الماتى قالاسىنىڭ ترانسپورتتىق رەفورماسى ورتا ازيا ەلدەرىنە ۇلگى بولۋدا. بىشكەك، تاشكەنت قالالارى «جۇرگىنشىلەرگە ارنالعان قالا» كونسەپسياسىنا بەت بۇرسا، ەلوردا الماتىداعى ەلەكتروندى تولەم جۇيەسى نەگىزىندە ەلەۋلى جۇمىس اتقارىپ جاتىر. قوعامدىق كولىكتەگى باسقارۋ ساپاسى مەن قىزمەت كورسەتۋ مادەنيەتى كونفەرەنسياسىندا ساراپشىلار وسىنداي پىكىرگە توقتالدى.

«قالالاردى سالىستىرۋعا بولمايدى. ويتكەنى، ءار ءوڭىردىڭ قارجىلىق جاعدايى مەن كليماتتىق ەرەكشەلىكتەرىنە بايلانىستى جۇرگىزىپ جاتقان ترانسپورتتىق رەفورماسى ءارتۇرلى. ارينە، ۇلگى رەتىندە قاراۋعا نەگىز بار. الماتى قالاسىنىڭ تاجىريبەسىنە كەلەتىن بولساق، ينۆەستيسيا تارتىلعانىن، پاركتەردىڭ جاڭارعانىن كورىپ وتىرمىز. ءقازىر جۇرگىزۋشىلەردىڭ كاسىبي دەڭگەيىن كوتەرۋ ءۇشىن ەلەۋلى جۇمىستار اتقارىلىپ جاتىر ەكەن. 6-7 جىل بۇرىنعى جاعدايمەن سالىستىرعاندا الدەقايدا جاقسى دەر ەدىم»، – دەيدى حالىقارالىق قوعامدىق كولىكتەر كەڭەسىنىڭ ماسكەۋ، استانا قالالارىنداعى كەڭسەسىنىڭ جەتەكشىسى (ماسكەۋ) يۋسۋپ حاسييەۆ.

دەگەنمەن، جۇرگىزۋشىلەردىڭ كاسىبي جارامدىلىعى مەن ولاردىڭ قىزمەت كورسەتۋ مادەنيەتى ءالى دە بولسا اقساپ تۇر. ترانسپورت ماماندارىنىڭ بىلىكتىلىك ورتالىعى ۇيىمداستىرعان قازان ايىنداعى اتتەستاسيالاۋدان 2 مىڭنان اسا كولىك تىزگىندەۋشىنىڭ جارتىسىنا جۋىعى ءسۇرىنىپتى. ءبىراق ولار جۇمىستان بىردەن قۋىلمايدى. الماتى اكىمدىگى ولاردى قايتا وقىتۋ ءۇشىن ارنايى باعدارلاما ويلاستىرعان. تەستىلەۋدەن كەيىن 600 قوعامدىق كولىك جۇرگىزۋشىسىن وقىتۋ ءۇشىن جەرگىلىكتى بيۋدجەتتەن قاراجات ءبولىپتى.