Ресей мен Түркияның сыртқы істер министрлері Сергей Лавров пен Мевлют Чавушоглу Таулы Карабах қақтығысына байланысты телефон арқылы сөйлесті, деп хабарлады bbc.
"Министрлер қарулы қақтығыстың тоқтамай жатқанына аса алаңдаушылығын білдіретінін жеткізіп, әскери әрекеттерді дереу тоқтату туралы ойларымен бөлісті. Сондай-ақ конфликтке өзге аймақтардың заңсыз қарулы күштерінің араласуына мүлде жол беруге болмайтынына назар аударды" делінген таратылған ақпараттық хабарламады.
Тараптар бейбіт келіссөзге оралуға шақырудың маңызын, Баку мен Ереванға саяси-дипломатиялық қолдау көрсетуде әр қадамды екшеудің қажеттігін атап өткен.
Сонымен қатар ресейлік ведомство екі ел Таулы Карабахтағы қақтығысты бейбіт арнаға бұру үшін бірлескен әрекетке кірісуге әзір екенін хабарлаған.
Таулы Карабахтағы қақтығыс 27 қыркүйектен бері жалғасып келеді. Екі тарап жанжалдың басталуына бірін-бірі кінәлайды.
Таулы Карабах Әзербайжан Республикасы аумағындағы автономиялық облыс. Облыс толықтай Әзербайжанның аумағында жатыр. Ешқандай елмен шектеспейді.
1992-1994 жылдары Армения аймақта этникалық армяндардың тұрып жатқанын желеу етіп әскер күшімен Таулы Карабах өлкесі мен іргелес жатқан жеті ауданның жерін басып алған. Аккупацияланған жер Әзербайжан территориясының 20 пайызын құрайды.
Ол сәтте Таулы Карабахта 170 мың азамат тұрған. Оның 130 мыңы армяндар, қалғаны әзербайжандар еді.
1994 жылы облыста оқ атуды тоқтату туралы келісім жасалар сәтте Әзербайжан жеріне миллионға жуық босқын келген.
1994 жылдан бері аталған аймаққа қатысты келіссөздер АҚШ, Франция, Ресей теңтөрағалары саналатын ОБСЕ-нің Минск тобы деген атпен жалғасып келеді.
Пікір қалдыру