ەلىمىزدە شايبالى حوككەيدەن قازاقستان جاستار ليگاسىنىڭ ءوتىپ جاتقانى بەلگىلى. كەشە وبلىس اكىمى بەردىبەك ساپاربايەۆ اقتوبە قالاسىنىڭ باتىس-2 شاعىن اۋدانىندا بوي كوتەرگەن مۇز سارايىندا «اقتوبە» جانە «استانا» حوككەي كوماندالارى اراسىنداعى ويىندى تاماشالادى.

وبلىستىق دەنە شىنىقتىرۋ جانە سپورت باسقارماسىنىڭ باسشىسى مەيرامبەك ماحامبەتوۆ جاستار ليگاسىندا اقتوبەلىك حوككەي كومانداسىنىڭ كوشباسشىلار قاتارىندا ەكەنىن ايتتى.

— اقتوبە قالاسىندا قازاقستان جاستار ليگاسى اراسىندا ويىن ءوتىپ جاتىر. «اقتوبە» جانە «استانا» حوككەي كوماندالارى اراسىندا وتكەن ءبىرىنشى ويىندا جەرلەستەرىمىز جەڭىسكە جەتكەن بولاتىن. جالپى حوككەي ويىنىنىڭ ەرەكشەلىگى — تۋرلار كەزىندە ەكى ويىن قاتار وتكىزىلەدى. ءبىرىنشى ويىندا جەرلەستەرىمىز استانالىق كوماندانى 10:1 ەسەبىمەن ۇتتى. ءار ويىن بولەك ەسەپتەلەدى. بۇل — «اقتوبە» حوككەي كومانداسىنىڭ 16-ويىنى. بۇعان دەيىنگى بارلىق ويىندا جەڭىسكە جەتتى. ءقازىر تۋرنيرلىك كەستەدە ءۇشىنشى ورىندا تۇرمىز. الايدا ءبىز كوپ كوماندالاردىڭ اراسىندا 4-5 ويىن از وتكىزدىك. جەڭىلىس جوق، بارلىق ويىندا جەڭىپ كەلە جاتىرمىز، — دەدى م.ماحامبەتوۆ.

ونىڭ ايتۋىنشا، جاستار ليگاسىندا بارلىعى 10 كوماندا بار. كەلەر جىلدىڭ ءناۋرىز-ساۋىر ايلارىنا دەيىن كوماندالار اراسىندا ويىندار وتكىزىلەدى. بۇگىندە كوماندا قۇرامىندا 16-18 جاس ارالىعىنداعى ويىنشىلار ونەر كورسەتۋدە.

بيىل اقتوبەدە العاش رەت مانەرلەپ سىرعاناۋدان ەل چەمپيوناتى وتەدى. بۇل چەمپيوناتقا وليمپيادا ويىندارىنا قاتىسۋشى ايزا مامبەكوۆا، الانا توقتاروۆا، سونداي-اق جەرلەسىمىز داريا ۆدوۆينا قاتىسادى دەپ كۇتىلۋدە. سول سياقتى 28-29 جەلتوقسان كۇندەرى اقتوبەدەگى مۇز سارايىندا «مۇز جۇرەگى» اتتى مۇز شوۋى وتپەك. بۇل كورسەتىلىمدى الماتىلىق «ايس وليمپ» كومپانياسى ۇيىمداستىرماق. «مۇز جۇرەگى» اتتى شوۋ اقتوبەدە العاش رەت ۇيىمداستىرىلعالى جاتىر. بۇل — وتە اۋقىمدى، كاسىبي دەڭگەيدە وتكىزىلەتىن شوۋ. شوۋدىڭ ۇزاقتىعى — 80 مينۋت. سوندىقتان بارلىق اقتوبەلىكتى وسى شوۋدى تاماشالاۋعا شاقىرامىز، — دەدى باسقارما باسشىسى.

ويىن قورىتىندىسىندا «اقتوبە» كومانداسى 11:1 ەسەبىمەن جەڭىسكە جەتتى.