الماتىدا «تەگىس ترانس» تاسىمالداۋشىسى الماتى جولاۋشىلار تاسىمالى نارىعىنان كەتتى.  مۇنداي شەشىم الماتى قالاسىنىڭ جولاۋشىلار كولىگى جانە اۆتوموبيل جولدارى باسقارماسى جانىنداعى كولىك ينفراقۇرىلىمىن دامىتۋ جونىندەگى جۇمىس توبىنىڭ وتىرىسىندا قابىلداندى. 

«تاسىمالداۋشى قىزمەت كورسەتىلەتىن رەيستەردىڭ نورماتيۆتىك تۇراقتىلىعىن قامتاماسىز ەتۋگە مىندەتتى. ءبىزدىڭ مالىمەتتەر بويىنشا، «تەگىس-ترانس» كولىكتەرىنىڭ ءجۇرۋ تۇراقتىلىعى بۇزىلعان. قالا بويىنشا  شامامەن 40-50% نورمادان،  ال كەيدە 30%-عا دەيىن تومەندەيدى. ياعني، كوزدەلگەن 10 جىلجىمالى قۇرامنىڭ ىشىنەن رەيسكە ەڭ جاقسى جاعدايدا 4-5 اۆتوبۋس شىعادى. سونىمەن قاتار، ولار پايدالانعان اۆتوبۋستار وتە توزعان جانە بەرىلگەن ۋاكىتتا جاڭارتىلىپ جەتكىزىلمەگەن. ءقازىر كولىك قىزمەتتەرىنىڭ دەڭگەيىن ارتتىرۋ ماقساتىندا بەلسەندى شارالار قابىلدانۋدا، ەڭ الدىمەن، ءبىز رەيستەر تۇراقتىلىعىنىڭ نورمالارىن ساقتامايتىن تاسىمالداۋشىلارمەن جۇمىستى بۇدان ءارى توقتاتاتىن بولامىز»، - دەدى جولاۋشىلار كولىگى جانە اۆتوموبيل جولدارى باسقارماسى باستىعىنىڭ ورىنباسارى ەرلان ءادىلوۆ.

ەستەرىڭىزگە سالا كەتسەك، «تەگىس ترانس» كومپانياسى ءنومىر 71 قوعامدىق كولىك مارشرۋتىنا قىزمەت كورسەتەدى. وسى باعىت، بۇگىنگى كۇنى «الماتى ەلەكتروترانس» تاسىمالداۋشىسىنا تاپسىرىلىپ، 71 مارشرۋتقا 12 مەترلىك جايلى لياز اۆتوبۋستارى  بەرىلدى.