قاي ەلدىڭ بولماسىن الەۋمەتتىك-ەكونوميكالىق تۇرعىدان تۇراقتى بولۋى – ءبىلىمدى، اقىل-ويى تەرەڭ جاستاردىڭ قولىندا. سوندىقتان جاستار قوعامنىڭ جەتەكشى كۇشى سانالادى. وسىعان وراي جامبىل وبلىسى مەركى اۋدانىندا ورنالاسقان «Tۇران» دەمالىس ورتالىعىندا «جاستار شاقىرادى» اتتى وبلىستىق كوشباسشىلار فورۋمى ءوتتى دەپ جازادى Qamshy.kz اقپارات اگەنتتىگى. 

جامبىل وبلىسى اكىمىنىڭ اپپاراتى «قوعامدىق كەلىسىم» كوممۋنالدىق مەملەكەتتىك مەكەمەسىنىڭ ۇيىمداستىرۋىمەن وتكەن وبلىستىق فورۋمعا جامبىل وبلىسى قازاقستان حالقى اسسامبلەياسى ەتنومادەني بىرلەستىگىنىڭ جاستارى، «جاڭعىرۋ جولى» جاستار قوزعالىسىنىڭ جانە «اق جەلكەن» جاستار ليگاسىنىڭ مۇشەلەرى، وبلىستىق، قالالىق جانە اۋداندىق بۇقارالىق اقپارات قۇرالدارى وكىلدەرى قاتىستى.

اتالعان شارا ەكى كۇنگە سوزىلدى. جاستار اراسىندا بەيبىتشىلىك تۇعىرىن بەكەم ساقتاۋ مەن مەملەكەت دامۋىنا ۇلەس قوسۋدىڭ جولدارىن تالقىلاۋدى كوزدەگەن ۇلكەن فورۋم جاستاردى ۇلتتىق ءسالت-داستۇردى ساقتاۋعا، بىتىمگەرشىلىك پەن بەيبىتشىلىك قۇندىلىقتارىنا بەرىك بولۋعا شاقىرۋدى ماقسات ەتتى. سونىمەن بىرگە، وڭىرلەردە دارىندى جاستاردىڭ شىعارماشىلىعىن انىقتاۋ، قولداۋ جانە كوتەرمەلەۋ، ۇلتتىق مۇرانى ناسيحاتتاۋ جانە قازاقستاندىقتاردىڭ جاس بۋىنىن مادەني-رۋحاني تاربيەلەۋ، قازاقستاندىق بىرەگەيلىكتى، قوعامدىق كەلىسىمدى قالىپتاستىرۋ جانە مەملەكەتتىك ءتىلدى وقىتۋ ارقىلى حالىقتىڭ بىرلىگىن نىعايتۋدى كوزدەدى.

شارا بارىسىندا ەكى كۇن بويى جامبىلدىڭ تالاپتى دا تالانتتى جاستارى بىر-بىرىمەن ءتۇرلى قىزىقتى موتيۆاسيالىق تاجىريبەلەرىمەن ءبولىستى. ءبىرى ويىندار ارقىلى قىزىقتى ورتا قالىپتاستىرسا، ەكىنشىلەرى سپورت ويىندارىمەن باۋراپ الىپ، ەندى ءبىرى ومىرلىك جەتىستىكتەرى مەن جاستارعا ساياحات الەمىنىڭ قىر-سىرلارىن ورتاعا سالدى.

سونىمەن قاتار، جيىنعا شاقىرىلعان ونەرپاز جاستار كورەرمەندەرگە اسەرلى اندەرى مەن بيلەرى ارقىلى جاقسى كوڭىل-كۇي سىيلادى. سونداي-اق، سۋدا ءجۇزۋ سپورتتىق ويىنى بويىنشا - «لوۆي ۆولنۋ-2019» جارىسى، ءان ايتۋ ونەرىنەن كاراوكە سايىسى، بي سايىسىنان – ديسكوبيلەر ۇيىمداستىرىلىپ، «سويلەۋ شەبەرلىگى، شەشەندىك ونەر»، «ءوزىڭدى-وزىڭ «قامشىلا»!» تاقىرىپتارىندا سەمينار-ترەنينگتەر، سونىمەن قاتار، «قازاقتانۋ» باعدارلاماسى اياسىندا ۇلتتىق تاعامداردى دايىنداۋ بويىنشا شەبەرلىك سىنىپتارى دا وتكىزىلدى.