الماتىدا جەراستى تۋننەلدەرىن سالۋ ءتيىمدى. بۇل تۋرالى الماتى قالاسى ساۋلەت جانە قالا قۇرىلىسى باسقارما باسشىسىنىڭ ورىنباسارى احمەدجانوۆ الماسحان ايتتى.

باسقارما باسشىسىنىڭ ورىنباسارى  احمەدجانوۆ الماسحان تۋننەل سالۋدىڭ قىمبات بولعانمەن، جول جوندەۋگە ارنالعان قاراجاتتىڭ قىسقارۋىنا سەپ بولاتىنىن باسا ايتتى.

«ءبىزدىڭ جوبا، ءبىزدىڭ ۇسىنىس - قالادا كەشەندى تۋننەلدەردىڭ سحەماسىن قۇرۋ. تۋننەل - قۇبىر جەلىسى مەن كابەلدىڭ ۇزاق پايدالانۋىنا كەپىلدىك بەرەدى. 2-3 جىل سايىن اسفالتتاۋعا كوپ شىعىن شىعارماي، كاپيتالدىق جولداردى جاساۋعا مۇمكىندىك اشادى»،- دەدى الماسحان احمەدجانوۆ.

ونىڭ ايتۋىنشا، ءبىر تۋننەلدى سالۋ ءۇشىن سول جولدىڭ 5 جىلدىق قاراجاتى كەتۋى مۇمكىن.

«ءبىز ينجەنەرلىك كوممۋنيكاسيالاردىڭ قايتا سالۋىنا كوپ اقشا قۇرتامىز. تۋننەلدى سالعان كەزدە جولدىڭ استىنان بارلىق ينجەنەرلىك توراپتاردى قىزىل سىزىقتىن ار جاعىنا جىبەرۋ كەرەك. جولمەن قىزىل سىزىقتىن اراسى - 8 مەتر. ءبىراق بۇل جەردە باسقا پروبلەما بار. جەراستى سۋلارىنا بايلانىستى اعاشتار  جول بويىندا 2 قاتار وتىرعىزىلعان. سوندىقتان ءبىز ءبىر رەت اسفالتتى اشىپ، ول جاققا تۋننەلدى سالىپ، تورلاردى باسقا جەرگە قويۋدى ۇسىنۋدامىز»،- دەدى ول.

الماسحان احمەدجانوۆ تۋننەلدەر جايلى يدەياسىن قالا اكىمى باۋىرجان بايبەككە ايتقان. قالا اكىمى ونىڭ يدەياسىن قولداپ، جۇزەگە اسىرۋ قاجەتتىگىن ەسكەرتكەن. 

احمەدجانوۆتىڭ  ايتۋىنشا، تۋننەلدەردىڭ ىشىندە ۆيدەوكامەرالار ورناتىلسا، اۆتوماتتى تۇردە ولاردىڭ جاعدايىن باقىلاپ وتىرۋعا بولادى.