الماتى قىلمىستىق ىستەر جونىندەگى مامانداندىرىلعان اۋدانارالىق سوتىندا دەنيس تەننىڭ ولىمىنە قاتىستى ءىس جالعاسىپ جاتىر، دەپ جازادى Qamshy.kz اقپارات اگەنتتىگى.

بۇگىنگى وتكەن سوت وتىرىسىندا قىلمىستى جاسىردى دەپ ايىپتالعان جانار تولىبايەۆا تۇسىنىكتەمە بەردى. ونىڭ ىشىندە 7 ايلىق ءسابيى بار ەكەنىن ايتا كەتەيىك.

تولىبايەۆا كولىك ىشىندە الەۋمەتتىك جەلى ارقىلى تىكەلەي ەفير كورىپ وتىرعاندىقتان وزگە كۇدىكتىلەر نۇرالى قياسوۆ پەن ارمان قۇدايبەرگەنوۆتىڭ نە جايىندا اڭگىمەلەسىپ وتىرعانىن ەستىمەگەن. دوستارىنىڭ اينا ۇرلاماق بولعان تەرىس نيەتتەرى جايلى ايەل بىلمەگەن. ال مۇنى تۇسىنگەندە قىلمىسكەرلەرمەن سىبايلاس بولماي، باسقا كوشەگە كەتىپ قالۋدى كوزدەدى.

-«ولار مەنى الىپ كەتكەندە، تۇرلەرى بوزارىپ كەتكەن ەدى. نۇرالى رۋلدە وتىردى. قولىنىڭ جاراقاتتانعانىن بايقاپ قالدىم. نە بولعانىن سۇراپ ەدىم، ولار ۇندەمەدى. «جوق، اياعىنان جاراقات السا، ولمەۋى كەرەك» دەگەن ءسوزدى ەستىپ قالدىم. كىم ايتقانى ەسىمدە جوق، نۇرالى سەكىلدى»، - دەدى تولىبايەۆا.

وقيعادان سوڭ ءۇش كۇدىكتى "شاڭىراق" ىقشاماۋدانىنداعى ۇيلەرىنە بارادى. ولار قياسوۆتىڭ اعاسىنىڭ ۇيىندە تۇراتىن. اعاسى نۇرالىنى ۇيدە قونباي، كولىكتى الىپ كەتكەنى ءۇشىن قامشىمەن ساباي باستاعان. ال تولىبايەۆا پاتەر جالداۋ ءۇشىن قۇربىسىمەن كەزدەسۋگە بارادى، ول جەردە ونى قاپشاعايعا قىدىرۋعا شاقىرادى.

-«قاپشاعايعا جەتكەن سوڭ، ارمانعا (قۇدايبەرگەنوۆ) حابارلاستىم. ول توبەلەسكەن جىگىتتىڭ قايتىس بولعانىن ايتتى. اۋىلعا كەتكىسى كەلدى. ال مەن قالاتىنىمدى ايتتىم، سەبەبى بۇل ىسكە ەش قاتىسىم جوق ەدى. ال ارمان "قانداي جاعداي بولماسىن، ەندىگى ەكەۋمىز ءبىر-بىرىمىزدى تانىماۋىمىز كەرەك" دەدى. كەلىستىم. سول كۇنى دوستارىم دەنيس تەننىڭ قايتىس بولعانىن ايتتى. الەۋمەتتىك جەلىدەن كۇدىكتىلەردىڭ ىزدەستىرىلىپ جاتقانىن وقىدىم، قازا تاپقان جىگىتتىڭ تەن ەكەنىن سوندا ءتۇسىندىم»، - دەدى ول.

20 شىلدەدە تولىبايەۆا كيىمدەرىن جيناستىرىپ جاتقاندا بەلگىسىز بىرەۋلەردىڭ ۇيگە كىرىپ، نۇرالى مەن ارماندى سۇراستىرىپ جۇرگەنىن كورگەن.

-«مەن تەلەفونىمدى قۋاتتاعىشقا قويىپ، ارمانعا حابارلاسىپ، ءمان-جايدان حاباردار ما، جوق پا ەكەنىن بىلگىم كەلدى. ول تۇتقانى كوتەردى. حاباردار ەكەن. «نۇرالىنىڭ ۇستالعانىن ەستىدىم. مەن قالادان كەتىپ بارامىن، مۇمكىندىك بولعاندا حابارلاسامىن» دەدى دە قويا سالدى. قايدا، قاشان كەتەتىنىن ايتپادى. قايتا حابارلاسقانىمدا، تەلەفونى ءسوندىرۋلى بولدى»، - دەدى كۇدىكتى.

نۇرالىنىڭ اعاسى جانار مەن قۇربىسىن جاڭا پاتەرگە اپاردى.

-«مەن روزىباقييەۆ-رىسقۇلوۆ كوشەلەرىنەن جولدان ءوتىپ بارا جاتقانىمدا، مەنى پوليسەيلەر ۇستادى. قۇربىم ەكەۋمىزدى كولىككە وتىرعىزىپ، الىپ كەتتى. دەنيس تەننىڭ ولگەنىن ايتىپ، قايسىسىمىز جانار ەكەنىمىزدى سۇرادى. كەيىن ءىىد عيماراتىنا تەرگەۋگە الىپ كەلدى»، - دەدى.

ەكى كۇن بويى پوليسيا ارمان قۇدايبەرگەنوۆتى ىزدەگەن. ال تولىبايەۆاعا ارماننىڭ قايدا جاسىرىنعانىن بىلەتىنىن جانە ايتۋىن تالاپ ەتتى.

-«مەن پوليسەيلەرگە كومەكتەسەتىنىمدى ايتىپ، بۇرىن تۇرعان مەكەنجايلارعا اپارماق بولدىم. كولىككە وتىرعانىمىزدا ارمان حابارلاسىپ قالدى. پوليسەيلەر سول ارقىلى ارماننىڭ قايدا ەكەنىن انىقتادى. تولە بي-ساينعا باردىق، سول جەردەن ارماندى ۇستادى»، - دەپ كۇدىكتى بولعان جايتتى ەسىنە ءتۇسىردى.

ال نۇرالى قياسوۆتى تۋىستارى ارقىلى تاپقان ەكەن.

«ارماندى ۇستاعاندا، مەن كولىكتە وتىردىم. جانىمدا ءىىد وكىلدەرى بولدى. 20 شىلدەنىڭ كەزى ەدى. سول كۇنى ءبىرىنشى رەت مەن كۋاگەر رەتىندە شاقىرعان. كەيىن 21 شىلدە قايتا شاقىرتىپ، قۇجاتقا قول قويۋىمدى سۇرادى. سودان بەرى جىبەرمەدى. الدىمەن تەرگەۋ ءبولىمى باسشىسىنىڭ ورىنباسارى عازيز اۋكەنۇلىنا اپاردى. «تاعى الىپ-قوسارىڭ بار ما؟» دەپ سۇرادى، جوق دەدىم»، - دەپ ءسوزىن جالعادى تولىبايەۆا.

«سول كەزدە ماعان قىسىم كورسەتە باستادى: «كىم-كىمدى پىشاقتادى، سەن ءبارىن كوردىڭ. ارمان ايتىپ بەردى»، — دەدى. ءسويتىپ بىرنەشە اق قاعازداردى الىپ، مەنى ۇرا باستادى. ەشتەڭە كورمەگەنىمدى ايتتىم، الايدا سەنبەدى، ۇرۋدى جالعاستىردى. ءسويتىپ تەرگەۋشىگە اپاردى. مەن تاعى ەشتەڭە كورمەگەنىمدى ايتتىم. تەك سومكەدە پىشاقتىڭ بولعانىن كورىپ ەدىم، ال سومكە نۇرالىنىڭ قولىندا بولدى»، - دەدى تولىبايەۆا.

«21 شىلدەدە مەنى ۇستاپ، ارنايى پاتەرگە اپاردى. وندا بارماس بۇرىن، ۇرىپ-سوعۋ تۋرالى انىقتاما بولۋى ءتيىس ەدى. الايدا ىستە ول جوق. تەرگەۋ بولىمىنە اپارعاندا سوققىدان كەيىنگى جاراقاتتاردىڭ ءىزى دە قالمادى»، - دەدى ايەل.

سوتالدى تەرگەۋ بارىسىندا جانار تولىبايەۆا قىسىم كورگەنى جايىندا ايتپاعان. كەيىن كۇدىكتى كىناسىن مويىنداعانداي بولدى.

«قىلمىستى كوردىم دەپ ايتا المايمىن. تەك اينانىڭ ۇرلانىپ جاتقانىن كوردىم. بۇل جايىندا ايتپاپ ەدىم، ەندى مويىندايمىن»، - دەدى جانار تولىبايەۆا.

بۇعان قوسا ول سوت زالىندا قازاقستاندىقتاردان جانە دەنيستىڭ كەشىرىم سۇرادى.

دەنيستى پىشاقتاعان دەپ ايىپتالعان نۇرالى قياسوۆ دەنساۋلىعىنىڭ سىر بىلدىرگەنىن ايتىپ، سوتتى دۇيسەنبىگە اۋىستىرۋدى وتىنگەن. الايدا سۋديا سوتتىڭ بۇعان دەيىن دە كەيىنگە قالدىرىلعانىن ەسكەرىپ، سوت وتىرىسىن ءبارىبىر وتكىزدى. بۇدان سوڭ قياسوۆ تۇسىنىكتەمە بەرۋدەن باس تارتتى. مەديسينا قىزمەتكەرلەرى قياسوۆتىڭ دەنساۋلىعىندا راسىندا اقاۋ بار ەكەنىن، الايدا تۇسىنىكتەمە بەرە المايتىنداي جاعداي ەمەس ەكەنىن ايتتى.

بۇدان بۇرىن تۇسىنىكتەمە ارمان قۇدايبەرگەنوۆ سپورتشىنى ولتىرگىسى كەلمەگەنىن ايتىپ، بارشا قازاقستاندىقتان كەشىرىم سۇراعان.

2019 جىلدىڭ 3 قاڭتارىنداعى سوت وتىرىسىندا ءۇش كۇدىكتى دە كىنالارىن مويىندامايتىنىن ايتتى.

ايتا كەتەيىك، دەنيس تەن 2018 جىلدىڭ 19 شىلدەسىندە اۆتو ۇرىلاردىڭ قولىنان قازا تاپقان.