ALMATY ARENA مەن HALYK ARENA ورتالىق ازيا اۋماعىنداعى تەڭدەسسىز سپورت كەشەندەرى سانالادى. تىپتەن، امبەباپتىعى جاعىنان الەمدە ۇزدىك وتىزدىققا كىرەدى. ساراپشىلاردىڭ پىكىرىنشە، قىستىق جانە جازدىق سپورت تۇرلەرىمەن اينالىسۋعا مۇمكىندىك بەرەتىن زاماناۋي كەشەن كاسىبي عانا ەمەس، اۋەسقوي سپورتشىلاردىڭ كوبەيۋىنە دە مۇمكىندىك بەرەدى.

بۇگىندە اتالعان كەشەندەردە كونكيمەن جاپپاي سىرعاناۋ ماۋسىمى اشىلدى. ال قالا اكىمدىگى بۇل جەرلەر ازدىق ەتپەس ءۇشىن قالانىڭ ءار اۋدانىنان تەگىن كونكي تەبەتىن مۇز ايدىندارىن تاعى دا اشپاق.

اۋماعى 1800 شارشى مەتردى قۇرايتىن ALMATY ARENA ايدىندا جاپپاي سىرعاناۋ تەك سەنبى جانە جەكسەنبى كۇندەرى عانا وتەدى. ساعات 11-دەن تۇنگى 23-كە دەيىن بەس اۋىسىممەن جۇمىس ىستەيتىن ايدىندا كۇنىنە 1250 ادام ەركىن دەمالۋعا مۇمكىندىك بار.

وسىمەن ءۇشىنشى جىل جاپپاي سىرعاناۋ ماۋسىمىن ۇيىمداستىرۋعا دايىندالعان ارەنانىڭ اكىمشىلىگى اۋەسقوي كونكيشىلەردىڭ سانى ارتىپ كەلەدى دەيدى. وتكەن ماۋسىمدا مۇندا 500 مىڭنان اسا ادام اياعىنا كونكي كيىپتى. كوپكە قاجەتتى كونكيدىڭ بارلىق ولشەمىن جاڭالاعان ارەنانىڭ ادامدارى ساپالى قىزمەت كورسەتۋگە سايمىز دەيدى.

بەس اۋىسىممەن جۇمىس ىستەيتىن ايدىننىڭ باعاسى بەس ءتۇرلى. تاڭعى كەستەنىڭ قۇنى 300 تەڭگەدەن باستالسا، كەشكە قىدىرۋ ەرەسەكتەر ءۇشىن 1 500 تەڭگە. ءاربىر ەكى ساعات سايىن ارنايى ماشينا مۇزعا ىستىق سۋ شاشىپ، كريستالدى قاباتىن جاڭالاپ تۇرادى.

«ادامدار بيىل كوپ كەلەدى دەپ ويلايمىز. ءۇش جىلدان بەرى جۇمىس ىستەپ كەلەمىز، حالىق ۇيرەنە باستادى. قاۋىپسىزدىك ءۇشىن 14 جاسقا دەيىنگى بالالاردىڭ باسىن، شىنتاعىن جانە تىزەسىن قورعايتىن ارنايى كيىمدەر كيگىزىپ قانا مۇزعا جىبەرەمىز»، – دەيدى ALMATY ARENA مۇز ايدىنىنىڭ اكىمشىسى دارحان ەگىنبايەۆ.

ال، قالانىڭ شىعىسىنداعى HALYK ARENA كەشەنىندە ءبىر مەزەتتە ەكى سىرعاناق ايدىنى قاتار جۇمىس ىستەيدى. جالپىحالىقتىق جاپپاي سىرعاناۋ تەك سەنبى-جەكسەنبى كۇندەرى بولسا، باسقا كۇندەرى شايبالى حوككەي، مانەرلەپ سىرعاناۋ، كەرلينگ سىندى قىسقى ويىن تۇرلەرىنەن كوماندالار جاتتىعادى.

«مۇنداي مۇز ايدىندار الەمنىڭ بارلىق ەلىندە بار دەپ ايتا المايمىز. ورتالىق ازيا بويىنشا تەڭدەسى جوق. ال، الەم بويىنشا الاتىن بولساق، ەكەۋى دە ۇزدىك وتىزدىققا كىرەدى. بۇرىندارى شەتەلگە اقشامىزدى كوپ شاشاتىنبىز. بۇكىل سپورتشىلارىمى شەتەلگە بارىپ جاتتىعاتىن. قىپ-قىزىل شىعىن. ال ەندى بارلىعى وزىمىزدە دايىندالادى»، – دەيدى سپورت شولۋشىسى راۋان وقاس.

قالا اكىمدىگى ءتورت ءىرى مۇز ايدىنىمەن عانا شەكتەلمەي (ALMATY ARENA، HALYK ARENA، «مەدەۋ» بالۋان شولاق اتىنداعى سپورت سارايى)، اشىق اسپان استىندا تاعى بەس جەردەن اۋەسقويلارعا ارنالعان سىرعاناۋ الاڭدارىن اشپاق. جەلتوقسان ايىنىڭ بىرىنەن باستاپ بۇقاراعا بەرىلەتىن ورىنداردى دايىنداۋ جۇمىستارى ءقازىر ءجۇرىپ جاتىر. كەڭ كوسىلىپ سىرعاناۋ ءۇشىن بيىل اشىلاتىن ورىنداردىڭ ءارقايسىسى 900 شارشى مەتردەن كەم بولمايدى.

«مۇز ايدىنىندا سىرعاناۋ 100% تەگىن بولادى. ءوزىنىڭ كونكيىمەن كەلگەن ادام كەز كەلگەن ۋاقىتتا اقىسىز سىرعاناي الادى. بيىل سىرعاناۋ ۋاقىتى تۇنگى ساعات 11-12-گە دەيىن ۇزاردى. بىلتىر كونكيدى جالعا الۋ 600 تەڭگە بولسا، بيىل ول ءجۇز تەڭگەگە قىمباتتاپ، ەسەسىنە ەكى ساعات سىرعاناۋعا مۇمكىندىك بەردىك»، – دەيدى جوبا جەتەكشىسى مۇحامەدجان وسەر.  

سونىمەن، الداعى ايدا اشىلاتىن ايدىندار:

• ورتالىق مادەني جانە دەمالىس ساياباعى؛

• «اتاكەنت» كورمەسىنىڭ الدى؛

• تۇڭعىش پرەزيدەنت ساياباعى؛

• بايسەيىتوۆا مەن قۇرمانعازى كوشەلەرىنىڭ قيىلىسى؛

• «مارت» ساۋدا ويىن ورتالىعىنىڭ جانى.

بيىلعى قىستىڭ ۇزاق بولاتىنىن ەسكەرگەن ۇيىمداستىرۋشىلار كەم دەگەندە جارتى ميلليون جان سىرعاناۋ كيىمدەرىن جالعا الادى دەپ، ءتورت جارىم مىڭ جاڭا كونكي قوسىپتى.