19 قاڭتاردا ازەربايجاننىڭ استاناسى باكۋدە ميتينگ بولىپ، تۇرمەدە اشتىق جاريالاعان بلوگەر مەحمان گۋسەينوۆتى قولداۋ شاراسى ءوتتى دەپ  جازادى Qamshy.kz اقپارات اگەنتتىگى. اتالمىش اكسيا دەموكراتيالىق كۇشتەردىڭ ۇلتتىق كەڭەسىنىڭ ۇيىمداستىرۋىمەن وتكەن. 

ميتينگكە قاتىسۋشىلار بلوگەر گۋسەينوۆپەن قاتار باسقا دا ساياسي تۇتقىندارعا بوستاندىق بەرۋدى تالاپ ەتتى. رەسمي دەرەكتەرگە سۇيەنسەك، ميتينگكە شامامەن 2800 ادام قاتىسقان. ال نارازىلىق بىلدىرۋشىلەردىڭ سوزىنشە، ميتينگكە قاتىسقانداردىڭ سانى - 20 مىڭ.

ەسكەرتە كەتەيىك، 26 جاستاعى مەحمان گۋسەينوۆ بيلىككە قاتىستى ءوز كوزقاراسىن اشىق ايتىپ جۇرگەن تانىمال بلوگەر. گۋسەينوۆ ءوزىن پوليسيا قىزمەتكەرلەرى ۇرىپ-سوققانىن ايتقانى ءۇشىن 2017 جىلى "جالا جابۋ" بابى بويىنشا 2 جىلعا باس بوستاندىعىنان ايىرىلعان. كەيىن  بوستاندىققا شىعۋىنا 2 اي قالعان كەزدە بلوگەردىڭ ۇستىنەن تاعى دا ءبىر ءىس قوزعالعان. گۋسەينوۆ تۇرمەنىڭ كۇزەتشىسىن سوققىعا جىعىپتى-مىس. ونىڭ ۇستىنەن قوزعالعان ءىس بويىنشا گۋسەينوۆ 5-7 جىل باس بوستاندىعىنان ايىرىلۋى مۇمكىن. 

ونىڭ بوستاندىققا شىعۋىن تالاپ ەتكەندەردىڭ قاراسى وتە كوپ. ءتىپتى گۋسەينوۆتى قولداۋشىلار فرانسيانىڭ ءسىم، ەۆروپارلامەنتكە، ەۋروپالىق كەڭەسكە، امەريكالىق كونگرەسسمەنگە حات جازعان.

ال گۋسەينوۆ بولسا، ءوز كەزەگىندە بيلىككە قارسىلىق رەتىندە 25 جەلتوقساندا  اس-سۋ ىشۋدەن باس تارتىپ، اشتىق جاريالادى. الايدا 30 جەلتوقساندا ونىڭ دەنساۋلىعى كۇرت ناشارلاپ، ەسىنەن تانىپ قالدى. وسى جايتتان كەيىن ول سۋ ىشە باستاعانىمەن، بىرنەشە كۇن بويى تاماقتان باس تارتتى. ونىڭ جاقتاۋشىلارىنىڭ ءبىرقاتارى دا اشتىق جاريالاپ، گۋسەينوۆكە قولداۋ ءبىلدىردى. ال 7 قاڭتاردا گۋسەينوۆتىڭ اشتىق جاريالاۋدان باس تارتقانى جونىندە اقپارات تارادى. بۇل تۋرالى ادام قۇقىقتارى جونىندەگى رەسمي وكىل مالىمدەگەن بولاتىن. ونىڭ ايتۋى بويىنشا، بلوگەر دارىگەردىڭ قاتاڭ باقىلاۋىندا جانە ءقازىر دەنساۋلىعى جاقسارعان.

الايدا گۋسەينوۆتىڭ ادۆوكاتى مەن اكەسى ءقازىر بۇل اقپاراتتى راستاماي وتىر. ۇلىمەن كەزدەسكەن اكە: 

— مەحمان اشتىق جاريالاعان. ونى توقتاتپادى. ول وتە ءالسىز كورىندى. مەن وعان جەمىس-جيدەك پەن باسقا دا اس-اۋقات بەرىپ، جەۋىن ءوتىندىم. الايدا ول مەنىڭ ايتقان كەڭەسىمە قۇلاق استى ما، بىلمەدىم، — دەيدى.

2012 جىلدان بەرى مەحمان گۋسەينوۆتىڭ ۇستىنەن بىرنەشە رەت ءىس قوزعالعانى بەلگىلى. الايدا ونى تۇتقىنداۋعا تۇرتكى بولعان سوڭعى جايت تۋرالى ازەربايجاندىق جۋرناليست حاديدجا يسمايلوۆا currenttime.tv تىلشىسىنە ايتىپ بەردى. ونىڭ ايتۋىنشا، گۋسەينوۆ سوڭعى رەت 2017 جىلى باكۋ قالاسىندا ساۋالناما جۇرگىزگەن. بلوگەر حالىقتان "ەگەر ءسىز ءبىر مەكەمەنىڭ باسشىسى بولساڭىز، ءوز ايەلىڭىزدى وزىڭىزدەن كەيىنگى باسشى، ورىنباسارىڭىز ەتىپ قويار ما ەدىڭىز؟"، - دەپ سۇراعان. وسى ساۋالناماسى ءۇشىن ول باس بوستاندىعىنان ايىرىلىپ، بيلىكتىڭ قاس جاۋىنا اينالعانىن ايتا كەتەيىك. 

اقيقاتىنا كەلسەك، بلوگەر گۋسەينوۆتىڭ سۇراعىنىڭ استارى بار. بۇل ساۋالنامانىڭ ازەربايجان پرەزيدەنتىنىڭ جارلىعىنا قاتىستى ەكەنىن تۇرعىنداردىڭ بارلىعى ءبىلدى، ءتۇسىندى. 

ايتا كەتسەك، 2017 جىلى 21 اقپاندا پرەزيدەنتتىڭ بۇيرىعىمەن ازەربايجاننىڭ ۆيسە-پرەزيدەنتى بولىپ ونىڭ ايەلى، مەحريبان الييەۆا تاعايىندالدى. ال پرەزيدەنتتىڭ ءوزى 2003 جىلدان بەرى ەل باسقارىپ وتىر. ال ءقازىر وپپازيسيالىق كوزقاراستاعى ازەربايجاندار، حالىقتىڭ كوپتەن بەرى بيلىككە اشۋلى ەكەنىن، بۇل وقيعا جاي عانا سەبەپ بولعانىن ايتىپ، پىكىر ءبىلدىرىپ جاتىر. سونداي-اق ميتينگكە شىققان ازەربايجاندىقتار پرەزيدەنتتىڭ ءوز ايەلىن ۆيسە-پرەزيدەنت ەتىپ تاعايىنداۋى حالىقتى باسىنعاندىقتىڭ بەلگىسى دەپ ەسەپتەيدى. 

بەيرەسمي دەرەكتەر بويىنشا 26 قاڭتاردا تاعى دا قارسىلىق اكسياسى وتەدى.