قازاقستاننىڭ بولاشاعى - بۇگىنگى جاستار.  سوندىقتان، بولاشاق بۇلىڭعىر بولماۋى ءۇشىن جاستارعا كورسەتىلىپ وتىرعان بۇگىنگى قولداۋ كوڭىلگە ۇلكەن ءۇمىت ۇيالاتادى. مۇنداي پىكىردى س.نۇرماعامبەتوۆ اتىنداعى «ساعادات باتىر» سپورت كلۋبىنىڭ نەگىزىن قالاۋشى نۇرسۇلتان ورىنباساروۆ ءبىلدىردى. 

نۇرسۇلتان ورىنباساروۆ تانىمال مما شەبەرى، «نۇر وتان» پارتياسى ىلە اۋداندىق فيليالىنىڭ مۇشەسى، دجيۋ-دجيتسۋدان جانە گرەپپلينگتەن حالىقارالىق تۋرنيرلەردىڭ بىرنەشە دۇركىن چەمپيونى. ونىڭ پىكىرىنشە، مەملەكەت باسشىسىنىڭ قولداۋىمەن جاستار سپورتىنا، سونىڭ ىشىندە اۋىل سپورتىنا ءبولىنىپ وتىرعان كوڭىل دەنى ساۋ ۇلتتى قالىپتاستىرۋدىڭ نەگىزى.  

«ەلباسى ن.ءا. نازاربايەۆتىڭ 2019 جىلدى جاستار جىلى دەپ اتاۋى قازاقستان جاستارىنا ۇلكەن جىگەر بەرىپ وتىر. جاستار جىلى مەن ءۇشىن دە، مەنىڭ كوماندام ءۇشىن دە ساتتىلىككە جەتكىزەتىن سارا جولدىڭ ءبىرى بولادى دەپ ويلايمىن. بۇلاي دەيتىنىم، پرەزيدەنت ءوزى قولداپ وتىرعان سپورت سالاسىندا ءبىرشاما جاڭالىقتار بولۋدا. سونىڭ ءبىرى - «اۋىلىن كورىپ ازاماتىن تانى» دەمەكشى، اۋىل سپورتىن دامىتۋ ماقساتىندا 2015 جىلى ىلە اۋدانى، تۇيمەبايەۆ اۋىلىندا قازاقستان رەسپۋبليكاسىنىڭ تۇڭعىش قورعانىس ءمينيسترى ساعادات نۇرماعانبەتوۆتىڭ قۇرمەتىنە «ساعادات باتىر» سپورت كلۋبى اشىلعان بولاتىن. كلۋبتا جاتتىعاتىن سپورتشىلارىمىز بايراقتى باسەكەلەردە ەل ءۇمىتىن اقتاپ، چەمپيون اتانۋدا. تاعى دا ايتا كەتەتىنىم، ىلە اۋداندىق «نۇر وتان» پارتياسى فيليالىمەن بىرىگىپ، بالالار، جاسوسپىرىمدەر جانە جاستار اراسىندا گرەپپلينگتەن، ارالاس جەكپە-جەكتەن جانە دجيۋ-دجيتسۋدان اۋداندىق، رەسپۋبليكالىق، حالىقارالىق تۋرنيرلەر ۇيىمداستىردىق. بۇنىڭ بارلىعى جاستاردىڭ سپورتقا دەگەن قىزىعۋشىلىعىن ارتتىرىپ، اۋىل سپورتىنىڭ دامۋىنا ۇلەسىن قوسارى ءسوزسىز»، - دەدى نۇرسۇلتان ورىنباساروۆ.

سونىمەن قاتار، جاس باپكەر ءوز كومانداسى جايلى ءسوز قوزعاپ، الداعى جوسپارىمەن ءبولىستى.

«الداعى ۋاقىتتا دا كومانداممەن كوپتەگەن تۋرنير ۇيىمداستىراتىن بولامىز. سونىمەن قاتار اۋىلىمىزدىڭ جاستارى سپورتقا ۇلكەن قىزىعۋشىلىق تانىتىپ وتىر. سوعان بايلانىستى وسى جىلى، تۇيمەبايەۆ اۋىلىندا 400-دەن اسا سپورتشى جاتتىعا الاتىنداي ۇلكەن سپورت زالىن سالۋدى جوسپارلاپ وتىرمىز. «ساعادات باتىر» سپورت كلۋبىندا جاس باپكەرلەر شاكىرتتەرىن سپورتقا باۋلي وتىرىپ، بويىنا پاتريوتيزم سەزىمىن دارىتۋدا. بۇل كلۋب ەكى زالدا جۇمىس جاسايدى. ءبىرى ىلە اۋدانى تۇيمەبايەۆ اۋىلىندا بولسا، ەكىنشىسى الماتى قالاسى، قازاقفيلم ىقشام اۋدانىندا ورنالاسقان. بۇگىندە كلۋبتا 170-تەن اسا سپورتشى تاربيەلەنۋدە. ولاردىڭ ءارقايسىسىنىڭ وزىندىك قۇلشىنىسى مەن وزىندىك ەرەكشەلىكتەرى دامىپ كەلەدى. سپورتتىڭ ءوزى ءۇشىن دە، ەلى ءۇشىن دە قاجەت ەكەنىن سەزىنىپ شەبەرلىكتەرىن ارتتىرۋدا كوماندا مۇشەلەرى تالماي جاتتىعۋ ۇستىندە. وسكەلەڭ ۇرپاقتى ەلىن سۇيۋگە تاربيەلەۋدە مەنىڭ كوماندامنىڭ قوسار ۇلەسى وراسان بولماق»، - دەدى ول.

نۇرسۇلتان ورىنباساروۆتىڭ ايتۋىنشا، قازاقستاننىڭ بولاشاعى - بۇگىنگى جاستار. 

«سوندىقتان، بولاشاق بۇلىڭعىر بولماۋى ءۇشىن جاستارعا كورسەتىلىپ وتىرعان بۇگىنگى قولداۋ كوڭىلگە ۇلكەن ءۇمىت ۇيالاتادى. جاستار جىلىندا قوعام ءۇشىن پايدالى، اۋقىمدى ىستەر اتقارىلادى دەپ سەنەمىن»، - دەپ ءتۇيدى ول.

ەسكە سالايىق، كەشە، 23 قاڭتار كۇنى استانادا نۇرسۇلتان نازاربايەۆتىڭ قاتىسۋىمەن جاستار جىلىنىڭ سالتاناتتى اشىلۋ ءراسىمى ءوتتى.

شاراعا ۇكىمەت مۇشەلەرى، ق ر پارلامەنتى دەپۋتاتتارى، جەرگىلىكتى اتقارۋشى ورگان باسشىلارى، ق ر پرەزيدەنتى جانىنداعى جاستار ساياساتى كەڭەسىنىڭ مۇشەلەرى، «100 جاڭا ەسىم» بايقاۋىنىڭ جەڭىمپازدارى، «بولاشاق» باعدارلاماسىنىڭ تۇلەكتەرى، جاس عالىمدار قاتىسۋدا. سونىمەن قاتار بۇل جيىنعا شىعارماشىلىق، ستۋدەنتتىك جانە جۇمىسشى جاستار وكىلدەرى، جاس سپورتشىلار، دارىندى بالالار، زاماناۋي مەديا سالاسىنىڭ وكىلدەرى، بالالار ءۇيىنىڭ تاربيەلەنۋشىلەرى مەن تۇلەكتەرى، جاس اسكەري قىزمەتشىلەر كەلگەن.

ايتا كەتسەك، پرەزيدەنت قازاقستان حالقىنا وتكەن جىلعى جولداۋىندا 2019 جىلدى جاستار جىلى دەپ جاريالاۋدى ۇسىنعان بولاتىن. ارادا ءبىر ايدان استام ۋاقىت وتكەننەن كەيىن ەلباسى جارلىعىمەن 2019 جىل جاستار جىلى بولىپ رەسمي تۇردە جاريالاندى.