تاۋەلسىزدىك كۇنى قارسانىڭدا الماتىنىڭ مەدەۋ اۋدانىنىڭ بەلسەندى تۇرعىندارى قۇرمەت گراموتالارىمەن ماراپاتتالدى.
وقۋشىلار سارايىندا ق ر تاۋەلسىزدىگى كۇنىنە وراي ۇيىمداستىرىلعان مەرەكەلىك كونسەرت الماتى اكىمدىگىنىڭ قولداۋىمەن ءوتتى.
سالتاناتتى شاراعا مەدەۋ اۋدانىنىڭ اكىمى جىلقىبايەۆ ەرجان، جەلتوقسانشىلار، مەملەكەتتىك قىزمەتكەرلەر جانە اۋدان تۇرعىندارى قاتىستى.
«ءماسليحات دەپۋتاتتارى مەن قالا اكىمىنىڭ قولداۋىمەن ءبىزدىڭ اۋداندا كوپتەگەن جاقسى وزگەرىستەر بولدى. اتاپ ايتساق، اۋدانىمىزدىڭ جولدارىن جوندەۋگە، ساياباقتاردى كوركەيتۋگە 7-8 ملن تەڭگە باعىتتالدى. «دۋمان» ىقشام اۋدانىنداعى، مەندىقۇلوۆ كوشەسىنىڭ الدىنداعى ساياباقتار مەن مەشىتتەردىڭ الدى رەتكە كەلتىرىلەتىن بولادى. ودان بولەك، دوستىق، تولە بي، ايتەكە بي كوشەلەرىن جارىقتاندىرۋ قولعا الىنادى. سونىمەن قاتار، الداعى ءۇش جىلدا 57 جەكەمەنشىك بالاباقشا اشىلادى دەپ كۇتىلۋدە»، - دەدى ەرجان جىلقىبايەۆ.
كونسەرتتى «جىگىتتەر» توبى «ءبىز - وتاننىڭ ۇلانىمىز» اتتى انىمەن اشتى. ايتا كەتەيىك، شارا بارىسىندا اتالمىش توپتىڭ مۇشەسى باعلان ءابدىرايىموۆ تە مەدەۋ اۋدانىنىڭ ماراپاتىنا يە بولدى.
«بارلىق مەرەكەلەردىڭ اراسىندا مەن ءۇشىن ەڭ ماڭىزدى، ەڭ سۇيىكتىسى - تاۋەلسىزدىك كۇنى. مەرەكە قارسانىڭدا قۇرمەت گراموتاسىن العانىما وتە قۋانىشتىمىن»،- دەدى ءانشى.
