بۇگىنگى كۇنى قازاقستان تابىستى، گۇلدەنگەن جانە حالىقارالىق قوعامداستىق تانيتىن مەملەكەت. جاقىندا مەملەكەت باسشىسىنىڭ "ۇلى دالانىڭ جەتى قىرى" اتتى جاريالانعان باعدارلامالىق ماقالاسى مەملەكەتىلىكتى دامىتۋدىڭ جاڭا كەزەڭىن باستادى. ول ۇلتتىق رۋحتى كوتەرۋگە ىقپال ەتەدى جانە قازاقستاندىقتاردى ايانباي ەڭبەك ەتۋگە ىنتالاندىرادى. مىنە، سونداي ەلىمىزدىڭ ەگەمەندىگىن قورعاۋ جولىندا ادال قىزمەت ەتىپ كەلە جاتقان قارۋلى كۇشتەرىنىڭ اسكەري قىزمەتشىلەرى مەن قىزمەتكەرلەردىڭ ەڭبەگى ولشەۋسىز. وزدەرىنىڭ قىزمەتىن ەلگە دەگەن پارىزىمىز دەپ بىلەتىن اسكەري قىزمەتشىلەر ايتۋلى سالتاناتتى مەرەكەلەردى ەسكەرۋسىز قالدىرعان ەمەس.
وسىعان وراي، سولتۇستىك قازاقستان وبلىسى قورعانىس ىستەرى جونىندەگى دەپارتامەنتىندە مەرەكەلىك ءىس-شارا ءوتتى. سالتاناتتى شاراعا قازاقستان رەسپۋبليكاسى قارۋلى كۇشتەرىنىڭ ارداگەرلەرى، دەپارتامەنت جانە باسقارما باسشىلارى مەن جەكە قۇرام تۇگەل قاتىستى.
مەرەكەلىك شارانى وبلىستىڭ قورعانىس ىستەرى جونىندەگى دەپارتامەنتىنىڭ باستىعى پولكوۆنيك الماز تىلەۋحانوۆ سالتاناتتى تۇردە اشىپ، قوناقتاردى اتاۋلى مەرەكەمەن قۇتتىقتادى.
"تاۋەلسىزدىك – بارشا قازاقستان حالقى ەرەكشە قادىرلەيتىن، وتكەننەن تاعىلىم الىپ، كەلەشەككە بايىپتى قادام جاسايتىن ماڭىزدى كۇن. بۇل مەرەكە حالقىمىزدىڭ سان عاسىرلىق ارمان-مۇراتتارىمەن ساباقتاسىپ جاتقانىمەن دە قۇندى. تاۋەلسىز ەلىمىز بەن ەلوردامىزدىڭ وسىپ-وركەندەۋى، اتقارىلعان ىرگەلى ىستەر – جەتىستىكتەرىمىزدىڭ ايقىن ايعاعى. سوندىقتان تاۋەلسىزدىك كۇنى شىن مانىسىندەگى جالپىحالىقتىق مەرەكە. تاۋەلسىزدىگىمىز تۇعىرلى، بەرەكەمىز باياندى بولعاي"- دەپ ىزگى تىلەگىن ءبىلدىردى.
شارا بارىسىندا، زاپاستاعى پولكوۆنيكتەر ق.ن.ساۋىتبەكوۆ، ۆ.ا.ناديارنىي، ۆ.ۆ.ورلوۆ سياقتى ەلىمىزدىڭ وركەندەۋ جولىندا ايانباي قىزمەت ەتكەن ق ر قارۋلى كۇشتەرىنىڭ ارداگەرلەرى قوناقتاردى تاۋەلسىزدىك كۇنىمەن قۇتتىقتاپ، ەلىمىزگە بەيبىت ءومىر مەن باق-بەرەكە تىلەگەن جىلى لەبىزدەرىن جەتكىزدى.
تاۋەلسىزدىك كۇنىنە ارنالعان مەرەكەلىك ءىس-شارا - وبلىستىق فيلارمونيانىڭ كوركەمونەرپازدارى «تاۋەلسىزدىك كۇنىمەن، ەلىم!» اتتى ۇيىمداستىرعان ۇلى مەرەكەگە ارنالعان كونسەرتتىك باعدارلاماسىمەن قورىتىندىلاندى.
