الماتى قالاسىندا «7-20-25» باعدارلاماسى اياسىندا جىل سوڭىنا دەيىن 600 پاتەر بەرىلەدى. بۇل تۋرالى ورتالىق كوممۋنيكاسيالار قىزمەتىندە وتكەن باسپا ءسوز ءماسليحاتىندا الماتى قالاسىنىڭ اكىمى باۋىرجان بايبەك مالىمدەدى.

«7-20-25» بويىنشا جالپى سوماسى 10،9 ملرد. تەڭگە بولاتىن 843 پاتەر نەسيەسى ماقۇلداندى. بۇدان باسقا اعىمداعى جىلدىڭ اياعىنا دەيىن باعدارلاما تالاپتارىنا سايكەس كەلەتىن 600-دەن استام پاتەر پايدالانۋعا بەرىلمەك. ال «نۇرلى جەر» باعدارلاماسى اياسىندا بيىلعى جىلى 4 800 وتباسى جاڭا پاتەر الادى، وتكەن جىلمەن سالىستىرعاندا بۇل كورسەتكىش 20%-كە ارتتى»، - دەدى ب. بايبەك.

 «نۇرلى جول» باعدارلاماسىنىڭ اياسىندا 4 200 جۇمىس ورنى قۇرىلىپ، 111 شاقىرىم ينجەنەرلىك جەلى جۇرگىزىلدى سونداي-اق، 28 الەۋمەتتىك تۇرعىن ءۇي جانە 2 مەكتەپكە قوسالقى عيمارات سالىنعان.

«بۇل باعدارلامالاردىڭ بارلىعى ەل ەكونوميكاسىن نىعايتۋعا، ازاماتتاردىڭ ءال-اۋقاتىن ارتتىرۋعا، ينفراقۇرىلىمدى جاقسارتۋعا باعىتتالعان. ناتيجەسىندە، وسى جىلدىڭ وزىندە 29 مىڭنان استام جاڭا جۇمىس ورنى اشىلىپ، 2 ميلليون شارشى مەتر تۇرعىن ءۇي پايدالانۋعا بەرىلۋدە»، - دەپ اتاپ ءوتتى.

سونىمەن قاتار، سوڭعى 3 جىلدا 800 كم ينجەنەرلىك جۇيە جوندەلىپ، 500 شاقىرىمعا جۋىق جول سالىندى جانە جوندەۋدەن ءوتتى.