جامبىل وبلىسىندا تاراز قالاسى مەن قالا اۋماعىنداعى تاريحي-مادەني ەسكەرتكىشتەرگە قاتىنايتىن تۋريستىك اۆتوبۋس ىسكە قوسىلدى. جاستار جىلى قارساڭىندا «رۋحاني جاڭعىرۋ» باعدارلاماسى اياسىندا جۇزەگە اسقان بۇل اۆتوبۋستار تۋريستەر سۇرانىسىنا يە باعىتتارعا ساي مارشرۋتتارمەن جۇرەدى دەپ جازادى Qamshy.kz اقپارات اگەنتتىگى. 

ەندى كەزەكتە جىل سوڭىنا دەيىن تاراز قالاسىنىڭ تۇرعىندارى مەن قوناقتارى ءۇشىن سەنبى، جەكسەنبى جانە مەملەكەتتىك مەيرام كۇندەرى تۇراقتى تۇردە 2 اۆتوبۋس تۋريستىك اۆتوبۋس قىزمەت كورسەتپەك. ءارى بۇل اۆتوبۋستار تۇتىنۋشىلارىنا اقىسىز قىزمەت كورسەتەدى. تۋريستىك اۆتوبۋستىڭ العاشقى باعىتىمەن ساپارعا كوپ بالالى وتباسىلاردىڭ مۇشەلەرى، الەۋمەتتىك جاعدايى تومەن ازاماتتار اتتاندى. تاراز قالاسى ماڭىنداعى تاريحي-مادەني ەسكەرتكىشتەرگە تۋريستەردى جەتكىزەتىن كولىك قۇرالىنىڭ ءبىرىنىڭ سىيىمدىلىعى 55 ورىندىق بولسا، ەندى ءبىرى 18 جولاۋشىنىڭ دىتتەگەن جەرىنە جەتكىزۋدى كوزدەيدى. 2000 جىلدان استام تاريحى بار كونە شاھار اۋماعىندا تۋريستەر قىزىعاتىن ورىندار از ەمەس. سونىڭ ءبىرى ماحاببات پەن سۇيىسپەنشىلىك، ادالدىق جايىنداعى اڭىزدىڭ باستى كەيىپكەرىنە اينالعان ايشا ءبيبىنىڭ كەسەنەسى. قاپى دا جىلان شاعىپ ولتىرگەن سۇيگەنىنە ارناپ قاراحان اۋليە تۇرعىزعان كەسەنە بۇگىندە تۋريستەرمەن بىرگە ءتاۋ ەتە كەلۋشىلەردىڭ ورداسىنا اينالعان. سوندىقتان دا تۋريستىك مارشرۋتتىڭ العاشقى باعىتى «ايشا ءبيبى» كەسەنەسى دەپ اتالادى. «كونە تاراز» اشىق اسپان استىنداعى مۇراجايىنان باستالاتىن بۇل باعىتتا تۋريستىك اۆتوبۋس جولاۋشىلارى «قاراحان» ماۆزولەيى، داۋىتبەك كەسەنەسى، ەرتە داۋىردەگى يسلام مەشىتى، «قالي ءجۇنىس» مونشاسى، ورتاعاسىرلىق «تورتكۇل » كەرۋەن سارايىمەن بىرگە قازاق حاندىعىنا 550 جىل ەسكەرتكىشى، ايشا ءبيبى، بابادجا حاتۋن كەسەنەلەرىن ارالاپ كورۋ مۇمكىندىگىنە يە بولادى.

سول سەكىلدى تۋريستىك اۆتوبۋس جولاۋشىلارى قۇرىلىسىنىڭ ەرەكشەلىكتەرىن عالىمدار ەگيپەتتەگى پيراميدالارىمەن سالىستىراتىن اقىرتاس كەشەنىن ساۋلەتتىك ەرەكشەلىكتەرىمەن دە تانىسا الادى. ت.رىسقۇلوۆ اۋدانىنداعى «اقىرتاس» كەشەنىنە باعىت تۇزەيتىن تۋريستىك اۆتوبۋس ەڭ اۋەلى تاراز قالاسى اۋماعىنداعى «قاراحان» ماۆزولەيى، داۋىتبەك كەسەنەسى، ەرتە داۋىردەگى يسلام مەشىتى، «قالي ءجۇنىس» مونشاسى، ورتاعاسىرلىق «تورتكۇل » كەرۋەن سارايىنا بارادى. مۇنان سوڭ ساپار باعىتى «تەكتۇرماس» كەسەنەسىنەن «اقىرتاس» كەشەنىنە قاراي اۋىسادى.