بۇگىن «نۇر وتان» پارتياسىنىڭ جاس ونەرتاپقىشتار اراسىنداعى رەسپۋبليكالىق «NURINTECH» يننوۆاسيالىق جوبالار بايقاۋىنىڭ جەڭىمپازدارى ماراپاتتالدى.
جەڭىمپازداردى قۇتتىقتاعان پارتيا ءتوراعاسىنىڭ ءبىرىنشى ورىنباسارى ماۋلەن اشىمبايەۆ اتالعان بايقاۋدىڭ ەلباسى تىكەلەي تاپسىرماسىمەن قولعا الىنعان جوبا ەكەنىن ايتتى. ونىڭ باستى ماقساتى – تالانتتى، بولاشاعىنان ءۇمىت كۇتتىرەتىن، عىلىم مەن يننوۆاسيادا تىڭ يدەيالاردى قولعا الىپ، جۇمىس ىستەپ جۇرگەن جاستارىمىزدى قولداۋ، ولارعا ءوز باستامالارىن تابىستى جۇزەگە اسىرۋعا جاعداي تۋعىزۋ.
ءوز سوزىندە ماۋلەن اشىمبايەۆ مۇنداي باستامالاردىڭ ەلىمىز ءۇشىن بەرەرى مول ەكەنىن ايتتى.
– بۇگىندە ەلىمىزدە ەلباسىمىزدىڭ باستاماسىمەن قازاقستاننىڭ ءۇشىنشى جاڭعىرۋى جۇزەگە اسىرىلىپ جاتىر. بۇل كەشەندى باعدارلامانىڭ نەگىزىندە ەلىمىزدىڭ تەحنولوگيالىق، يننوۆاسيالىق جانە ۇدەمەلى دامۋى كوزدەلگەن. تەحنولوگيالىق دامۋدىڭ نەگىزگى كىلتى عىلىمي جاڭالىقتار مەن يننوۆاسيا ەكەنى ءسوزسىز. سوندىقتان قازىرگى تاڭدا وسى باعىتتاعى باستامالاردى، ستارتاپتاردى، عىلىمي جانە ءىت-جوبالاردى قولداۋدىڭ ماڭىزى زور، – دەدى پارتيا ءتوراعاسىنىڭ ءبىرىنشى ورىنباسارى.
ودان بولەك، ماۋلەن اشىمبايەۆ جاستارعا ءوز كۇشتەرىنە سەنىپ، ويلارى مەن يدەيالارىن جۇزەگە اسىرۋ جولىندا تاباندىلىق تانىتىپ، ارمانىنا جەتۋ ءۇشىن ايانباي ەڭبەك ەتۋ كەرەكتىگىن ايتتى.
– ءبىز ءقازىر Google، Amazon، Apple، Microsoft، Tesla، Alibaba سياقتى ءىرى يننوۆاسيالىق كومپانيالاردىڭ ونىمدەرىن قولدانامىز. ولار دا ارمان مەن ماقساتتاردىڭ جانە تاباندى ەڭبەك پەن قاجىر-قايراتتىڭ جەمىسى. ولاردىڭ نەگىزىن قالاۋشىلار قولدارىندا مۇمكىندىك بولماسا دا ءوز جوبالارىنىڭ جەمىس بەرەتىنىنە سەنىپ، ەڭبەكتەنە ءبىلدى. سوندىقتان بۇگىنگىدەي تابىسقا جەتىپ وتىر. سول سەبەپتى سىزدەر دە ءوز مۇمكىندىكتەرىڭىزگە سەنىپ، جۇمىس ىستەۋلەرىڭىز كەرەك، – دەدى ماۋلەن اشىمبايەۆ.
بيىل قاتارىنان ءۇشىنشى رەت ۇيىمداستىرىلعان بايقاۋعا 1000-نان استام جۇمىس كەلىپ تۇسكەن. ناتيجەسىندە ءۇش اتالىم بويىنشا جەڭىمپازدار مەن جۇلدەگەرلەر انىقتالدى. ولاردىڭ ءارقايسىسىنا قارجىلاي سىيلىقتار تابىس ەتىلدى. اتاپ ايتقاندا، 1-ورىن العان جاس عالىمدارعا 1 ميلليون تەڭگە سىياقى تاعايىندالسا، 2-ورىن يەگەرلەرىنە – 500 مىڭ، 3-ورىن العان ونەرتاپقىشتارعا 250 مىڭ تەڭگەدەن بەرىلدى. بايقاۋدىڭ جالپى جۇلدە قورى 5 ميلليون تەڭگەنى قۇرادى.
پىكىر قالدىرۋ