اقتوبە وبلىسىنىڭ اكىمى بەردىبەك ساپاربايەۆ جۇمىس بابىمەن بايعانين اۋدانىندا بولىپ، وبلىس ورتالىعىنان شالعاي جاتقان اۋىلدارعا باردى، ولاردىڭ دامۋىمەن، جاڭا نىسانداردىڭ قۇرىلىسىمەن جانە اۋىل حالقىنىڭ تۇرمىسىمەن تانىستى، سونداي-اق جۇرتشىلىقتى مەرەكەمەن قۇتتىقتادى.
اۋدان اكىمى اسقار شەريازدانوۆ وبلىس باسشىسىنا جەرگىلىكتى جاعدايدى، اتقارىلىپ جاتقان جۇمىستاردى قىسقاشا تانىستىردى. بەردىبەك ساپاربايەۆ ەرتەمەن اقتوبەدەن 370 شاقىرىم جەردە ورنالاسقان جارقامىس اۋىلىنا كەلدى. اۋىل بيىل ورتالىقتاندىرىلعان اۋىزسۋمەن جابدىقتاۋ جۇيەسىمەن قامتىلعان بولاتىن. بۇل ماقساتقا مەملەكەت 230 ميلليون تەڭگەدەن استام قاراجات ءبولدى. قۇرىلىس 2017 جىلى تامىزدا باستالىپ، وسى جىلدىڭ قازان ايىندا اياقتالدى. وبلىس اكىمى سورعىلاۋ بەكەتىن، ۇڭعىمانى، ەلەكترمەن جابدىقتاۋدىڭ اۆتونومدى جۇيەسىن قاراپ شىقتى.
بايعانين اۋىلىندا 24 ەلدى مەكەننىڭ 10-ى ورتالىقتاندىرىلعان سۋمەن جابدىقتاۋ جۇيەسىمەن قامتىلعان. ايتا كەتۋ كەرەك، بەس اۋىلعا بيىل سۋمەن جابدىقتاۋ جۇيەسى جۇرگىزىلدى، بۇل ميالى، ويماۋىت، كەمەرشي، ەبەيتى جانە جارقامىس اۋىلدارى.
اۋداندا ساپالى اۋىزسۋمەن قامتۋمەن قاتار، گاز جەلىسىنە قوسۋ جۇمىستارى دا بەلسەندى جۇرگىزىلىپ جاتىر. بيىلعى جىلى كەمەرشي، بۇلاقتىكول، جاڭاتاڭ، جارلى اۋىلدارىندا گاز جۇيەلەرىنىڭ قۇرىلىسى باستالدى.
وبلىس اكىمى وسى ساپاردا جاڭادان اشىلعان «بوتاقان» بالاباقشاسىنا باردى. مەكتەپكە دەيىنگى مەكەمە مەملەكەتتىك تاپسىرىس اياسىندا جۇمىس جاسايدى جانە وسى جىلدىڭ قىركۇيەك ايىندا العاشقى تاربيەلەنۋشىلەرىن قابىلدادى. مەكتەپكە دەيىنگى مەكەمەنىڭ بارلىق ستاندارتتارىنا ساي جابدىقتالعان جاڭا كەڭ عيمارات اۋىلداعى كونە شاعىن ورتالىقتى جابۋعا مۇمكىندىك بەردى. ايتا كەتەيىك، بۇگىندە بايعانين اۋدانى وبلىستىڭ باسقا دا اۋداندارى سەكىلدى بالاباقشامەن 100% قامتىلعان.
وبلىس اكىمى سونداي-اق «Samruk KazynaTrust» الەۋمەتتىك جوبالاردى دامىتۋ قورىنىڭ «مەنىڭ ەلىم» باعدارلاماسى اياسىندا سالعان بالالار ويىن الاڭىن قاراپ شىقتى. مۇندا بالالار ءۇشىن ۆوركاۋتپەن اينالىساتىن، جازدا فۋتبول، قىستا حوككەي وينايتىن الاڭ بار، بالالار الاڭى ورناتىلدى. جوبا قۇنى — 58 ميلليون تەڭگە. «Samruk KazynaTrust» وسىنداي الاڭدى بيىل قاراۋىلكەلدى اۋىلىنا دا سالعان.
جارقامىستاعى ساپار 150 ورىندىق جاڭا مادەنيەت ءۇيىنىڭ سالتاناتتى اشىلۋىنا قاتىسۋمەن اياقتالدى. عيمارات اۋدان بيۋدجەتىنە تۇرعىزىلعان. جوبانى جۇزەگە اسىرۋعا بارلىعى 86 ميلليون تەڭگە جۇمسالدى. مادەنيەت ۇيىندە وبلىس اكىمى اۋىل تۇرعىندارىمەن اڭگىمەلەسىپ، تۇڭعىش پرەزيدەنت مەرەكەسىمەن قۇتتىقتادى.
— سىزدەر ەلباسىنىڭ اۋىلداردى دامىتۋعا قانشالىقتى كوڭىل ءبولىپ وتىرعانىن بىلەسىزدەر. پرەزيدەنت جۋىرداعى جولداۋىندا «اۋىل – ەل بەسىگى» ارنايى جوباسىنىڭ باستالعانىن جاريالادى. سونىڭ اياسىندا اۋىلدىق اۋماقتاردىڭ الەۋمەتتىك ورتاسىن جاڭعىرتۋ تاپسىرمالارى بەرىلدى. مەملەكەت تاراپىنان ءبىر عانا جارقامىس اۋىلىن دامىتۋعا بيىلعى جىلى 500 ميلليون تەڭگە ءبولىندى. سونىڭ ارقاسىندا اۋىل سۋمەن قامتىلدى، گاز بەن جارىق بار. ەندى ءبارى سىزدەرگە بايلانىستى. جانۇيالارىڭىز بەن تۋعان اۋىلدارىڭىزدىڭ يگىلىگى ءۇشىن ەڭبەكتەنىڭىزدەر، بالالارىڭىزدى ەڭبەككە، ادەپتىلىككە ۇيرەتىڭىزدەر. ەڭبەك پەن جوعارى ينتەللەكتۋالدى، رۋحاني باي قوعام — بولاشاق ۇرپاقتىڭ يگىلىگى مەن ەل كەلەشەگىنىڭ كەپىلى. بۇگىن مەن سىزدەردى تۇڭعىش پرەزيدەنت كۇنىمەن، سونىمەن قاتار مادەنيەت ءۇيىنىڭ اشىلۋىمەن قۇتتىقتايمىن. سىزدەرگە مىقتى دەنساۋلىق، وتباستارىڭىزعا بەرەكە، ەلىمىزدە بەيبىتشىلىك پەن كەلىسىم بولسىن دەپ تىلەيمىن، — دەدى بەردىبەك ساپاربايەۆ.
بۇرىنعى مادەنيەت ءۇيى 1957 جىلى سالىنعان، ال بەس جىل بۇرىن عيمارات اپاتتى جاعدايدا دەپ تانىلدى. سونىڭ سالدارىنان بالالاردىڭ بارلىق ۇيىرمە ساباقتارى مەكتەپتە ءوتتى. اۋىل تۇرعىندارى بىلتىر بيلىكتەن جاڭا مادەنيەت ءۇيىن سۇراعان بولاتىن. جاڭا مادەنيەت ۇيىندە ەندىگى بيمەن، سۋرەت سالۋمەن، قولدانبالى ونەرمەن جانە ت.ب. اينالىساتىن بولمەلەر بار. جۇزگە جۋىق بالا ۇيىرمەگە باراتىن بولادى.
وبلىس باسشىسىنىڭ بايعانين اۋدانىنداعى جۇمىس ساپارى قوجاساي مۇناي-گاز كەن ورنىندا جالعاستى. مۇندا وبلىس اكىمى قۇنى 42 ميلليارد تەڭگە بولاتىن «Gas Processing Company» جشس-نىڭ گاز وڭدەۋ كەشەنىن پايدالانۋعا بەرۋ ءۇشىن دايىندىق بارىسىن تەكسەردى. كاسىپورىن جىل سايىن 350 ميلليون تەكشە مەتر ىلەسپە گاز وڭدەپ، ونى قۇرعاق تاۋارلى گازعا، گازدى كۇكىرتكە، پروپانبۋتان قوسپاسىنا اينالدىرادى. قۇرىلىس كەزىندە 1500 ادام جۇمىسپەن قامتىلدى، پايدالانۋعا بەرىلگەن سوڭ 250 ادام تۇراقتى جۇمىسقا ورنالاسادى.
