امەريكا سەناتى وسى لاۋازىمعا تاعايىندالعان اقش-تىڭ قازاقستانداعى توتەنشە جانە وكىلەتتى ەلشىسى ۋيليام ح.موزەر اتىراۋعا كەلدى. مۇناي-گاز سالاسىنداعى كاسىپورىنداردى ارالاعان ەلشى اتىراۋ وبلىسىنىڭ اكىمى نۇرلان نوعايەۆپەن كەزدەستى، دەپ حابارلايدى وڭىرلىك كوممۋنيكاسيالار قىزمەتى.

-ەكى ەل اراسىنداعى ارىپتەستىك باينالىس قارقىندى دامىپ كەلەدى. قازاقستان تاۋەلسىزدىك العاننان باستاپ ءبىزدىڭ كومپانيالار ينۆەستيسيالىق جوبالارعا بەلسەندى قاتىسۋدا. بۇل ءبىزدىڭ ەلىمىزگە، ەلباسى ساياساتىنا دەگەن سەنىمدى بىلدىرەدى. ەكى اراداعى ءوزارا بايلانىستىڭ كەڭەيۋى وسىعان دالەل،-دەدى نۇرلان نوعايەۆ. – ەلباسىنىڭ، مەملەكەت باسشىسىنىڭ ينۆەستيسياعا قولايلى ورتا قالىپتاستىرۋ جونىندەگى ساياساتى ەل ەكونوميكاسىن دامىتۋ ءۇشىن تىعىز حالىقارالىق بايلانىس ورناتۋعا مۇمكىندىك بەرىپ وتىر.

وبلىس اكىمى اقش-تىڭ قازاقستانداعى توتەنشە جانە وكىلەتتى ەلشىسىنە ءوڭىردىڭ جەتىستىكتەرى تۋرالى ايتتى.

-قازاقستاندا وندىرىلەتىن مۇنايدىڭ جارتىسى اتىراۋ وبلىسىنىڭ ەنشىسىندە جانە كوپ بولىگى «تەڭىزشيەۆرويل» كومپانياسىنىڭ ۇلەسىندە. ەلباسىنىڭ مۇناي-گاز سالاسىن دامىتۋ، سونىڭ ىشىندە كومىرسۋتەك شيكىزاتىن تەرەڭدەتىپ وڭدەۋ تۋرالى تاپسىرماسىن ورىنداي وتىرىپ، ايماقتا جوعارى قوسىلعان قۇن سالىعى بار مۇناي-حيميا ونىمدەرىن شىعارۋ بويىنشا العىشارت جاسالعان،-دەپ اتاپ ءوتتى نۇرلان نوعايەۆ.
ايماق باسشىسى شەتەلدىك قاتىسۋى بار مۇناي كومپانيالارىنىڭ وبلىس اۋماعىندا الەۋمەتتىك جوبالاردى جۇزەگە اسىرۋعا قوسىپ جۇرگەن ۇلەستەرىن اتاپ ءوتتى. بۇل ءۇردىس جاڭا جۇمىس ورىندارىن قۇرۋعا، حالىقتىڭ ءال-اۋقاتىن ارتتىرۋعا ىقپال ەتىپ وتىر.

اقش-تىڭ قازاقستانداعى توتەنشە جانە وكىلەتتى ەلشىسى ۋيليام ح.موزەر ءوز كەزەگىندە بۇل اتىراۋعا العاشقى ساپارى ەمەس ەكەنىن ايتتى.

-1998 جىلى اتىراۋعا، "تەڭىزشيەۆرويل" كومپانياسىنا كەلدىم. ول كەزدە ەنەرگەتيكا بويىنشا اتتاشە ەدىم. سودان بەرى اتىراۋدا كوپ وزگەرىستەر بولىپتى، ينفراقۇرىلىم، حالىقتىڭ جاعدايى ءبىراز جاقسارعان. وڭ وزگەرىستەردە مۇناي كومپانيالارى ينۆەستيسيالارىنىڭ ۇلەسى بار ەكەنى انىق. مەن ەل اۋماعىندا جۇمىس ىستەپ جاتقان شەتەلدىك كومپانيالار اتىنان قازاقستان باسشىلىعىنا العىس ايتقىم كەلەدى. كومپانيالار ءۇشىن ايماقتاعى بيلىكتەرمەن ءوزارا بايلانىستا بولۋدىڭ ماڭىزى زور، - دەپ اتاپ ءوتتى ۋيليام ح.موزەر.