وبلىس اكىمى بەردىبەك ساپاربايەۆتىڭ اقتوبەلىك دارىندى بالالارعا ارنالعان جاڭاجىلدىق شىرشاسى ءوتتى. جەكپە-جەك سارايىندا وتكەن مەرەكەلىك كەشكە وبلىستىڭ 213 دارىندى وقۋشىسى قاتىستى.

بالالار سارايدىڭ كەڭ زالىندا ورناتىلعان جاسىل شىرشا ماڭىندا بي بيلەپ، ءان شىرقادى. ەرتەگىلەر ەلىنە ساياحات جاساپ، «اليسا عاجايىپتار ەلىندە» اتتى جاڭاجىلدىق قويىلىمنىڭ كۋاسى بولدى. ءداستۇر بويىنشا جاڭاجىلدىق شىرشانىڭ شامدارى جاعىلعان سوڭ وبلىس اكىمى بەردىبەك ساپاربايەۆ بالالاردى كەلە جاتقان جاڭا جىل مەرەكەسىمەن قۇتتىقتاپ، اق تىلەگىن جەتكىزدى.

— اينالايىن، بالالار، جاڭا جىل — سىزدەردىڭ اسىعا كۇتەتىن مەرەكەلەرىڭىزدىڭ ءبىرى. بۇگىنگى جاڭاجىلدىق شىرشانىڭ ەرەكشەلىگى — بۇعان ءبىزدىڭ اقتوبەنىڭ ەڭ جاقسى وقيتىن وقۋشىلارىمەن قاتار، حالىقارالىق، رەسپۋبليكالىق كونكۋرستاردىڭ جەڭىمپازدارى قاتىسىپ وتىر. سىزدەر — ءبىزدىڭ بولاشاعىمىزسىزدار. ءبىز سىزدەردىڭ قاتارلارىڭىزدان كەم بولماي، ءبىلىمدى، تاربيەلى، مادەنيەتتى بولىپ وسكەندەرىڭىزدى قالايمىز.

اقتوبەدە سوڭعى 10 جىلدا 5000-عا جۋىق بالا كوپتەگەن وليمپيادالاردىڭ جەڭىمپازى اتاندى. سەندەر سولاردىڭ جالعاسىسىڭدار. بۇگىنگى تاڭدا وڭىردە سالىنىپ جاتقان مەكتەپ، سپورت نىساندارى، مادەني ورىنداردىڭ بارلىعى تەك سىزدەر ءۇشىن. ءبىز سىزدەردىڭ زامان تالابىنا ساي جاڭا تەحنولوگيالاردى، جاڭا باعدارلامالاردى يگەرىپ، بولاشاقتا ەلىمىزدى دامىعان 30 ەلدىڭ قاتارىنا ەنۋى ءۇشىن ءوز ۇلەستەرىن قوسسىن دەگەن نيەتتە جۇمىس جاساپ جاتىرمىز. مەن سىزدەردىڭ بارلىعىڭىزدى وبلىس باسشىلىعىنىڭ اتىنان كەلە جاتقان جاڭا جىلدارىڭمەن قۇتتىقتايمىن. جاقسى وقىڭدار! اتا-انالارىڭدى، ۇستازدارىڭدى تىڭداڭدار. سپورتپەن، ونەرمەن شۇعىلدانىڭدار. سول كەزدە جەرلەس اعالارىڭ ديماش قۇدايبەرگەن سەكىلدى ەلىمىزدىڭ اتىن الەمگە تانىتاسىڭدار، — دەدى وبلىس اكىمى.

شارا بارىسىندا وبلىس اكىمىنىڭ اتىنان بالالارعا سىيلىقتار تارتۋ

ەتىلدى. تاتتىلەرمەن قاتار، ءتۇرلى ويىنشىقتار، اقىل-ويدى دامىتۋعا ارنالعان كونسترۋكتورلار تاراتىلدى. مەرەكەلىك شاراعا قاتىسۋشىلاردىڭ ءبىرى — شالقار قالاسىنىڭ №5 مەكتەپ-ليسەيىنىڭ 6-سىنىپ وقۋشىسى نايمان حاميت.

— وبلىس اكىمىنىڭ شىرشاسىنا العاش قاتىسۋىم. بۇگىنگى مەرەكەلىك شاراعا قاتىسۋ كىمگە بولسا دا ۇلكەن مارتەبە دەپ بىلەمىن. وتە قۋانىشتىمىن. كوڭىل كۇيىم دە تاماشا. ارينە، بۇل وقۋداعى جەتىستىكتەرىمنىڭ ارقاسى. بولاشاقتا ەلىمىزدىڭ اتىن الەمگە تانىتار دارىگەر بولعىم كەلەدى. ول ءۇشىن بۇگىننەن باستاپ وقۋ كەرەك، — دەيدى نايمان.

وبلىستىق ءبىلىم باسقارماسىنىڭ باسشىسى ءلاززات ورازبايەۆانىڭ ايتۋىنشا،وڭىردە جاڭا جىلدىق شىرشالار 24 جەلتوقساننان باستالعان جانە ول 31 جەلتوقسانعا دەيىن جالعاسادى.سونداي-اق وبلىستىڭ باس ۇستازى بيىل وبلىستىق ءبىلىم باسقارماسىنىڭ ۇيىمداستىرۋىمەن 31 جەلتوقسان كۇنى ساعات 10.00-دە «بالالارعا قۋانىش سىيلا!» اتتى كەڭ اۋقىمدى اكسياسى وتەتىندىگىن ايتتى. اكسيا اياسىندا ەرەكشە ءبىلىم بەرۋدى قاجەت ەتەتىن 3626 بالاعا ءبىر مەزەتتە مەملەكەتتىك مەكەمە وكىلدەرى، اياز اتا مەن اقشاقار ارنايى بارىپ سىيلىقتار تابىس ەتەدى