جۇمىس ساپارى كەزىندە الماتى اكىمى باۋىرجان بايبەك وتاندىق وندىرىستە شىعارىلعان ءارى گازبەن جۇمىس ىستەيتىن 70 جاڭا اۆتوموبيلدەردى كوردى. قازىرگى كەزدە قالا پوليسياسىنىڭ اۆتوپاركى كولىكپەن تولىق قامتىلعان، ال بۇل ۆەدومستۆانىڭ جەدەل جۇمىسىنا وڭ ىقپالىن تيگىزەتىن بولادى.

قالا پوليسياسىنىڭ باستىعى سەرىك كۇدەبايەۆ ءوزىنىڭ سوزىندە ءار ءاۆتوموبيلدىڭ GPS-ناۆيگاتورىمەن جانە ۆيدەو-اۋديو فيكساسيالارمەن جابدىقتالعانىن ايتتى. بۇدان وزگە، بارلىق جول-پاترۋل قىزمەتى پلانشەتتەرمەن جانە توسكەۋدەلىك ۆيدەورەگيستراتورلارمەن قامتىلعان. وسىنىڭ ارقاسىندا حاتتامالار تەك ەلەكتروندى ۆاريانتتا جاسالادى، ال كەلەر جىلدىڭ ءبىرىنشى توقسانىندا ايىپپۇلدار ءتارتىپ بۇزىلعان جەردە بانكى كارتاسى ارقىلى بىردەن تولەنەدى.

مەگاپوليس اكىمى تۇرعىنداردىق قاۋىپسىزدىگى قالامىزدى تۇراقتى دامىتۋدىڭ باستى بۋىنى بولىپ تابىلاتىنىن اتاپ ءوتتى.

«قازىرگى كەزدە ءبىز قاۋىپسىزدىك سالاسىنا ينفورماتيزاسيانى كەڭىنەن تارتۋدامىز، ياعني سىبايلاس جەمقورلىققا اكەلەتىن ادام فاكتورىن بارىنشا ازايتۋ ءۇشىن جاڭا تەحنولوگيالاردى ەنگىزۋدەمىز. ۆيدەوباقىلاۋ كامەرالارىنىڭ سانى ارتۋدا، ماقسات ايىپپۇل سالۋدا عانا ەمەس، كولىك قوزعالىسىن تارتىپكە شاقىرىپ، جكو ازايتۋدا. 3 جىل ىشىندە قالانىڭ جەرگىلىكتى بيۋدجەتىنەن پوليسيانى جابدىقتاۋعا جەتكىلىكتى قارجى ءبولىندى، سوندىقتان ءبىز سەرۆيستىك پرينسيپ بويىنشا پوليسيادان جۇمىس تيىمدىلىگىن ارتتىرۋدى تالاپ ەتە الامىز»، - دەدى باۋىرجان بايبەك.

جالپى قالا پوليسياسىنىڭ ماتەريالدىق-تەحنيكالىق جاراقتانۋى 87%-عا دەيىن جەتتى. سوڭعى ءۇش جىل ىشىندە 468 بىرلىك قىزمەتتىك كولىك الىندى. قالانىڭ بارلىق اۋداندارىندا جەرگىلىكتى بيۋدجەت ەسەبىنەن ءمولدىر فرونت-وفيستەر اشىلادى. «102» قىزمەتى جەتىلدىرىلەدى، قازىرگى كەزدە بۇلارداعى وپەراتورلار سانى 2،5 ەسە، ال ولاردىڭ جالاقىسى 3 ەسە وسكەن.