«Atameken» ulttyq kásipkerler palatasysynyń Tóralqa Tóraǵasy Tımýr Qulybaevtyń jáne Astana qalasynyń ákimi Ádilbek Jaqsybekovtyń qatysýymen Astana kásipkerleriniń İİİ jyl saıynǵy konferensıasy ótti, - dep habarlaıdy «Qamshy» portaly.  

            Konferensıada kásipkerlerdiń bıznestik júıelik máseleleri talqylandy.

          «Atameken» QR Ulttyq kásipkerler palatasy Basqarma Tóraǵasy Abylaı Myrzahmetov Astanada sátti bıznes júrgizýge kedergi bolyp otyrǵan júıeli máselelerge toqtalyp ótti.

          Eń aldymen Astana qalalyq kásipkerler palatasynyń jumysy týraly ÓKP dırektory Ǵanı Tasmaǵanbetov baıandama jasady.

Sóz basynda ótken jyly Kásipkerler palatasyna kásipkerlerdiń quqyǵyn qorǵaý boıynsha 350 shaǵym kelip túskenin jáne shaǵymdardyń jartysynan astamy bıznestiń paıdasyna sheshilgenin atap ótti.

ÓKP dırektory Ǵanı Tasmaǵanbetov Astanada saýda oryndarynyń sany men satyp ótkiziletin ónimderdiń túrleri ulǵaıatynyn baıandady.

«Kásipkerlerdiń ótinishi boıynsha 2016 jyly Astana ákimdigi bólshek saýda nysandaryna arnalǵan saýda oryndarynyń sanyn jáne balalar oıyn alańdaryn ornalastyrýdy 3 esege, ıaǵnı 1000 orynǵa kóbeıtildi»,– dedi Ǵ.Tasmaǵanbetov.

          ÓKP dırektorynyń aıtýynsha, taǵy bir mańyzdy másele – qyzmet kórsetý jáne týrızm salasy nysandaryn halyqaralyq standarttarǵa sáıkestendirý. Qazirgi tańda palata astanalyq Investısıalar jáne damý basqarmasymen, «Astana Konvenshn Búro» JSHS jáne «Astana EKSPO-2017» Ulttyq kompanıasy» AQ-men birlesip, qonaq úı bıznesi jáne qalanyń qoǵamdyq tamaqtandyrý salalarynda usynylatyn týrısik qyzmetter sapasyn baǵalaýdyń krıterıılerin bekitti.

Sonymen qatar, Astana qalasynyń sol jaǵalaýynda tolyq formatta kásipkerlerge qyzmet kórsetý ortalyǵyn ashý usynyldy. «Kez kelgen jeke kásipker ortalyqqa kelip, qajetti aqparatpen qamtamasyz ete alatyndaı oryn bolǵany durys dep oılaımyz»,– dedi Ǵ.Tasmaǵanbetov.

Kásipkerler konferensıasynda sóz alǵan Astana qalasynyń ákimi Ádilbek Jaqsybekov Astananyń jalpy óńirlik ónimindegi shaǵyn jáne orta bıznestiń úlesi 61%-ǵa jetkenin atap ótti. Astananyń negizgi ekonomıkalyq kórsetkishterine toqtala kele, qala ákimi ákimdik pen kásipkerlerdiń óńirlik palatasynyń birlesken belsendi jumysynyń bıznestiń damýyna eleýli úles qosyp jatqanyn aıtty.