كۇندەلىكتى ومىردە ءارقايسىسىمىزدىڭ ءوز ەرەجەمىز بەن ۇستاناتىن جەكە سالتىمىز بار. ءبىزدى كەيدە مۇنداي ادەتتەر كوپشىلىكتەن ەرەكشەلەيتىن بولسا، كەيدە ەرسى كورسەتۋى دە مۇمكىن. ءىى ەليزاۆەتا پاتشايىمنىڭ دا ەلدەن ەرەكشەلەپ تۇراتىن ادەتتەرى بار. Qamshy.kz اقپارات اگەنتتىگى 66 جىل ۇلىبريتانيانى بيلەپ، ەل باسقارۋ ىسىندە رەكورد جاڭارتقان ايگىلى پاتشايىم ۇستاناتىن ەرەكشە ەرەجەلەردى وقىرمان نازارىنا ۇسىنادى.

ساپار كەزىندە پاتشايىم قانى قۇيىلعان قالتاشانى ۇنەمى الىپ جۇرەدى

ول ساپارعا نەمەسە ساياحاتقا شىققاندا ءاردايىم ءوزىنىڭ قانى قۇيىلعان ارنايى قالتاشانى الىپ جۇرەدى. پاتشايىم – بريتان مونارحتارىنىڭ ىشىندەگى ەڭ كوپ ساياحاتتاعان بيلەۋشى. سوندىقتان ول كەز كەلگەن ءقاۋىپتى جاعدايلارعا دايىن بولۋى كەرەك. ونىڭ جانىندا مىندەتتى تۇردە ارنايى دارىگەر جۇرەدى. قانداي دا ءبىر ءقاۋىپتى جاعداي ورىن الاتىن بولسا دارىگەر قان قۇيىلعان قالتاشا مەن ارنايى ءدارى قوبديشاسىن پايدالا وتىرا، العاشقى كومەكتى دەر كەزىندە كورسەتەدى.

پاتشايىم بۋكينگەم سارايىنىڭ تەرەزەسىن اشۋعا رۇقسات بەرمەيدى

مۇنىڭ دا ءوز سەبەبى بار. II ەليزاۆەتا سارايدىڭ حالىق كورەتىن بەتى ءاردايىم ءمىنسىز بولۋى ءتيىس دەپ سانايدى. تەك بەلگىلەنگەن ۋاقىت ارالىعىندا عانا تەرەزەلەردى اشۋعا رۇقسات ەتىلگەن.

ءىى ەليزاۆەتا پاتشايىم مۇز كەسەكتەرىن جەك كورەدى

وعان سۋسىندار قۇيىلعان ىدىسقا تيگەندەگى مۇز كەسەكتەرىنىڭ داۋىسى مۇلدە ۇنامايتىن كورىنەدى. پاتشايىم مۇز دوڭگەلەك نەمەسە شار ءتارىزدى پىشىندە بولعانىن قالايدى. سەبەبى، ونىڭ شىنىعا تيگەندەگى دىبىسى ادەمىرەك ءارى سازدى ەستىلەدى ەكەن. ءتىپتى، ونىڭ جۇبايى حانزادا فيليپپ دومالاق پىشىندە مۇز قاتىراتىن ارنايى اپپارات تا ويلاپ تاپقان دەسەدى.

پاتشايىمنىڭ سومكەسى ارقىلى نەنى بىلۋگە بولادى؟

ەليزاۆەتا پاتشايىمنىڭ سومكەسىنىڭ ءوزى ارنايى قىزمەت اتقارادى. ول سومكەنىڭ ىشىنە قاراپايىم ايەلدەر سياقتى ءاميان، بوياۋ مەن قاعاز-قالام ەمەس، ارنايى ىلمەك سالىپ جۇرەدى. پاتشايىم ءارتۇرلى جيىندارعا بارعاندا سومكەسىن جانىنان تاستامايتىنىن ءجيى بايقاۋعا بولادى. 

ەگەر پاتشايىم سومكەسىن ۇستەل ۇستىنە قويسا، كەزدەسۋ 5 مينۋتتان كەيىن اياقتالادى دەگەندى بىلدىرەدى. ال پاتشايىم كەزدەسۋ قىزىقسىز ءوتىپ جاتسا، سومكەنى جەرگە قويىپ بىلگى بەرگەن. ەگەر پاتشايىمنىڭ ءوزى الىپ جۇرەتىن ىلگەككە سومكەسىن ىلگەنىن بايقاساڭىز قۋانا بەرىڭىز، ويتكەنى سىزبەن كەزدەسۋ قىزىق ءوتىپ جاتىر ءارى پاتشايىمنىڭ جاعدايى جاقسى.

پاتشايىم رەتتىك ءنومىرلى كيىم كيەدى

پاتشايىم كيەتىن كيىمدەرىنىڭ رەتتىك ءنومىرى بار. سول ارقىلى ارنايى جۋرنالعا كيىمدەردىڭ قايدا جانە قاشان كيىلگەنى تۋرالى ەسەپ جازىلىپ وتىرادى. ءبىراق، بۇل ءىى ەليزاۆەتانىڭ ءوز كيىمدەرىن تەك ءبىر-اق رەت كيەدى دەگەندى بىلدىرمەيدى. ول كيىمدەرىن قايتا وڭدەۋگە، جاڭارتۋعا بەرىپ تۇرادى.

پاتشايىم كارتوپ پەن سورپا ىشپەيدى

سەبەبى وعان كراحمال ونىمدەرىن تۇتىنۋعا تىيىم سالىنعان. ءبىراق، وتباسى مۇشەلەرىنىڭ اراسىندا بۇل تاعامدى ۇناتاتىندار ءۇشىن اسپازدار جەكە كەشكى اس دايىندايدى. الايدا پاتشايىم ءتاتتى ءبالىش پەن ىستىق شايدى جاقسى كورەدى. 

II ەليزاۆەتادان بۇرىن اياق كيىمىن قىزمەتشىسى كيەدى

جاڭا اياق كيىمدەردىڭ جايسىزدىق تۋدىراتىنىن كوپتەگەن حانىمدار بىلەتىن شىعار. پاتشايىم ءۇشىن جاڭا ءتۋفليىن ءبىراز ۋاقىت كيىپ، اياققا جايسىزدىق تۋدىراتىن بولىكتەرىن «جۇمسارتىپ» بەرەدى ەكەن.

30 جىل بويى ءبىر عانا تىرناق بوياۋىن قولدانعان

ءىى ەليزاۆەتا تەك ەل بيلەۋدە عانا ەمەس، تىرناق بوياۋىن قولدانۋدا دا رەكورد ورناتقان بولار. سەبەبى، ول 1989 جىلدان بەرى سوڭعى 30 جىل ىشىندە تەك ءبىر ءتۇستى ءبىر عانا برەندتىڭ تىرناق بوياۋىن قولدانىپ كەلەدى.