«شىمبۇلاقتا» شاڭعى تەبۋ ماۋسىمى اشىلدى. تاۋ-شاڭعى كۋرورتىنىڭ باسشىلىعى كوپتەن كۇتكەن سىرعاناۋ ماۋسىمىنا بىرنەشە توسىنسىي ازىرلەپ قويىپتى. ەڭ باستىسى، تومەنگى جاعى ءمولدىر اينەكپەن قاپتالعان كابينالار. تابيعاتتى تاماشالاۋعا ارنالعان قالاداعى ەڭ بيىك الاڭ 3200 مەتر بيىكتىكتە ورنالاسقان.  

ەدەنى اينەكتەن جاسالعان جاڭا فۋنيكۋلەرعا كىرسەڭىز، اسەرى ەرەكشە. اعاشتار مەن شىرشالار تومەن جاقتا ءجۇزىپ بارا جاتقانداي كۇيگە بولەيدى. اينالانى 360 گرادۋستا تاماشالاۋعا بولادى. ازىرگە مۇنداي كابينانىڭ تەك 5-ەۋى عانا بار. ولار مەدەۋ-شىمبۇلاق باعىتىندا جۇرەدى.

«شۆەيساريادا وندىرىلگەن پانورامالىق شولۋ كابينالارىنىڭ ساپاسى بارلىق حالىقارالىق ستاندارتتارىنا ساي. ولاردى ءقاۋىپسىز دەپ تولىق سەنىممەن ايتا الامىن. مۇنداي كابينادا تۇرىپ اينالانى بيىكتىكتەن شولۋ شاتقالداردىڭ ۇستىنەن ۇشىپ بارا جاتقانداي اسەر قالدىرادى»، – دەدى دەمەۋشى كومپانيا پرەزيدەنتى ۋن چول يۋن.

بيىلعى سىرعاناۋ ماۋسىمىنىڭ قاراشادا اشىلۋى «شىمبۇلاق» ءۇشىن تاريحي جاعداي. شاڭعى تەبۋدى ەرتە باستاۋ – جاساندى قار جاۋدىراتىن مىناداي قار زەڭبىرەكتەرىن ورناتۋدىڭ ارقاسىندا مۇمكىن بولىپ وتىر. مۇنداي قۇرالدىڭ ونداعان داناسى 100 مىڭ تەكشە مەتردەن اسا اق ۇلپا جاساپ ۇلگەرگەن.

«ءبىز بيىل شاڭعى تەبۋگە كەلۋشىلەرگە جايلى بولۋى ءۇشىن ەرتەرەك اشىلدىق. سىرعاناۋعا كەلەتىن ادامدار سانى تىم كوبەيىپ كەتسە جاراقات الۋ جاعى جيىلەيدى ءارى كەزەكتە كوپ تۇراتىن بولادى. ەرتە اشىلعانىمىزدىڭ ارقاسىندا ءبىر ماۋسىمدا كەلەتىندەر سانى ءبولىنىپ، سىرعاناۋعا قولايلى جاعداي تۋدى. تەحنيكالىق جاعىن ايتساق، بيىل جاۋىن-شاشىنعا قاراماستان جاساندى قار شىعاراتىن 40-قا جۋىق قار زەڭبىرەگىن ىسكە قوستىق. سونىڭ ارقاسىندا «شىمبۇلاقتى» ماۋسىمنىڭ باستالۋىنا قاجەتتى قارمەن  قامتاماسىز ەتتىك»، – دەدى «شىمبۇلاق» تاۋ-شاڭعى كۋرورتىنىڭ ديرەكتورى ەرجان ەركىنبايەۆ.

كەلۋشىلەر ءۇشىن تاعى ءبىر جاعىمدى جاڭالىق – اجەتحانانىڭ سالىنۋى. مۇندا ەشقانداي كارىز جۇيەلەرى بولماعاندىقتان، 3200 مەتر بيىكتىكتە دارەتحانا ورناتۋ- كۇرمەۋى قيىن ماسەلە ەدى. سوندىقتان، كۋرورت باسشىلىعى اعىندى سۋلار ارقىلى جۇمىس ىستەيتىن تازارتۋ قوندىرعىلارى بار زاماناۋي دارەتحانا ساتىپ العان.

«وسى ماۋسىمدا تالعار وتكەلىندە اينالانى بيىكتەن كورۋگە ارنالعان الاڭدار جوندەۋدەن وتەدى. بۇل قالاداعى ەڭ بيىك الاڭ بولماق جانە ول كۋرورتقا كەلىپ، قالانىڭ ادەمى كورىنىسىن تاماشالايمىن دەۋشىلەر قاتارىن كوبەيتەدى دەپ ويلايمىن. سونداي-اق، بيىل جاڭا سنوۋپارك سالىنادى. شاڭعى تەبۋدى جاڭادان ۇيرەنىپ جۇرگەندەر ءۇشىن قوسىمشا تراسسا سالامىز»، – دەدى «شىمبۇلاق» تاۋ-شاڭعى كۋرورتىنىڭ ماركەتينگ بويىنشا ديرەكتورى ۆلاديسلاۆ سەمەنوۆ.  

دەمالىس كۇندەرى «شىمبۇلاققا» 10 مىڭعا دەيىن ادام كەلەدى. بۇل ءبىر جىلدا 600 مىڭ ادام كەلەدى دەگەن ءسوز. ونىڭ ۇشتەن ءبىرى – شاڭعى تەبەتىندەر. مۇندا كەلۋشىلەر سانى جىل سايىن 20 پايىزعا ارتۋدا. ياعني، الماتىلىقتار مەن قالا قوناقتارىنىڭ قىسقى سپورت تۇرىنە قىزىعۋشىلىعى ارتىپ كەلەدى.