گرۋزيانىڭ تۇڭعىش پرەزيدەنتى زۆياد گامساحۋرديانىڭ ۇلدارى كونستانتين مەن سوتنە گامساحۋرديالار تبيليسيدەگى باس پروكۋراتۋرا عيماراتىنىڭ فويەسىندە اشتىق اكسياسىن باستادى دەپ جازادى Qamshy.kz اقپارات اگەنتتىگى ازاتتىقتىڭ دەرەگىن نەگىزگە الىپ. ولار 1993 جىلى جەلتوقساندا قازا تاپقان پرەزيدەنت زۆياد گامساحۋرديانى ءولتىرۋ وقيعاسى بويىنشا قىلمىستىق ءىس قوزعالۋىن تالاپ ەتىپ وتىر. نارازىلىق اكسياسى زۆياد گامساحۋرديانىڭ قازا تاپقانىنا 25 جىل تولۋىنا ورايلاستىرىلعان.
رەسمي دەرەك بويىنشا، 1991 جىلى مامىردىڭ 26-سى كۇنى گرۋزيا پرەزيدەنتى بولىپ سايلانعان زۆياد گامساحۋرديا 1993 جىلى جەلتوقساننىڭ 30-ىندا، ازامات سوعىسى اياقتالعاننان كەيىن، ونىڭ باسشىلىعىنداعى جاساق گرۋزيانىڭ ەكىنشى پرەزيدەنتى ەدۋارد شيەۆاردنادزەنىڭ قارۋلى توپتارىنان جەڭىلگەن سوڭ وز-وزىنە قول سالعان.
كەي دەرەكتەردە جەكە كۇزەتىمەن بىرگە ەلدىڭ باتىسىنداعى حيبۋلا اۋىلىنا جاسىرىنعان زۆياد گامساحۋرديانىڭ اۋىلدى گرۋزين ارنايى قىزمەتى وكىلدەرى قورشاۋعا العاننان كەيىن ءوزىن ءوزى ءولتىرۋ تۋرالى شەشىمگە كەلگەنى ايتىلادى.
ءبىراق، تۇڭعىش پرەزيدەنتتىڭ ۇلدارى اكەلەرى "وز-وزىنە قول سالعان" دەگەنگە سەنبەيدى جانە قىلمىستىق ءىستى "ايىپتى اۋىرلاتاتىن جاعدايدا مەملەكەتتىك قايراتكەردى ءولتىرۋ" بابى بويىنشا قايتا وزگەرتۋدى بىرنەشە جىلدان بەرى تالاپ ەتىپ كەلەدى.
كونستانتين جانە سوتنە گامساحۋرديالار ەلدىڭ تۇڭعىش پرەزيدەنتى بولعان اكەلەرىن ونىڭ جەكە كۇزەتىندە بولعان بىرەۋدىڭ قاتىسۋىمەن گرۋزين ارنايى قىزمەتى ولتىرگەن، ال پرەزيدەنتتى ءولتىرۋ تۋرالى بۇيرىقتى گرۋزيانىڭ سول كەزدەگى باسشىسى، بۇرىنعى سسسر سىرتقى ىستەر ءمينيسترى، قازىردە مارقۇم بولعان ەدۋارد شيەۆارنادزە بەرگەن دەپ سانايدى.
كوزى تىرىسىندە شيەۆاردنادزەنىڭ ءوزى جانە ونىڭ توڭىرەگىندە بولعاندار زۆياد گامساحۋرديانى ءولتىرۋ قىلمىسىنا قاتىستى ايىپتاۋلاردى ۇزىلدى-كەسىلدى جوققا شىعارعان. گرۋزيانىڭ بۇرىنعى مەملەكەتتىك قاۋىپسىزدىك قىزمەتىنىڭ باسشىسى، ءقازىر ماسكەۋدە تۇراتىن يگور گيورگادزە 1993 جىلدىڭ سوڭىندا زۆياد گامساحۋرديا جاسىرىنعان اۋىلدى ارنايى قىزمەتتىڭ قورشاۋعا العانىن جاسىرمايدى. ءبىراق، ونىڭ سوزىنشە، گامساحۋرديانى ەشكىم ولتىرمەگەن، ول 1992 جىلى قاڭتاردا مەملەكەتتىك توڭكەرىس ناتيجەسىندە بيلىكتەن تايدىرىلعاننان كەيىن ۇنەمى وزىمەن بىرگە الىپ جۇرگەن تاپانشادان ءوز سامايىنا اتىپ، ومىرمەن قوشتاسقان.
توڭكەرىستەن كەيىن زۆياد گامساحۋرديا وتباسىمەن بىرگە شەشەنستاننىڭ تۇڭعىش پرەزيدەنتى دجوحار دۋدايەۆتىڭ قامقورلىعىمەن گروزنىي قالاسىندا تۇرعان. ءبىراق گرۋزياداعى ازامات سوعىسىمەن ءبىر مەزگىلدە جۇرگەن گرۋزين-ابحاز سوعىسى اياقتالاردان بىرنەشە كۇن بۇرىن وتانىنا ورالعان.
گرۋزيا باس پروكۋراتۋراسى اشتىق اكسياسىنا قاتىستى ازىرشە ەش كوممەنتاريي بەرگەن جوق. تەرگەۋ ورگانىنىڭ رەسمي وكىلى "تۇڭعىش پرەزيدەنتتىڭ قازاسى بويىنشا تەرگەۋ جالعاسىپ جاتقانىن" عانا ايتقان.
پىكىر قالدىرۋ