الماتىدا قازاقستان رەسپۋبليكاسىنىڭ تاۋەلسىزدىك كۇنىنە ورايلاستىرىلعان سالتاناتتى جيىن ءوتتى. مەملەكەت باسشىسىنىڭ جارلىعىنا ساي مەگاپوليس اكىمى باۋىرجان بايبەك ەلىمىزدىڭ دامۋىنا ايتارلىقتاي ۇلەس قوسقان الماتىلىقتارعا مەملەكەتتىك ماراپاتتاردى تاپسىردى.

«ءبىزدىڭ پرەزيدەنتىمىزبەن بىرگە تاۋەلسىز قازاقستان ءوزىنىڭ كونستيتۋسياسىن، مەملەكەتتىك رامىزدەرىن، ۇلتتىق ۆاليۋتاسىن قابىلدادى، ەۋرازيا جۇرەگىندە جاڭا استانانى قۇردى. استانا – نۇرسۇلتان نازاربايەۆتىڭ ەرلىگى، ەلىمىزدىڭ تاريحىنا التىن ارىپتەرمەن ماڭگىلىككە جازىلىپ قالادى. الماتى - تاۋەلسىزدىگىمىزدىڭ التىن بەسىگى. مەملەكەت باسشىسىنىڭ ەرەكشە نازارى مەن قولداۋى ارقاسىندا قالا ەكونوميكاسى تۇراقتى وسۋدە. ەگەر تاۋەلسىزدىكتىڭ باستاۋىندا ەلىمىزدىڭ ءىجو نەبارى 10%-دى قۇراسا، ال ءقازىر الماتىنىڭ ءوزى ەكنوميكانىڭ بەستەن ءبىر بولىگىن قالىپتاستىرۋدا»، - دەپ اتاپ ءوتتى ءوزىنىڭ قۇتتىقتاۋ سوزىندە باۋىرجان بايبەك.

ول قازىرگى كەزدە مەگاپوليستىڭ تۇراقتى دامۋ ماقساتتارىنا، وسەر ستاندارتتارىنا جانە ۇزدىك الەمدىك پراكتيكاعا جۇگىنەتىنىن ايتتى. كەشە عانا قالا ءماسليحاتىندا بەكىتىلگەن الماتىنىڭ كەلەر جىلعى بيۋدجەتى مەملەكەت باسشىسىنىڭ جولداۋىن جانە «الماتى-2020» باعدارلاماسىن جۇزەگە اسىرۋعا نەگىزدەلگەن. ياعني، ناقتىلى بيۋدجەتتىڭ 40%-ى الەۋمەتتىك سالانى، 23%-ى قوعامدىق كولىك، جول ينفراقۇرىلىمى جوبالارىن، قالا كوشەلەرىن رەكونسترۋكسيالاۋدى قارجىلاندىرۋعا جۇمسالادى.

سالتاناتتى جيىن بارىسىندا مەملەكەت باسشىسىنىڭ جارلىعىمەن 110 الماتىلىققا مەملەكەتتىك ماراپاتتار تاپسىرىلدى، ولاردىڭ اراسىندا ءبىلىم، مادەنيەت، دەنساۋلىق ساقتاۋ، بيزنەس پەن ونەركاسىپ سالالارىنىڭ وكىلدەرى بار. بۇلاردان وزگە، ازاماتتىق قوعامنىڭ، بۇقارالىق اقپارات قۇرالدارىنىڭ وكىلدەرى، سونىمەن قاتار كولىك، قۇرىلىس، ەنەرگەتيكا جانە قارجى سالاسىنىڭ ماماندارى جوعارى ماراپاتتارعا يە بولدى.