دۇنيە ءجۇزىنىڭ بىرنەشە مارتە چەمپيونى جانسايا ابدىمالىك جاسى 20-عا تولماعان قىزدار اراسىندا الەمدىك رەيتينگتە كلاسسيكا، راپيد، بليس بويىنشا جەكە-دارا كوش باستاپ تۇر. قازاقستان شاحماتىنىڭ تاريحىندا جانساياعا دەيىن بىردەن ءۇش تارماق بويىنشا الەمدىك رەيتينگتە توپ جارعان شاحماتشى بولعان ەمەس. ياعني، جانسايانىڭ بۇل تابىسى - قازاق ەلى ءۇشىن تاريحي جەڭىس! بۇل – جانسايانىڭ الەمدىك جاستار سايىسىنداعى تابىسى.
ەندى ونىڭ ەرەسەكتەر باسەكەسىندەگى قادامىنا توقتالايىق. 2019 جىلدىڭ اقپان ايىنىڭ رەيتينگى بويىنشا 19 جاستاعى جانسايا ابدىمالىك دۇنيە جۇزىندەگى ەڭ مىقتى ايەل شاحماتشىلار اراسىندا 19-ساتىعا تابان تىرەدى. جانسايا قازاقستاندىق ايەل شاحماتشىلاردان ءبىرىنشى بولىپ 2017 جىلى ەرلەردىڭ حالىقارالىق گروسسمەيستەر دارەجەسىنە قول جەتكىزدى. ول كەزدە ءبىزدىڭ قىزىمىز نەبارى 17-دە بولاتىن. ال ايەلدەر اراسىنداعى حالىقارالىق گروسسمەيستەر اتاعىن جانسايا 14 جاسىندا ولجالاعان ەدى.
قازاقتىڭ تاعى ءبىر دارىندى قىزى دينارا ءسادۋاقاسوۆا جەر شارىنىڭ ەڭ كۇشتى ايەل شاحماتشىلارى رەيتينگىندە ازىرگە 22-ورىندا. تۇسىنگەن ادامعا جانسايا مەن دينارا وسى جەڭىستەرىمەن قازاقتىڭ شاحماتتاعى بەدەلىن الەمدىك اسقار بەلگە كوتەرىپ تاستادى. ءدال ءقازىر جەر جۇزىندەگى ەڭ تاڭداۋلى 25 ايەل شاحماتشىنىڭ ۇشەۋى عانا مۇسىلمان سپورتشىلارى. سولاردىڭ ەكەۋى ءبىزدىڭ قىزدار، ال ءۇشىنشىسى يران شاحماتشىسى - ساراسادات حادەمالشاريح. ونىڭ ۇستىنە شاحماتتا بوكس پەن كۇرەستەگىدەي سالماق دارەجەسىنە جىكتەلۋ جوق. بوكستا سالماق دارەجەلەرىنە قاراي 10 ادام الەم چەمپيونى اتانسا، شاحماتتا دۇنيە ءجۇزى بويىنشا ەرلەردەن ءبىر، ايەلدەردەن ءبىر سپورتشى چەمپيوندىق ءتاجدى كيەدى. ءبىزدىڭ جانسايا مەن دينارانىڭ جۇمىر جەردەگى 200-دەن اسا مەملەكەت شاحماتشىلارىنان سۋىرىلىپ شىعىپ، موينى وزىق 22 ساڭلاقتىڭ قاتارىنان ورىن تەبۋى الاش جۇرتى ءۇشىن وتە مەرەيلى ءسات.
تاعى ءبىر قۋانا حابارلايتىن جاعداي، جانسايا قىزىمىز ازىرگە جەر شارىنداعى ەڭ كۇشتى 30 ايەل شاحماتشىنىڭ اراسىنداعى ەڭ جاسى كىشىسى.
وسىدان بىرنەشە جىل بۇرىن رەسەي ماماندارىنىڭ شاقىرۋىمەن ماسكەۋگە كوشكەن ءبيبىسارا اساۋبايەۆا قىزىمىز (جاسى 14-تە) الەمنىڭ توپ-100 ايەل شاحماتشىلارىنىڭ ىشىندە 89-ورىنعا كوتەرىلدى. اللا جولىن وڭعارسا، ەندى ەكى-ۇش جىلدا ءبيبىسارا قىز رەسەيدىڭ ءۇش جولاقتى تۋىن شاحمات كوگىنە كوتەرمەسىنە كىم كەپىل؟!
حوش، قىزدارىمىزدىڭ شاحماتتاعى قادامى جان سۇيسىنتەدى. ال جانسايا مەن دينارانىڭ دەڭگەيىندە ءبىر قازاق ازاماتىنىڭ جارقىراپ شىعا الماعانى جانىمىزعا باتىپ ءجۇر.
ەندى ەڭ وزىق ايەل شاحماتشىلاردىڭ الەمدىك رەيتينگىنە نازار سالىڭىزدار:
|
Standard Top 100 Women February 2019 |
|
قىدىربەك رىسبەك
