قوعامداعى يدەولوگيا داۋى سەيىلمەي تۇر. قاراشانىڭ باسىندا استانادا وتكەن فورۋمدا مارعۇلان سەيسەمبايەۆتىڭ يدەولوگيا تۇرعىسىندا ايتقاندارى الەۋمەتتىڭ تالقىسىنا ءتۇستى. بيزنەسمەننىڭ ايتۋىنشا، مەملەكەتتە يدەولوگيالىق ساياسات جۇمىس ىستەمەيدى. كۇنى كەشە مارعۇلان سەيسەمبايەۆتىڭ مۇنداي پىكىرىنە ق ر اقپارات جانە كوممۋنيكاسيالار ءمينيسترى داۋرەن ابايەۆ جاۋاپ بەرگەن ەدى. مينيستر "رۋحاني جاڭعىرۋ" باعدارلاماسىن العا تارتىپ، جاستاردىڭ وزگەرىسكە ۇمتىلىپ جاتقانىن ايتقان. ابايەۆتىڭ جاۋابىنا العىس بىلدىرگەن مارعۇلان سەيسەمبايەۆ ءوز ايتقانىنا قايتپادى. "قوعامدا يدەولوگيا جوق" دەيدى.
بيزنەسمەننىڭ مينيتسرگە ۆيدەو تۇرىندەگى جاۋابى تومەندە.
قۇرمەتتى داۋرەن ابايەۆ مىرزا!
بىرىنشىدەن، ماعان وسىلاي ساۋاتتى جاۋاپ بەرگەنىڭىز ءۇشىن كوپ راقمەت! شىنىن ايتسام، مۇنداي جاۋاپتى كۇتپەدىم. ۇكىمەت تاراپىنان وسىلاي قوعاممەن پىكىر الىسىپ، وزەكتى ماسەلەلەردى تالقىلاۋعا دايىندىق كورسەتكەن ارەكەتىڭىز ماقتان تۇتارلىق ءىس. ارينە، ۇكىمەت تاراپىنان يدەولوگيا سالاسىنا جاسالىپ جاتقان جۇمىستار وتە كوپ، قابىلدانعان باعدارلامالار وتە جاقسى، ماقساتتارى دۇرىس. ءبىراق ءسىز ايتقان سوزدەرمەن كەلىسە وتىرىپ، قوعامنىڭ كوكىرەگىندە جۇرگەن بىرنەشە ماسەلەنى تالقىلاعىم كەلىپ وتىر. يدەولوگيا – قوعامنىڭ جۇرەگىنە ءسىڭىپ، ويىن ارباپ، العا جەتەلەمەسە، كەلەشەككە دەگەن سەنىمدىلىك تۋعىزباسا، مەنىڭ ويىمشا، ونداي يدەولوگيا ءوزىنىڭ بار كۇش-قۋاتىمەن جۇمىس جاسامايدى. ونىڭ باستى سەبەبى، قوعامداعى سەنبەۋشىلىك: شەنەۋنىكتەرگە، بيزنەسمەندەرگە، ءتىپتى ءوزارا بىر-بىرىنە سەنبەيدى. قوعامداعى سەنىمسىزدىك – وتە ءقاۋىپتى نارسە. سەنىمسىزدىك بولعان جەردە ەشقانداي يدەولوگيا جۇرمەيدى. ءوزىڭىز دە بايقاعان بولارسىز، الەۋمەتتىك جەلىدە بولىپ جاتقان داۋلارعا قاراساڭىزدار، ءبارى بىر-بىرىنە جاۋ. بۇل وتە جامان بەلگى. وسىنىڭ كەسىرىنەن كورشى ەلدەردىڭ اگرەسسيۆتىك يدەولوگياسى وپ-وڭاي ءسىڭىپ كەتەدى. سوندىقتان ۇلتتىق ءبولىنىس پايدا بولىپ كەلە جاتىر. ەرتەڭ ەلىمىزگە قانداي دا ءبىر قاتەر تۋسا، ەلىمىز تالان-تاراجعا سالىنىپ كەتۋى مۇمكىن. سونى ەسكەرە وتىرىپ، قازىردەن باستاپ ەل بولىپ، قوعام بولىپ بارلىق ماسەلەلەردى بىرگە اقىلداسىپ شەشكەن دۇرىس دەپ ويلايمىن. كەلەسى جىل جالپى جاھانعا قيىن جىل بولايىن دەپ تۇر. قۇندى قاعازداردىڭ نارىعى مەن شيكىزات تاۋارلارىنىڭ باعاسى قۇزدان قۇلاعان تاستاي بولىپ كەلە جاتىر. مۇنىڭ ءبارى مەملەكەتىمىزگە ۇلكەن سىن بولادى. سول سەبەپتى، بىر-بىرىمىزگە دەگەن سەنىمدىلىكتى كۇشەيتۋ ءۇشىن ءۇش شارت جاساۋىمىز كەرەك:
ءبىرىنشى – ءبىر-بىرىمىزدى ەستۋ، تىڭداۋ، ءتۇسىنۋ، وزگەنىڭ پىكىر ايتۋىنا مۇمكىندىك بەرۋ؛
ەكىنشى – ايتىلعان ءسوز بەن ىستەگەن ءىستىڭ بىرلىگى؛
ءۇشىنشى – ىستەگەن ءىس پەن ونىڭ ناتيجەسىنە جاۋاپكەرشىلىك.
وسى ءۇش شارتتى قوعام (شەنەۋنىك، بيزنەسمەن، يا ءمۇعالىم) بولىپ ورىنداساق، ارامىزداعى سەنىمسىزدىك مۇزى ەريدى. سوندا عانا ءبىزدى جاۋ الماي، تالاماي، بولمەي، وركەنيەتتى ەلدەر قاتارىنا كىرە الامىز دەپ سەنەمىن. ءبىز باقىتتى ەلمىز، ءبىراق قولداعى تاۋەلسىزدىككە يە بولا الماساق، تاريحي مۇمكىندىگىمىزدى قولدانا الماساق، ۇرپاعىمىزدىڭ، قازاق حالقىنىڭ قارعىسىنا قالامىز. وسىنىڭ ءبارىن ورىنداۋعا، بىرىگىپ جۇمىس ىستەۋگە دايىنبىز.
داۋكە، جاۋابىڭىزعا تاعى دا راقمەت ايتامىن. سالەممەن مارعۇلان!
