسكە الدى.
«ول – ۇلى ادام. تۋعان جەرىن ەشبىر مەملەكەتكە ايىرباستاماي، وسى ەلدىڭ داڭقىن شىعارعىسى كەلدى. وكىنىشكە قاراي، ءوزى جاقسى كورگەن ەلىندە ءولىم قۇشتى. ونىڭ ونەرىن تاماشالاعان ميلليونداعان ادام كارتادان قازاقستان دەگەن ەلدى ىزدەدى. قازاقستاننىڭ قايدا ورنالاسقانىن بارلىعى بىلە بەرمەيتىن. دەنيس ارقىلى كوپشىلىگى وسى ەل جايىندا بىلگەنى – شىندىق. ول حالقىنىڭ داڭقتى ۇلى. ماعان ونىمەن جۇمىس ىستەۋ باقىتى بۇيىردى. كوپ شاكىرت تاربيەلەسەم دە، ەشكىم دەنيستىڭ ورنىن باسا المايدى. ويتكەنى، ول وتە ەرەكشە ادام بولدى»، – دەدى سسرو ەڭبەك سىڭىرگەن باپكەرى تاتيانا تاراسوۆا.
راسىمەن دە دەنيس تەندى كوپشىلىك سان قىرىنان بىلەدى. ول ءتۇرلى دودالاردا كوك بايراعىمىزدى جەلبىرەتىپ، ميلليونداعان حالىقتىڭ كوكەيىنە ماقتانىش سەزىمىن ۇيالاتقان ءبىرتۋار جان ەدى. سويتە تۇرا قاراپايىمدىلىعىن ساقتاپ، كىشىپەيىل كۇيىندە ەل ەسىندە قالدى. قازاقستاندا مانەرلەپ سىرعاناۋ سپورتىن دامىتىپ، ونەردىڭ وسى تۇرىنە جۇرتشىلىقتىڭ قىزىعۋشىلىعىن وياتۋ ءۇشىن ايانباي ەڭبەك ەتتى.
«– دەنيس تەندى مەن وليمپياداعا قاتىسقان كىشكەنتاي كەزىنەن بىلەمىن. مەن ونىڭ تابىنۋشىسى بولعانمىن. قايعىلى جاعدايدى ەستىگەندە قاتتى جانىم اۋىردى، ونىڭ جوق ەكەنىنە ءالى كۇنگە دەيىن سەنبەي ءجۇرمىن...
– دەنيس تەن مەن ءۇشىن، ءبارىمىز ءۇشىن ناعىز قاھارمان! ول بارىمىزگە ۇلگى بولا ءبىلدى...
- بالۋان شولاق اتىنداعى سارايدا وتكەن شىعارىپ سالۋ راسىمىنە جينالعان حالىقتى كورىپ، دەنيس تەننىڭ قانشاما حالىقتىڭ جۇرەگىندە ەكەنىن كوردىم، ونىڭ بىزبەن ماڭگى بىرگە بولاتىنىنا سەندىم...»، – دەپ تەبىرەنەدى شاراعا ارنايى كەلگەن قالا تۇرعىندارى.
بۇعان قوسا، بۇگىن دەنيس تەن اتىنداعى قوعامدىق قوردىڭ كەڭسەسى اشىلدى. وندا مانەرلەپ سىرعاناۋشىنىڭ كوزى تىرىسىندە اياقسىز قالعان بارلىق جوبالارى جۇزەگە اسىرىلادى. دەنيستىڭ اندەرى، كينوعا جازىلعان سەنارييلەرى جارىققا شىعادى. ەڭ باستىسى، دەنيستىڭ باستى ارمانى – قازاقستانداعى جاس مانەرلەپ سىرعاناۋشىلاردىڭ دامۋىنا جاعداي جاسالادى. قور قىزمەتكەرلەرى الەمگە ايگىلى سپورت شەبەرلەرىن شاقىرىپ، جاستارعا شەبەرلىك ساباقتارىن ۇيىمداستىرماق. رەسەيلىك تانىمال سپورت شەبەرلەرى وسىنداي يگى ىسكە ءوز ۇلەستەرىن قوسىپ ۇلگەردى.
«دەنيس ەكەۋىمىز دوس بولدىق. ول ۇنەمى كوڭىلدى جۇرەتىن، قىزىقتى اڭگىمەلەرىن تىڭداي بەرگىم كەلەتىن. وتە جان-جاقتى، بارلىق جاعىنان تالانتتى جان بولدى. سونداي-اق وتە ەڭبەكقور، ءبىلىمدى، مادەنيەتتى جانە كىشىپەيىل ادام ەدى. ونداي ادامدار وتە سيرەك. ونىڭ جارقىن بەينەسى ءبىزدىڭ ەسىمىزدە ماڭگى قالادى. قازىرگى سىرعاناعان قويىلىمىمدى دەنيستىڭ شوۋىندا ورىنداعان ەدىم. ەندى مىنە، دوسىمنىڭ قۇرمەتىنە ارناپ بيلەدىم. ءبىز دەنيس باستاعان جوبالاردى وشىرمەي، ءىسىن جالعاستىرۋعا قولعابىس ەتۋگە دايىنبىز»، – دەدى رەسەيدىڭ مانەرلەپ سىرعاناۋشىسى ەلەنا راديونوۆا.
تۋعان ەلىنىڭ ابىرويىن اسقاقتاتۋ ءۇشىن ماڭداي تەرىن توگىپ، وراسان ەڭبەك ەتكەن، ءبىراق قاپيادا قىرشىنىنان قيىلعان دەنيستىڭ ەسىمىن حالقى ەشقاشان ۇمىتپايدى. وسى رەتتە قالادا تۇراقتى تۇردە ءتۇرلى شارالار وتكىزىلمەك. جەرگىلىكتى اكىمدىك جىل سايىن دەنيس تەن اتىنداعى حالىقارالىق تۋرنير ۇيىمداستىرماق. سونداي-اق كوكتەمدە مانەرلەپ سىرعاناۋشىعا ارناپ ەسكەرتكىش تۇرعىزباقشى. ءقازىر سپورتشىنىڭ اناسىمەن بىرگە بولاشاق ءمۇسىننىڭ ەسكيزى جاسالىپ جاتىر ەكەن.
