26 aqpanda Májiliste Palata Spıkeri Nurlan Nyǵmatýlınniń tóraǵalyǵymen ótken jalpy otyrysta depýtat Jambyl Ahmetbekov Qazaqstan Respýblıkasynyń  Premer-Mınıstri Serik Ahmetovke depýtattyq saýal joldady.

«Halqymyzdyń asyl perzentteri Jumabek Táshenov pen Rabıǵa Esimjanovanyń 100 jyldyq mereıtoılaryn respýblıkalyq dárejede laıyqty atap ótý týraly osy depýtattyq saýaldy joldap otyrmyn.

2015 jyly 20 naýryzda J.Táshenevtiń týǵanyna 100 jyl tolady. Jumabek Ahmetuly Táshenev keńes zamanynda esimi ańyzǵa aınalǵan tulǵa, 1960 jyldary Qazaqstannyń Joǵarǵy Keńesin jáne Úkimetin basqarǵan, respýblıkanyń áleýmettik-ekonomıkalyq jáne mádenıeti men óneriniń damýyna úlken úles qosqan memleket qaıratkeri.

Eli men jeriniń tutastyǵyn saqtap qalý jolynda kúresken Jumabek Táshenev Hrýshevtiń Qazaqstannyń bes oblysyn (sol kezdegi Selınograd qalasymen qosa) Reseıge qosýdy josparlaǵan áreketine batyl toıtarys bergen. Osyndaı tabandy qarsylyqqa kezdesken Hrýshev budan keıingi ýaqytta qazaq ishinen shyqqan basshylardyń sózderine qulaq salýǵa, halqynyń pikirimen sanasýǵa májbúr bolǵan. Eger sol jospar iske asqanda Qazaqstannyń bir bóliginen, qazirgi Astana qalasynan da aıyrylyp, memleketimizdiń terıtorıalyq tutastyǵynan da birjola qoshtasatyn jaǵdaı edi. Sondyqtan  Jumabek Táshenevtiń bul áreketi halyqtyń ulttyq rýhyn oıatqan erlik oqıǵa boldy.

         Osy oqıǵadan keıin ol joǵary laýazymdy qyzmetinen alynyp, oblystyq basshy deńgeıine deıin tómendetildi. Ózi baqylaýda júrse de batyr qaıratker rýhyn túsirmedi, ǵylymmen aınalysty jáne halqy úshin adal qyzmet etip zeınetkerlikke shyqty. J.A.Táshenevke qazaq jeri men halqy úshin jasaǵan erligi men eńbegine urpaqtary máńgilik qaryzdar. Mine, sondyqtan da halyq júreginde saqtalǵan abzal jannyń jarqyn beınesin, esimin, erligin jańǵyrtyp otyrý búgingi urpaqtyń paryzy dep bilemiz.

Qazaqstannyń halyq artısi, kúmis kómeı ánshi Rabıǵa Esimjanovanyń týǵanyna bıyl 100 jyl toldy. Ókinishke oraı esimi búkil elimizge tarap, aty ańyzǵa aınalǵan ánshi apamyzdyń mereıtoıy elimizde atalyp ótken joq.

Rabıǵa Esimjanova 1914 jyly qazaqtyń keń dalasy Saryarqanyń tórinde, qazirgi Aqmola oblysy, Qorǵaljyn aýdanynda dúnıege kelgen. Óner jolyn Semeı oblystyq mýzyka drama teatrynda drama artısi retinde bastaǵan. Keıin Almaty, Qaraǵandy qalalaryndaǵy teatr trýppasynda qyzmet etip, M.Áýezovtiń «Eńlik-Kebeginde» Eńliktiń, «Aıman-SHolpanynda» Aımannyń, E.G.Brýsılovskııdiń «Qyz Jibeginde» Jibektiń rolderin sheberlikpen somdap halyqtyń sheksiz rızashylyǵyna ıe bolǵan. 1946-1960 jyldar aralyǵynda R.Esimjanova Qazaq radıosynyń ánshisi boldy. 1960 jyldan bastap ómiriniń sońyna deıin «Qazaqkonsert» birlestiginiń ánshisi retinde halyqqa qyzmet etti. Halqymyzdyń súıikti qyzy, bulbul ánshi Rabıǵa Esimjanovanyń repertýarynda negizinen halyq ánderi: «Áýpildek», «Ápıtók», «Gaýhartas», «Jalǵyz arsha», «Jonyp aldy», «Láılim shyraq», «Qudasha», «Mańmańker» t.b. jáne halyq kompozıtory Sh.Qaldaıaqovtyń ánderi boldy. Rabıǵa Esimjanovanyń elimizdiń mádenıeti men ónerin damytýǵa qosqan zor úlesi memlekettik nagradalarmen marapattalǵan. Ol «Qurmet belgisi» ordeniniń ıegeri jáne «Qazaqstannyń eńbek sińirgen artısi», «Qazaqstannyń halyq artısi» ataqtary berilgen.

Ultymyzdyń ardaqtylary J.Táshenev pen R.Esimjanovanyń 100 jyldyq mereıtoıyn respýblıkalyq deńgeıde laıyqty atap ótý máselelerin qarastyrýyńyzdy jáne depýtattyq saýaldy Qazaqstan Respýblıkasynyń qoldanystaǵy zańnamasynda belgilengen tártippen qarap, jaýabyn joldaýyńyzdy suraımyn».