م. ح. دۋلاتي اتىنداعى تاراز مەملەكەتتىك ۋنيۆەرسيتەتى QS EECA University Ranking-2020 حالىقارالىق رەيتينگىسى بويىنشا الەمنىڭ ۇزدىك 350 جوعارى وقۋ ورىندارىنىڭ قاتارىنا ەندى.

ليتۆا رەسپۋبليكاسىنىڭ كاۋناس قالاسىندا ءوتىپ جاتقان QS in Conversation «حالىقارالىق ىنتىماقتاستىق ارقىلى تانىمالدىلىقتى ارتتىرۋ: ۇتقىرلىق، تانۋ، برەندينگ» اتتى حالىقارالىق سامميتىندە QS EECA-2020 (Emerging Europe & Central Asia ) رەيتينگىسىنىڭ قورىتىندىسى اشىق تۇردە جاريالاندى. رەيتينگ قورىتىندىسى بويىنشا Dulaty University QS EECA رەيتينگىسىنە العاش رەت قاتىسىپ، ۇزدىك 350 ۋنيۆەرسيتەت قاتارىنا كىردى.

QS (Quacquarelli Symonds) EECA رەيتينگىسى دامۋشى ەۆروپا جانە ورتا ازيا ەلدەرىنىڭ ۇزدىك 350 ۋنيۆەرسيتەتىن انىقتايتىن بەدەلدى رەيتينگ. اتالمىش رەيتينگ ۋنيۆەرسيتەتتىڭ 9 كورسەتكىشىن تالدايدى. ولار: جوو-نىڭ اكادەميالىق جانە جۇمىس بەرۋشىلەر اراسىنداعى بەدەلى، ستۋدەنتتەر سانىنىڭ قىزمەتكەرلەر سانىنا اراقاتىناسى، ءبىر قىزمەتكەرگە كەلەتىن عىلىمي جاريالانىمدار سانى، سيتاتالار سانى، ۋنيۆەرسيتەتتىڭ ينتەرنەتتەگى تيىمدىلىگى، عىلىمي دارەجەلەرى بار قىزمەتكەرلەر ۇلەسى، شەتەلدىك قىزمەتكەرلەر جانە شەتەلدىك ستۋدەنتتەر سانى. وسى ورايدا رەيتينگكە م.لومونوسوۆ اتىنداعى ماسكەۋ مەملەكەتتىك ۋنيۆەرسيتەتى (رەسەي) كوش باستاپ، چارلز ۋنيۆەرسيتەتى (چەحيا)، ۆارشاۆا تەحنولوگيالىق ۋنيۆەرسيتەتى (پولشا)، ۆيلنيۋس ۋنيۆەرسيتەتى (ليتۆا) جانە ستامبۋل ۋنيۆەرسيتەتى (تۇركيا) سىندى وزگە دە بەدەلدى وقۋ ورىندار قاتىستى.

الەمنىڭ وزىق ۋنيۆەرسيتەتتەرىن بىرىكتىرگەن QS-in Conversation «حالىقارالىق ىنتىماقتاستىق ارقىلى تانىمالدىلىقتى ارتتىرۋ: ۇتقىرلىق، تانۋ، برەندينگ» سامميتىندە الەمدىك ەڭبەك نارىعىندا ۇلكەن سۇرانىسقا يە بولاتىن قابىلەتتى مامان دايىنداۋ، عىلىمدى دامىتۋ، اكادەميالىق ۇتقىرلىق تۋرالى ءتۇرلى ماسەلەلەر ايتىلدى.

ەستەرىڭىزگە سالا كەتەيىك، م. ح. دۋلاتي اتىنداعى تاراز مەملەكەتتىك ۋنيۆەرسيتەتى 1958 جىلى قۇرىلعان. بۇگىندە وقۋ ورداسى ەلىمىزدەگى ەڭ ءىرى مەملەكەتتىك جوعارى وقۋ ورىندارىنىڭ ءبىرى سانالادى. تارمۋ وبلىستاعى جالعىز مەملەكەتتىك كوپبەيىندى جوعارى وقۋ ورنى بولىپ تابىلادى. ۋنيۆەرسيتەتتە جالپى كولەمى 73924،4 شارشى م. قۇرايتىن 14 وقۋ-لابوراتوريالىق عيمارات جانە جاڭا ولشەۋ قۇرالدارىمەن جابدىقتالعان 155 لابوراتوريا بار.