قازاقستان رەسپۋبليكاسىنىڭ تاۋەلسىزدىگى قارساڭىندا اقتوبە وبلىسىنىڭ بايعانين اۋدانىنداعى «قوجاساي» كەن ورنىندا زاماناۋي گاز وڭدەۋ كەشەنى پايدالانۋعا بەرىلدى. يندۋستريالاندىرۋ كۇنىنە ارنالعان ءداستۇرلى تەلەكوپىر كەزىندە مەملەكەت باسشىسى تىكەلەي ەفير ارقىلى ءىرى زاۋىتتىڭ جۇمىسىن باستاۋىنا رۇقسات بەردى.
* بۇل ءوڭىر تۇرعىندارى ءۇشىن وتە قۋانىشتى جاڭالىق. قازاقستان مۇناي مەن گاز وندىرەتىن ەلدەردىڭ ءبىرى بولىپ تابىلادى، سوندىقتان تۇرعىنداردى گازبەن قامتاماسىز ەتۋ – بىزدەر ءۇشىن ماڭىزدى مىندەت. ءقازىر ءبىز «سارىارقا» گاز قۇبىرىن سالايىن دەپ جاتىرمىز جانە وسىنىڭ ءبارى حالىقتىڭ ءال-اۋقاتىن كوتەرۋ ءۇشىن جاسالۋدا. مەن سىزدەردى قۋانىشتى جاڭالىقپەن، ءوندىرىستىڭ ىسكە قوسىلۋىمەن قۇتتىقتايمىن. ءسات ساپار! – دەدى نۇرسۇلتان نازاربايەۆ.
«Gas Processing Company» ج ش س كاسىپورنى سالعان ىلەسپە مۇناي گازىن كادەگە جاراتاتىن زاماناۋي زاۋىتتىڭ جاڭا قوندىرعىسى جىلىنا 226 تەكشە مەتر تاۋارلى گاز، 37 توننا پروپان-بۋتان قوسپاسىن، 5،4 مىڭ توننا گاز كوندەنساتىن، 10،5 مىڭ توننا تۇيىرشىكتەلگەن كۇكىرت شىعارۋعا مۇمكىندىك بەرەدى.
* بۇگىن ەلدەگى گاز سالاسىنىڭ ءىرى يندۋستريالدى جوبالارىنىڭ ءبىرى پايدالانۋعا بەرىلدى. زاۋىت زاماناۋي تالاپتارعا ساي ەڭ جاڭا تەحنولوگيالارمەن جابدىقتالعان. ونىڭ ەلدەگى رەسۋرستىق بازانى تولتىرۋداعى ماڭىزى زور. «قازترانسگاز» اق ۇلتتىق وپەراتورى گازدى ىشكى جانە سىرتقى نارىققا تاسىمالداۋ ءۇشىن بارلىق قاجەتتى ينفراقۇرىلىمدى سالعان،-دەدى «Gas Processing Company» ج ش س جوباسىنىڭ باسشىسى بولات ساقتاعانوۆ جۋرناليستەرگە.
گازدى كەشەندى دايىنداۋ قوندىرعىسى شيكىزات بازاسىن ۇتىمدى پايدالانۋعا، ىلەسپە مۇناي گازىن قايتا وڭدەۋدى ارتتىرۋعا جانە زياندى زاتتاردىڭ اتموسفەراعا شىعۋىن ەداۋىر ازايتۋعا مۇمكىندىك بەرەدى.
* جاڭا كاسىپورىننىڭ ءوڭىر ەكونوميكاسىن جاقسارتۋدا ءمانى زور. بۇل قازاقستاندا جەكە ينۆەستيسيا ەسەبىنە سالىنعان جالعىز گاز وڭدەۋ زاۋىتى. ونىڭ قۇرىلىسى كەزىندە 1500 جۇمىس ورنى قۇرىلدى، سونىڭ 250-دەن استامى - تۇراقتى. ايتا كەتۋ كەرەك، بۇل ەكسپورتقا باعدارلانعان كاسىپورىن – ءونىمنىڭ 70 پايىزى سىرتقى نارىققا جەتكىزىلەتىن بولادى،- دەپ اتاپ ءوتتى بەردىبەك ساپاربايەۆ.
جاڭا كاسىپورىن جەتى جىلدىڭ ىشىندە وڭىرلىك جانە رەسپۋبليكالىق بيۋدجەتتى 10 ملرد تەڭگەدەن استام سالىق تۇسىمدەرىمەن تولتىرادى دەپ جوسپارلانىپ وتىر.
