اقتوبەدە وتباسىلى مۇگەدەك جانداردىڭ باسپانالى بولۋ ارمانى جاڭا جىل قارساڭىندا ورىندالدى.
جاڭا جىل قارساڭىندا اقتوبە وبلىسىنىڭ اكىمى بەردىبەك ساپاربايەۆ ەرلى-زايىپتى ەسقالييەۆتەردى قۇتتىقتادى.
ەرلى-زايىپتى مارال مەن ناتاليا – ءبىرىنشى جانە ەكىنشى توپتاعى مۇگەدەك جاندار، الايدا ولاردىڭ ءومىرى تاڭعالۋعا جانە قولداۋعا تۇرارلىق.
ولار ادام تاباندىلىقپەن جانە جۇمىسپەن قيىندىقتى جەڭە الاتىندىعىنا، ءتىپتى مۇگەدەكتىكتىڭ اۋىر ءتۇرى ۇكىم ەمەس ەكەنىنە دالەل.
مارال ەسقالييەۆ: «مەن قارتتار مەن مۇگەدەكتەر ينتەرنات ۇيىنە 2012 جىلى كولىك اپاتىنا ۇشىراعاننان كەيىن كەلدىم. 2015 جىلى سوندا ناتاليامەن تانىسىپ، كەيىن وتباسىن قۇرامىز دەپ شەشتىك. ينتەرنات ءۇيىنىڭ باسشىلىعى بىزگە بولمە بەردى. سوندا تۇردىق»، - دەپ ەسىنە الدى.
ءبىر جىلدان كەيىن ناتاليا تىگىن ماشيناسىن الىپ، تاپسىرىسپەن توسەك-ورىن جابدىعىن تىگە باستايدى. سول كەزدە ينتەرنات ۇيىندە جانۇياعا ءبىر بولمە بەرىلگەن.
«وسى ۋاقىتقا دەيىن ءبىز باسپاناعا جينادىق، 3 ملن تەڭگە جينالدى. كەيىن جەرگىلىكتى بيلىككە ءوتىنىش ءبىلدىرىپ، ولار ءبىزدى قولدادى دا دەمەۋشى تاۋىپ بەردى. ءسويتىپ، «قازحروم» تۇك» تاعى 5 ملن تەڭگە بەردى. ءۇيدى ءوزىمىز تاڭدادىق، قالا ورتالىعىندا ءبىرىنشى قاباتتا ورنالاسقان ەكى بولمەلى پاتەر. بىزگە ورنالاسقان جەرى، اۋدانى ۇنادى. مۇندا جاقىن جەردە جەلەكجول بار، قىدىرۋعا بولادى»،- دەپ ەسقالييەۆتەردىڭ وتاعاسى ءسوزىن جالعاستىردى.
وبلىس اكىمى باقىتتى جاڭا قونىس يەلەرىن وسىنداي ماڭىزدى وقيعالارىمەن جانە كەلە جاتقان جاڭا جىلدارىمەن قۇتتىقتادى. ولارعا كۇش-قۋاتتارىن، وپتيميزم مەن رۋحاني سەرگەكتىكتى ۇزاق جىلدار بويى ساقتاۋدى تىلەپ، مارال ەسقالييەۆكە زاماناۋي مۇگەدەكتەر ارباسى مەن ءۇيدىڭ وتاناسىنا تۇرمىستىق تەحنيكا سىيلادى.
