قازاقستان رەسپۋبليكاسىنىڭ شاحمات فەدەراسياسى وسىدان ەكى جىل بۇرىن رەسەيگە اۋىسقان شىناشاقتاي قىزىمىز ءبيبىسارا اساۋبايەۆانىڭ ەلگە ورالاتىنىن حابارلادى. ءيا، ءبيبىسارا كورشى ەلدىڭ نامىسىن قورعاۋ ءۇشىن ماسكەۋ وبلىسىنا اۋىستى، حيمكي قالاسىنان وعان ەكى بولمەلى پاتەر بەرىلدى، دەگەن حاباردى ەستىگەندە ونى جاتقا قيماي، ءىشىمىز اشىپ، كادىمگىدەي قاپا بولىپ ەدىك. مىنە، اللانىڭ بۇيرىعىمەن قىزىمىز ءوز وتانىنا ورالۋدى ۇيعارىپتى.    ءبيبىسارانىڭ جاسى 14-تە. ايەلدەر اراسىنداعى الەمدىك رەيتينگتە 89-ورىندا تۇر. وسى جەردە 2019 جىلدىڭ اقپان ايىنداعى  جەر شارى بويىنشا تاڭداۋلى توپ-100ء-دىڭ ىشىندەگى ەڭ جاسى ءبىزدىڭ ءبيبىسارا ەكەنىن باسا ايتقىمىز كەلىپ وتىر. سەبەبى، شاحمات  كۇرەس پەن بوكستاعىداي سالماق دارەجەسىنە جىكتەلمەيدى. مىقتىنىڭ ءبارى ءبىر الاماننىڭ ىشىندە شەبەرلىگىن سىنايدى. مىسالى، دۇنيە ءجۇزى بويىنشا 100 مىڭ شاحماتشى توپ-100-گە ەنۋگە ارەكەت جاساسا، ءبىزدىڭ بالا سونىڭ العاشقى جۇزدىگىنە ەنىپ وتىر.

قازاقستان شاحمات فەدەراسياسى فيدە-گە ءبيبىسارا اساۋبايەۆانى قازاق ەلىنىڭ فەدەراسياسىنا قوسۋ جايىندا رەسمي حات جولداپتى. بۇيىرتسا، جاقىن ارادا حالىقارالىق شاحمات فەدەراسياسىنان ءسۇيىنشى حابار كەلۋگە ءتيىس.

تارازدا تۋعان ءبيبىسارا ءتورت جاسىنان شاحماتقا قۇمارتقان ەكەن. 2008 جىلى 24 جاستاعى رەسەيلىك الەكساندرا كوستەنيۋك ايەلدەر اراسىندا الەم چەمپيونىنىڭ اق جانە سارى التىنمەن اپتالعان، بريلليانتپەن بەزەندىرىلگەن ءتاجىن كيەدى. سونى كورگەن كىشكەنتاي ءبيبىسارا  وسىنداي چەمپيوندىق ءتاجدى مەنىڭ دە كيگىم كەلەدى، دەپ اتاسىنان شاحمات ويناۋدى ۇيرەنىپ الادى. سول ارماننىڭ جەتەگىندە شارشى تاقتاعا بايلانعان بالعىن قىز 2011 جىلى اۋەلى 7 جاسقا دەيىنگى قىزدار اراسىندا الەم چەمپيوناتى اتانسا، اراعا بىرنەشە اي سالىپ جەتى جاسىندا 8 جاسقا دەيىنگى قىزداردىڭ الەمدىك بىرىنشىلىگىندە تاعى دا باس جۇلدەنى جەڭىپ الدى. ءبيبىسارا 2017 جىلى مينسكىدە وتكەن ەرلەر اراسىنداعى ەۋروپا چەمپيوناتىندا باعىن سىناپ، فيدە-نىڭ ەرلەر سپورت شەبەرى دارەجەسىنە قول جەتكىزدى. 13 جاسار قىزدىڭ بۇل تابىسىن شاحمات ماماندارى جوعارى باعالادى.

ءبيبىسارا بالعىندىعىنا قاراماي شىڭعىس حان، گيتلەر، ستالين، تاعى باسقا تاريحي تۇلعالار تۋرالى كىتاپتاردى وقىعان ەكەن. شاحمات الەمىندەگى چەمپيوندار جايىندا دا حابارى مول. ءبىزدىڭ سپورتشىنىڭ ەڭ اڭسارلى ارمانى – ايەلدەر اراسىندا الەم چەمپيونى بولۋ! «نينو چيبۋردانيدزە 16 جاسىندا الەم چەمپيونى اتاندى، مەنىڭ ءالى ۋاقىتىم بار»، - دەيدى شاحماتشى قىز. ەڭ باستىسى، اتا جۇرتىڭا ورالدىڭ، بۇيىرعانى بولا جاتار، ءبيبىسارا!

قىدىربەك رىسبەك