الماتى اكىمدىگىنىڭ ءار اۋدانى قازاقستان رەسپۋبليكاسىنىڭ تاۋەلسىزدىگى مەيرامىن اۋدان كولەمىندە تويلاۋدى باستاپ كەتتى.

وسىنداي مەرەكەلىك شارالاردىڭ ءبىرى كەشە مەدەۋ اۋدانىندا بولسا، سالتاناتتى جيىندا بۇگىن بوستاندىق اۋدانىنىڭ تۇرعىندارى باس قوستى.

ق.ساتپايەۆ اتىنداعى قازاق ۇلتىق تەحنيكالىق زەرتتەۋ ۋنيۆەرسيتەتىندە وتكەن مەرەكەلىك كەشكە بوستاندىق اۋدانى اكىمدىگىنىڭ اكتيۆى، اۋدان ازاماتتارى باس قوستى.

جيىن بارىسىندا اكىم التاي راحىمبەتوۆ اۋداننىڭ دامۋىنا ۇلەس قوسىپ كەلە جاتقان بەلگىلى تۇلعالاردى، قۇرمەتتى ازاماتتاردى مەرەكەمەن قۇتتىقتاپ، ماراپاتتادى.

«ەكى كۇننەن سوڭ ەلىمىز ەڭ باستى مەرەيلى مەرەكە - تاۋەلسىزدىك كۇنىن تويلايدى. تاۋەلسىزدىك كۇنى - اق نايزانىڭ ۇشىمەن، اق بىلەكتىڭ كۇشىمەن تۋعان جەرىن جاۋ قولىنان الىپ قالعان، سول ءۇشىن جانىن پيدا ەتكەن كوپتەگەن قازاق ازاماتتارىنىڭ رۋحىنا تاعزىم ەتەتىن كۇن. سونىڭ ارقاسىندا التاي مەن اتىراۋدىڭ اراسىندا ارقا مەن الاتاۋ اراسىندا تاۋەلسىزدىك ورنادى. رۋحى بيىك، جىگەرى ءور مەملەكەت قالىپتاستى. تاۋەلسىزدىكتىڭ ەڭ العاشقى جىلى لەبى، بوستاندىقتىڭ قارلىعاشى ەڭ العاش الماتىدان ۇشقانى اقيقات. الماتىدا ەڭ العاش قازاقستاننىڭ تاريحي شەشىمدەرى قابىلداندى. جىلدار وتسە دە بۇل تاريحي وقيعانىڭ ماڭىزى ءبار ساتكە ورتايعان ەمەس. ءبىز ءۇشىن بۇل ماڭگىلىكتىڭ بەلگىسى.

قازاق ەلىنىڭ ۇلتتىق قۇندىلىقتارى دا تاريحپەن تىكەلەي بايلانىستى. ءبىز ونى باعالاي ءبىلۋىمىز كەرەك. ءدال وسى تۋرالى ەلباسى ءوزىنىڭ «ۇلى دالانىڭ 7 قىرى» ماقالاسىندا ايتادى. ەلباسىنىڭ سىندارلى ساياساتىنىڭ ارقاسىندا بۇگىندە ەلىمىز تانىمال مەملەكەتكە اينالدى»، - دەدى التاي راحىمبەتوۆ.

اۋدان اكىمى قۇرمەتتى ازاماتتار مەن قالانىڭ الەۋمەتتىك-ەكونوميكالىق دامۋىنا ۇلەس قوسقان تۇلعالاردى، ءتۇرلى سالا ماماندارىن ماراپاتتادى.

سالتاناتتى جينالىس ەسترادا جۇلدىزدارىنىڭ مەرەكەلىك كونسەرتىنە ۇلاستى.