ىرعىز اۋدانىنداعى نۇرا، مامىر، بەلشەر اۋىلدارىنىڭ تۇرعىندارى ءۇشىن قۋانىشتى كۇن كەلدى. اۋىلعا سۋ كەلدى.

ەلباسى قازاقستاندىقتارعا ارناعان جولداۋىندا حالىقتىڭ تۇرمىسىن جاقسارتۋ، اۋىلداعى كۇردەلى ماسەلەلەردى شەشۋ جونىندە تاپسىرما بەرگەن بولاتىن. سونىڭ ءبىرى ىرعىز اۋدانىندا شەشىمىن تاپتى. نۇرا 1963 جىلى كەڭشار بولىپ قۇرىلعان-دى. ودان بەرى 55 جىل ءوتىپتى. وسى ۋاقىت ىشىندە تۇرعىندار اۋىزسۋعا جارىماي، تالاي قيىندىقتى باستاپ كەشىردى. مىنە، تاۋەلسىزدىكتىڭ ارقاسىندا اۋىلداعى بۇل ماسەلە شەشىلدى. اۋىزسۋدىڭ بەرىلۋىنە ىرعىز اۋدانىنىڭ اكىمى ءمادي ەلەۋسىزوۆ پەن وبلىستىق تابيعي رەسۋرستار جانە تابيعاتتى پايدالانۋدى رەتتەۋ باسقارماسىنىڭ باسشىسى نۇرجان اققۇل قاتىسىپ، تۇرعىندارعا جىلى لەبىزدەرىن ءبىلدىردى.

نۇرا اۋىلدىق وكرۋگىندەگى 4 ەلدى مەكەندە 27 شارۋا قوجالىعى، 16 كاسىپكەر، 4 مەكتەپ، 1 وتباسىلىق امبۋلاتوريا، 3 كلۋب، 3 فەلدشەرلىك پۋنكت جۇمىس جاسايدى. تاعى ءبىر قۋانارلىق جايت، الداعى ۋاقىتتا «بيلاين» ۇيالى بايلانىس قوندىرعىسى 4 ەلدى مەكەندى قامتيتىن بولادى.

— حالىقتىڭ قۋانىشىندا شەك جوق، ريزاشىلىعىمىزدى ايتىپ جەتكىزۋ مۇمكىن ەمەس. وسى كەزەڭگە دەيىن جاعالاي جاتقان كولدەردەن قىستا مۇزىن ويىپ، سۋ ىشكەن اعايىنعا بۇل ۇلكەن جاڭالىق. كۇرمەۋى قيىن ماسەلە بۇگىنگى تاڭدا مەملەكەتتىك باعدارلاما اياسىندا جۇزەگە اسىرىلىپ وتىر. «سۋ — تىرشىلىك كوزى» دەپ تەگىن ايتىلماعان. حالىق دەنساۋلىعىنىڭ مىقتى بولۋى اۋىزسۋدىڭ ساپاسىنا بايلانىستى ەكەنى انىق. سوندىقتان وسى باستامانىڭ باسى-قاسىندا جۇرگەن ازاماتتارعا العىسىمىز شەكسىز، — دەيدى «ايبەك» شارۋا قوجالىعىنىڭ باسشىسى ەرقوساي بالايەۆ.

ال ەڭبەك ارداگەرى ءابدىناتىپ ۇزاقوۆ بىلاي دەيدى:

— بۇل كۇردەلى ماسەلەنىڭ شەشىمىن تابۋىنا وبلىس اكىمى بەردىبەك ساپاربايەۆتىڭ قولداۋ كورسەتكەنىن ايقىن سەزىنەمىز. ەكىنشىدەن، جەرلەسىمىز، وسى ەلدىڭ پەرزەنتى، قازاقستان رەسپۋبليكاسى پارلامەنتى ءماجىلىسىنىڭ دەپۋتاتى اسىلبەك سماعۇلوۆقا، اۋدان باسشىلىعىنا، ەكى جىلدان بەرى سۋ قۇبىرىنىڭ قۇرىلىسىن جۇرگىزىپ كەلگەن «سترويكومپلەكت-2030» سەرىكتەستىگىنە العىسىمىزدى بىلدىرەمىز.

ايتا كەتۋ كەرەك، بيىلعى جىلى وكرۋگتەگى دۇكەن ەلدى مەكەنى ماڭايىنان اۋىزسۋ قورىن ىزدەۋ-زەرتتەۋ جۇمىستارى جۇرگىزىلۋدە. الداعى ۋاقىتتا بۇل اۋىلعا دا سۋ جۇيەسى تارتىلادى دەگەن ءۇمىت بار. بۇگىنگى كۇنى ءۇش ەلدى مەكەن تۇرعىندارىنىڭ ۇيىنە سالقىن، ىستىق سۋ كىرگىزىلىپ، كارىز جۇيەسى مەن زامان تالابىنا ساي قاجەتتى قوندىرعىلار جۇرگىزىلىپ جاتىر.