بايزاق اۋدانىندا سۋارمالى القاپتارعا سۋ جەتكىزەتىن 72 سۋ جولى قايتا جاڭارتىلماق. بۇل تۋرالى اۋداندىق قوعامدىق كەڭەستىڭ وتىرىسىندا بايانداما جاساعان قازاقستان رەسپۋبليكاسى اۋىل شارۋاشىلىعى مينيسترلىگى سۋ رەسۋرستارى كوميتەتى “قازسۋشار” شارۋاشىلىق جۇرگىزۋ قۇقىعىنداعى رەسپۋبليكالىق مەملەكەتتىك كاسىپورنىنىڭ جامبىل فيليالىنىڭ باسشىسى قازىبەك بەدەبايەۆ ايتتى.

اۋدان اكىمى نۇرجان نۇرجىگىتوۆ، «سۋ رەسۋرستارى كوميتەتىنىڭ سۋ رەسۋرستارىن پايدالانۋدى رەتتەۋ جانە قورعاۋ جونىندەگى شۋ-تالاس باسسەيندىك ينسپەكسياسى» رمم باسشىسى اعىباي داۋرەنبەكوۆ قاتىسقان وتىرىستا “اۋدان كولەمىندەگى اۋىل شارۋاشىلىعىنىڭ داقىلدارى وندىرىلەتىن ەگىس القاپتارىنا سۋ تاسىمالدايتىن سۋلاندىرۋ جۇيەلەرىن جانە ونداعى سۋ رەتتەگىش قۇرالدارىنىڭ تەحنيكالىق جاعدايلارىن جاقسارتۋ، ەگىس القاپتارىنا سۋ ءبولىپ بەرىپ وتىراتىن مامانداردىڭ جاۋاپكەرشىلىگىن ارتتىرۋ باعىتىندا اتقارىلىپ جاتقان جۇمىستار تۋرالى” جامبىل فيليالىنىڭ باسشىسى قازىبەك بەدەبايەۆ حابارلاما جاسادى.

حابارلاماشى «بايزاق» وندىرىستىك بولىمشەسى اۋدان اۋماعىندا ورنالاسقان اۋىل شارۋاشىلىعى ماقساتىنداعى 32 553 گەكتار ەگىس القاپتارىنا سۋارمالى سۋ بەرۋ بويىنشا قىزمەت كورسەتەتىنىن، وندىرىستىك بولىمشە تەڭگەرىمىندە “تەمىربەك” جانە “تالاس” سۋ تورابى، 648،707 شاقىرىمدى قۇرايتىن 105 دانا كانال جانە 8 كوللەكتورلىق درەناج جۇيەلەرى بار ەكەنىن ايتتى.

– بۇدان وزگە وتكەن جىلى 14،412 گەكتار جەرگە كەلىسىم-شارت جاسالىپ، 78،158 ملن. تەكشە مەتر سۋ بەرىلسە، اعىمداعى جىلى 18،456 گەكتار جەرگە كەلىسىم-شارت جاسالىپ، 112،626 ملن. تەكشە مەتر سۋ بەرىلگەن. جامبىل فيليالىنىڭ تاپسىرىسىمەن قىرعىز رەسپۋبليكاسىنىڭ ۆەگەتاسيا مەرزىمىندە سۋدان قيىنشىلىق كورگەندىكتەن، قۇنى – 63،9 ملن. تەڭگەگە ۇزىندىعى 85 شاقىرىمدىق 10 كانالعا جۇرگىزىلگەن مەحانيكالىق تازالاۋ جۇمىستارى جۇرگىزىلدى. اتالعان كانالدار ارقىلى وتكەن جىلى 1304 گەكتار جەر سۋارىلسا، اعىمداعى جىلى 2707 گەكتار جەر سۋارىلعان. ودان بولەك اۋدان اۋماعىندا جوسپارلانعان سۋ شارۋاشىلىق نىسانداردىڭ قۇرىلىس جۇمىستارى دا نازاردان تىس قالمادى. تەحنيكالىق جاعدايى ناشار، 40-50 جىلداي جوندەۋ جۇمىستارى جۇرگىزىلمەگەندىكتەن سۋ ىسىرابى جوعارى، قامىس باسىپ، قوقىسقا تولسا، بەتوندى كانالداردىڭ لوتوكتارى سىنعان، سۋ ولشەۋ بەكەتتەرى جارامسىز بولىپ كەتكەن. وسىعان وراي، ەلباسىنىڭ تاپسىرماسىنا سايكەس، سۋارمالى جەرلەردى قايتا قالپىنا كەلتىرۋ باعدارلاماسى اياسىندا اۋدان بويىنشا جەر كولەمى 14 098 گەكتار بولاتىن 72 نىساندا قايتا جاڭعىرتۋ كوزدەلۋدە، – دەدى ق. بەدەبايەۆ.

حابارلامادان سوڭ قوعامدىق كەڭەستىڭ “اگرارلىق ساياسات، اۋىلدىق اۋماقتاردى دامىتۋ، تابيعاتتى جانە جەر رەسۋرستارىن پايدالانۋ، تەحنوگەندىك ۇردىستەر، كاسىپكەرلىكتى قولداۋ، قۇرىلىس، كولىك جانە كوممۋنالدىق شارۋاشىلىق سالالارىن دامىتۋ ماسەلەلەرى جونىندەگى كوميسسياسى” ءتوراعاسى سەرىك ەرمەكوۆ قوسىمشا بايانداما جاسادى. سونىمەن قاتار، اۋدان اكىمدىگى اۋىل شارۋاشىلىعى ءبولىمىنىڭ باسشىسى بولات ساعىنبەكوۆ، جالعىزتوبە اۋىلدىق وكرۋگىنىڭ اكىمى قانات تەلەۋوۆ، وبلىستىق قوعامدىق كەڭەستىڭ مۇشەسى، “تالاپ” شارۋا قوجالىعىنىڭ جەتەكشىسى ماۋىت فازۋلوۆ پىكىرلەرىن ءبىلدىردى.