«Eır Astana» áýe kompanıasynyń ushqyshy Almaty áýejaıynda esirtkimen ustaldy, - dep habarlaıdy «Qamshy» portaly.

«Vremá» gazetiniń jazýynsha, Máskeýden Almatyǵa ushyp kelgen «Eırbas-320» ushaǵy jolaýshylarynyń júkterin tekserý kezinde polısıanyń qyzmettik ıti ushqysh kıimindegi azamattan seziktenip, belgi bergen. Sol kúni atalǵan ushaqpen barlyǵy 82 jolaýshy kelgeni aıtylady.

Polıseıler keden organlarynyń qyzmetkerlerimen birge kúdiktiniń zattaryn teksergende onyń qaltasynan jasyl tústi ósimdik tektes zat salynǵan paket tabylyp, birden saraptamaǵa jóneltilgen.

Al, qaltasynan kúdikti paket tabylǵan azamat «Eır Astana» kompanıasynyń 39 jastaǵy ekıpaj komandıri bolyp shyqqan. Kúdiktiden tárkilengen zat marıhýana ekeni anyqtaldy. Marıhýana ekıpaj komandıriniń qanynan da anyqtalǵan. Ustalǵan azamat óziniń sońǵy úsh jyldan beri esirtki tutynatynyn, tipti, Máskeýden beri qaraı ushar aldynda da marıhýana shegip alǵanyn jasyrmaǵan.

Qazirgi tańda atalǵan is boıynsha sotqa deıingi tergeý sharalary júrgizilýde. «Eır Astana» kompanıasy bul oqıǵa boıynsha resmı málimdeme taratpady.