«قازبات» باتالونىنىڭ يراكتاعى بىتىمگەرلىك ميسسياسىن اياقتالعانىنا 10 جىل. وسىعان بايلانىستى الماتىدا «يراكتىڭ ورتاق اسپانى استىندا» اتتى فوتوكورمە ۇيىمداستىرىلدى. جەلتوقساندا ەلوردادا كوپشىلىك نازارىنا ۇسىنىلىپ، نۇكتەسى پولشانىڭ گدانسك قالاسىندا قويىلادى.  

كوپشىلىك نازارىنا ۇسىنىلعان 30 فوتوسۋرەت ساربازداردىڭ ەستەلىكتەرىنە تولى. 2003 جىلى ساددام حۋسەيننىڭ بيلىگى جويىلعان سوڭ، حالىقارالىق ۇيىمدار يراكتاعى جاعدايدى تۇراقتاندىرىپ الەك. 4 ءقاۋىپسىز ايماق قۇرىلىپ، ونىڭ وڭتۇستىك-ورتالىق بولىگىندەگى قاۋىپسىزدىكتى «ورتالىق-وڭتۇستىك» ديۆيزياسى ءوز موينىنا الادى. 23 مەملەكەتتىڭ اسكەرلەرى قاتارىندا قازاقستاندىق ساربازدار دا بار.

«سوعىستىڭ اتى سوعىس قوي. ءبىز قاقتىعىس بولىپ جاتقان جەرلەردىڭ ءدال ورتاسىندا بولدىق. ءتىپتى، وق استىندا قالعان كەزدەرىمىز بولدى. ءبىر رەت كۇندىز، ەكىنشىسىندە تۇندە بولدى»، – دەدى 28079 اسكەري بولىمشە كومانديرىنىڭ ورىنباسارى اسقار سماعۇلوۆ.

بۇل فوتوسۋرەتتەردەن ءبىر عۇمىردى بايقاۋعا بولادى. يراكتاعى ارنايى ميسسيا قازاقستاندىق ساربازدار ءۇشىن العاشقى جانە ۇمىتىلماس وقيعا ەكەنى داۋسىز. ولاردىڭ الدىندا تۇرعان مىندەت – جارىلعىشتاردى زالالسىزداندىرىپ، قارۋ-جاراقتىڭ كوزىن جويۋ ەدى. ءدال وسى جەردە، وكىنىشكە قاراي، ءبىر باتىر ەرلىكپەن قازا تاپقان ەكەن.

2005 جىلى 9 قاڭتاردا بىتىمگەرلىك ميسسياسىن ورىنداۋ بارىسىندا كاپيتان قايرات قۇدابايەۆ كەنەتتەن قازا تابادى. ول ءوز دەنەسىمەن جارىلعىش زاتتى جاۋىپ قالىپ، قاتارلاستارىن ولىمنەن امان الىپ قالعان.

«كاپيتان قۇدابايەۆ قايرات ەكەۋمىز ءبىر توپتا بىتىمگەرشىلىك ميسسياسىن ورىندادىق. ول ەلدە ءبىز جارىلماي قالعان جارىلعىش زاتتاردى، مينالاردى تازارتىپ، جەرگىلىكتى حالىققا كومەكتەستىك»، – دەدى قۇرلىق اسكەرلەرى اسكەري ينستيتۋتىنىڭ اعا وقىتۋشىسى ەركەبۇلان ەمبەرگەنوۆ.

سوعىس ۇلت پەن ناسىلگە قارامايدى. قازاقستاندىق ساربازداردان بولەك، مۇندا وزگە مەملەكەتتەردىڭ دە اسكەرلەرى بولعان. پولشانىڭ بىتىمگەر-ارداگەرلەرى اراعا جىل سالىپ، قازاقستاندىق قىزمەتتەستەرىمەن كەزدەستى. سالتاناتتى كەزدەسۋدە ەكى ەلدىڭ اسكەري مارشى ورىندالدى.

«قازاقستاندىق ارىپتەستەرىمەن بىرگە يراكتا بولعان ءبىزدىڭ ساربازدارىمىز الەمگە كومەگىن تيگىزدى دەپ ايتار ەدىم. وسى كورمەنى ارداگەرلەرىمىزگە، باتىرلارىمىزعا ارناي وتىرىپ، «قازبات» ارداگەرلەرىمەن بىرگە 15 جىلدان كەيىنگى كەزدەسۋدى ۇيىمداستىرىپ وتىرمىز»، – دەدى الماتى قالاسىنداعى پولشانىڭ باس كونسۋلى رادوسلاۆ گرۋك.

فوتوكورمەنى استانالىقتار 25 جەلتوقساندا تاماشالاي الادى. ودان كەيىن پولشانىڭ گدانسك قالاسىنداعى ەكىنشى دۇنيەجۇزىلىك سوعىس مۋزەيىنە جول تارتادى.