الماتىدا تاۋەلسىزدىك كۇنىنە وراي قالاعا جاڭادان قوسىلعان اۋدانداردا تاعى دا ءبىرقاتار جاڭا الەۋمەتتىك نىساندار بوي كوتەردى. قالا اكىمى باۋىرجان بايبەك جۇمىس ساپارى كەزىندە الماتىنىڭ ناۋرىزباي اۋدانىنداعى جاقىندا سالىنعان №26 ەمحانانى جانە الاتاۋ اۋدانىنداعى №186 بالا باقشاداعى ساپالى اتقارىلعان جۇمىستاردى كوردى.

قالانىڭ دەنساۋلىق ساقتاۋ باسقارماسىنىڭ باسشىسى قانات توسەكبايەۆ ءوزىنىڭ سوزىندە 500 ادام قاتىنايتىن ەمحانانىڭ سوناۋ 1939 جىلى سالىنعان ەسكى سەلولىق اۋرۋحانا ورنىنا سالىنعانىن ايتتى. زامانۋاي جابدىقتارى بار مەديسينالىق مەكەمە تاۋسامالى، تاستىبۇلاق، تاۋجولى، قاراعايلى، قۇرامىس جانە قارعالى سىندى ەلدى مەكەندەردىڭ 30 مىڭعا جۋىق تۇرعىندارىنا قىزمەت كورسەتەتىن بولادى.

«الماتىدا دەنساۋلىق ساقتاۋ سالاسىنىڭ اشىقتىعى مەن ساپاسىن ارتتىرۋ ءۇشىن پارمەندى شارالار قابىلدانادى. وسىعان وراي، قاجەتتى جول كارتاسى جاسالدى. ءقازىردىڭ وزىندە سيفرلاندىرۋ ارقاسىندا سىرقاتتارعا قىزمەت كورسەتۋ ۋاقىتىن 20%-عا، كەزەك كۇتۋدى 30%-عا قىسقارتۋعا، دارىگەردى ۇيگە شاقىرۋدى 1،5 ەسە جەدەلدەتۋگە قول جەتتى»، - دەپ اتاپ ءوتتى ول.

ءدال وسى كۇنى باۋىرجان بايبەك «سايالى» ىقشام اۋدانىنداعى قازاقشا ءدارىس بەرەتىن 320 ورىندى №186 بالا باقشادا بولدى. مەكتەپ جاسىنا دەيىنگى مەكەمەدە 16 توپ بار. ونىڭ ءارقايسىسىندا بالانىڭ جاسىنا قاراي وقىتۋدىڭ وزىندىك ادىستەرى - مونتەسسوري، دەنەش بلوكتارى، قۇم تەراپياسى جانە باسقالارى قولدانىلادى. بالدىرعانداردى قابىلداۋ 19 جەلتوقساننان باستالادى. وتىنىشتەر «Open Almaty» قوعامدىق قابىلداۋى ارقىلى جۇرگىزىلەدى.

ايتا كەتەرلىگى، 10 جىل ىشىندە الاتاۋ اۋدانىن دامىتۋعا 430 ملرد. تەڭگە جۇمسالدى، 30 مىڭنان استام جۇمىس ورىندارى قۇرىلدى، 2،7 ملن. كۆ.م.تۇرعىن ءۇي سالىندى، 12 مەكتەپ، ءدال وسىنشاما مەديسينالىق مەكەمەلەر، 98 مەملەكەتتىك جانە جەكە بالا باقشالار اشىلدى.

ءوز كەزەگىندە سوڭعى ءۇش جىل ىشىندە ناۋرىزباي اۋدانىندا بەس مەديسينالىق مەكەمە، ەكى مەملەكەتتىك مەكتەپ، ەكى مەملەكەتتىك جانە 65 جەكە بالا باقشالار سالىندى. اۋداننىڭ اكىمشىلىك-ىسكەرلىك ورتالىعى بوي كوتەردى، مۇندا اۋداندىق اكىمدىك، حقكو، احاج، پروكۋراتۋرا، سوت جانە باسقالارى ورنالاسقان.