جەكپە-جەك سپورت سارايىندا اقتوبەلىك وقۋشىلار ءۇشىن وبلىس اكىمى اتىنان جاڭاجىلدىق شىرشا وتكىزىلدى. كوڭىلدى كەشكە الەۋمەتتىك جاعىنان از قامتىلعان جانە كوپبالالى وتباسىنان شىققان، سونداي-اق ءتۇرلى جەتىستىكتەرىمەن مەكتەپ مەرەيىن اسقاقتاتىپ جۇرگەن 200-گە جۋىق وقۋشى جينالدى.

مەرەكەلىك شارادا وقۋشىلار جاسىل شىرشا ماڭىنا توپتاسىپ، ءان شىرقاپ، بي بيلەدى. ولار «اليسا عاجايىپتار ەلىندە» اتتى مەرەكەلىك قويىلىمدى تاماشالاپ، ەرتەگىلەر ەلىنە ساياحات جاسادى. ەرتەگى كەيىپكەرلەرى كەشتىڭ كىشكەنتاي قوناقتارىن وزدەرىنە تەز باۋراپ الدى. ءداستۇر بويىنشا بالالار اياز اتا مەن اقشاقاردى ورتاعا الىپ، سيقىرلى تاياقشامەن شىرشا شامدارىن جاقتى. سودان كەيىن ولار كوڭىلدى بايقاۋلار مەن ۆيكتورينالىق ويىندارعا بەلسەنە قاتىستى.

بۇدان كەيىن وبلىس اكىمى بەردىبەك ساپاربايەۆ بالالارعا اق تىلەگىن، ىستىق لەبىزىن جەتكىزدى. وقۋشىلاردىڭ مەرەكەلىك كەشىنە وبلىستىق ءماسليحاتتىڭ حاتشىسى ءسانيا قالدىعۇلوۆا دا كەلدى.

— اينالايىن، بالالار! بارلىعىمىزدىڭ، اسىرەسە سىزدەردىڭ ەڭ جاقسى كورەتىن، اسىعا كۇتەتىن مەرەكەلەرىڭىزدىڭ ءبىرى — جاڭا جىل. ويتكەنى كىشكەنتاي بالادان، ەڭكەيگەن قارياعا دەيىن جاڭا جىلدان وزىنە جاقسىلىق، وزگەرىستەر كۇتەدى. مىنە، سىزدەر دە اياز اتا، اقشاقارمەن بىرىگىپ، 2019 جىلدى كۇتىپ الۋعا كەلدىڭىزدەر. سىزدەر ءۇشىن 2018 جىل جامان بولعان جوق. ساباقتى جاقسى وقىدىڭدار، ءتارتىپتى بولدىڭدار. الداعى ۋاقىتتا دا سپورتپەن، ونەرمەن اينالىسىپ، اتا-انانىڭ، ۇستازدارىڭنىڭ ايتقانىن تىڭداپ، ساباقتى جاقسى وقۋ، وزگەلەرگە ۇلگى، ونەگە كورسەتۋ — سىزدەردىڭ باستى مىندەتتەرىڭ. سىزدەر نەعۇرلىم ءبىلىمدى، تاربيەلى بولساڭىزدار، بولاشاقتا ۇلكەن ازامات بولىپ، ەلىمىزدىڭ دامۋىنا ۇلەس قوساسىزدار، — دەدى بەردىبەك ساپاربايەۆ.

شىرشا مەرەكەسىندە وبلىس باسشىسى ءاربىر بالاعا 20 مىڭ تەڭگەنىڭ سەرتيفيكاتى مەن ءتاتتى سىيلىقتار ۇسىندى. كەش قوناقتارىنا جىل يەسى بەينەلەنگەن جۇمساق ويىنشىقتار دا سىيعا تارتىلدى.

ارۋجان ۇسىنعالييەۆا، اقتوبە قالاسىنداعى №67 ورتا مەكتەپتىڭ 7-سىنىپ وقۋشىسى:

— وسىنداي ءزاۋلىم سارايدا ءوتىپ جاتقان مەرەكەگە كەلگەنىمە قۋانىشتىمىن. بىزدەرگە قۋانىش سىيلاپ، سىيلىق بەرىپ جاتقان بەردىبەك اعاعا ۇلكەن راقمەتىمدى ايتامىن. ءقازىر مەن مەكتەبىمدە بي ۇيىرمەسىنە قاتىسامىن. بي بيلەگەندى جاقسى كورەمىن. بولاشاقتا ءتۇرلى بايقاۋلارعا قاتىسىپ، مەكتەبىمنىڭ مەرەيىن كوتەرەتىن بولامىن.

الىشەر جاڭبىربايەۆ، اقتوبە قالاسىنداعى م.ارىنوۆ اتىنداعى قارعالى قازاق ورتا مەكتەبىنىڭ 6-سىنىپ وقۋشىسى:

—ۇلكەن شىرشانى العاش رەت كورىپ تۇرمىن. وبلىس اكىمى اتىنان ۇيىمداستىرىلعان بۇل مەرەكەگە قاتىساتىنىمدى ەستىگەندە، ەرەكشە قۋاندىم. ءقازىر مەن گرەك-ريم كۇرەسىنەن ءتۇرلى جارىستارعا قاتىسىپ ءجۇرمىن. بىرنەشە رەت رەسپۋبليكالىق بايقاۋلاردان جۇلدەمەن ورالدىم. بيىلدىڭ وزىندە قوستاناي، باتىس قازاقستان وبلىستارىندا وتكەن جارىستارعا قاتىستىم. بۇل ورايدا مەن جاتتىقتىرۋشىم جاسۇلان قۇلىبايەۆقا ەرەكشە العىسىمدى بىلدىرگىم كەلەدى. وبلىستىق ءبىلىم باسقارماسى جاڭا جىل قارساڭىندا، ياعني بيىل 31 جەلتوقسان كۇنى ساعات 10.00-دە «بالالارعا

قۋانىش سىيلا!» اتتى كەڭ اۋقىمدى اكسيانىڭ وتەتىنىن جاريالادى. باسقارمانىڭ باس مامانى فاتيما ايتبايەۆانىڭ ايتۋىنشا، اكسيا اياسىندا ەرەكشە ءبىلىم بەرۋدى قاجەت ەتەتىن 3626 بالانى مەمەلكەتتىك مەكەمە وكىلدەرى اياز اتا مەن اقشاقارمەن بىرگە قۇتتىقتاپ، سىيلىق بەرەتىن بولادى.